نێچیرڤان بارزانی سه‌رۆکێ هه‌رێما کوردستانێ د په‌یامه‌کێ دا کوشتنا ئه‌بوبه‌کر به‌غدادی، سه‌رۆکێ ڕێخستنا ته‌رۆریستیا داعیش ب سه‌رکه‌فتنه‌کا مه‌زن یا شه‌رێ دژی ته‌رۆرێ دا زانین، لێ به‌لێ دووپات کر کو کوشتنا بەغدادی نە داویا تەرۆر و رێکخستنا تەرۆریستیا داعیشێ یە، ژ بۆ وێ یه‌کێ به‌رده‌وامیا هه‌ڤکاری و هه‌ماهه‌نگیا جڤاکا ناڤده‌وله‌تی یا ژ بۆ نه‌هشتنا ته‌رۆرێ و ئیدیۆلۆژیا داعیش ب پێویست دزانە.
ئه‌ڤه ژی ل ژێر ناڤه‌رۆکا وێ پەیامێ:
هه‌رێما کوردستانێ وه‌کی به‌شه‌کێ گرنگ و سه‌ره‌کی د هه‌ڤپه‌یمانیا ناڤده‌وله‌تیا دژی داعیش دا، ژناڤبرنا ئه‌بوبه‌کر به‌غدادی سه‌رێ ڕێخستنا ته‌رۆریستیا داعیش ب پێنگاڤه‌کا مه‌زنا شه‌رێ دژی ته‌رۆرێ دزانە و حورمەتا خوه ژ بۆ هه‌ولا ئەمریکا و وان هه‌موویان ڕادگهەینه کو ب هه‌ر ئاوایه‌کی د سه‌رکه‌فتنا ڤێ ئۆپه‌راسیۆنێ دا به‌شدار بوون.
کوشتنا به‌غدادی ژ بۆنا ژناڤبرنا ب ناڤ خه‌لافه‌تا داعیشێ، پێگاڤه‌کا گرنگه، لێ به‌لێ ئه‌وه ب چ ئاوایه‌کی واته‌یا داویهاتنا ته‌رۆرێ و بیر و ئیدیۆلۆژیا داعیشێ ناگەهینە، مه‌ترسیا بهێزبوونا ته‌ڤگه‌رێن ته‌رۆریستان هێشتا ژی زێده‌یه و داعیش و گرووپ و هه‌ڤشێوه‌یێن وێ ل ناڤچه‌یێ دا هێشتا ژی د ته‌ڤگه‌رێ دانه و گه‌فێ ل ئاساییشا هه‌موو جیهانێ دکن. ژ بۆ وێ یه‌کێ پێویسته جڤاکا ناڤده‌وله‌تی د ناڤا هه‌ڤکاری و هه‌ماهه‌نگیا دژی ته‌رۆرێ دا به‌رده‌وام بە، نه‌کو هه‌ر ته‌نێ د وارێ سه‌ربازی دا، لێ هه‌ول و هه‌ڤکاریان بهێز بکن ژ بۆ به‌ره‌ڤ پێشڤه‌برنا په‌روه‌رده و کولتوورا پێکڤه‌ژیان و هه‌ڤدوقه‌بوولکرن و لێبۆرینی و نه‌هشتنا وان بنگه‌هێن کو ته‌رۆر و خه‌لکێن وه‌کی به‌غدادی به‌رهه‌م تینن.
هه‌رێما کوردستانێ کو قوربانیه‌کا زێده ژ بۆنا ژناڤبرنا ته‌رۆرێ دایه کو ل ناڤچه‌یا مه و ل عیراقێ، ئێزدی، مه‌سیحی، مسلمان و هه‌موو پێکهاتێن ئۆلی و نه‌ته‌وه‌یی ڕووبروویێ تاوانێن ترسناکێن داعیشێ بوونه. نها ژی ب هه‌موو ئاوایه‌کی ژ بۆ ڕێگرتنا سه‌رهلدان و بهێزبوونا داعیش و ته‌رۆرا ل ناڤچه‌یێ و پاراستنا ئاساییش و ئازادیا ل جیهانێ دا د هه‌ڤکاریا جڤاکا ناڤده‌وله‌تی ل شه‌رێ دژی ته‌رۆرێ دا به‌رده‌وام دبە و ڕووبروویێ ئیدیۆلۆژیا و بیرا تاریکی یا داعیشیان دبه.
نێچیرڤان بارزانی
سه‌رۆکێ هه‌رێما کوردستانێ
٢٠١٩/١٠/٢٧
