کۆبانێ هێجەت بوو
گەلەک جارا د دەربارێ سیاسەتێ دا و ھندەک بوویەرێن جڤاکی دا روویدان ھەنە کو، مرۆڤ بەحسێ وان ناکە. بەحسنەکرنا وان نە کو ژ خەمساریەکێ یە، بەلکی ژی ل گۆرا قۆناغا کو تێ ژیاندن ھەلوەستەکە. گەلەک جارا د جڤاتا مە دا بێدەنگی ب خوە ژی وەک ھەلوەستەکی تێ نرخاندن.
پرس و بوویەرێن د دەربارێ کۆبانێ دا روودایین ژی، ژ بوویەرەکا ب ڤی ئاوایی یە. راستی ھەلوەستا پەکەکێ و نرخاندن و شرۆڤەیێن پەکەکێ و ئالیگرێن وان بوون سەدەمەک کو کۆبانێ ژ راستیا کو ھاتی ژیاندن دوور خستن و جاردن ژ خوە را کرن ئارمانجەکا پرۆپاگاندەیێ.
ھەرکەسەک دزانە کو د ئازادکرنا کۆبانێ دا رۆلێ پێشمەرگەیێن کوردستانێ گەلەک بوو. ھەروەھا ڤێ یەکێ ھێڤیا ژ بۆ دەستپێکرنەکا نووژەن و ھەڤکاریا ناڤبەرا رێخستنان دا ژی خۆرت کر. ھەتا رادەیەکی رێدانا ترکیێ ژ بۆ دەرباسبوونا پێشمەرگەیێن کوردستانێ و ل باکور پێشوازیا خەلکێ باکورێ کوردستانێ یا ل پێشمەرگەیان بوویەرەک ئەرێنی و دیرۆکی بوو.
لێ پەکەکە ژ ڤێ ئاوایێ پێشوازیکرنێ ترسیا و دەست ب پرۆپاگانەدا و دەرەوان کر.
ل باکورێ کوردستانێ، ل نک دلێ خوە ژ بۆ کۆبانێ بەرپرسێن پەکەکێ بانگا خوەپێشاندانا کرن، د ھەمان دەمی دا ھەدەپێ ژی بانگا خوەپێشاندانا کر و 6-8 جۆتمەھا 2014 ل گەلەک باژارێن باکورێ کوردستانێ ئالیگرێن پەکەکێ د ھەمان دەمی دا ئەندامێن ھەدەپێ داکەتن کۆلانا. یا ھاتیە کرن نە خوەپێشاندانێن نۆرمال بوون، خوەپێشاندەران ئێریشێ گەلەک جھان کرن، دبستان، نەخوەشخانە، کتێبخانە و گەلەک دوکان و جھێن کارێ خەلکێ شەوتاندن. مەسەلە نە مەسەلا کۆبانێ بو، کۆبانێ تەنێ کرن ھێجەت.
رۆژا 6 جۆتمەھێ ئەندامێ کۆنسەیا رێڤەبرا پەکەکێ موراد کارایلان داخویانیەک دا ئاژانسا پەکەکێ یا ب ناڤێ ئا ن ف و گۆت: دەما سەرۆکێ پەیەدێ سالح مووسلم سەردانا ئەنقەرەیێ کری، ترکیێ سۆزا ڤەکرنا کۆریدۆرەکی ژ بۆ کۆبانێ دابوو لێ ئەڤ سۆزا خوە ب جھ نەئانی.
د ئەنجاما خوەپاشاندانێن 6-8ێ جۆتمەھێ دا، 35 کەسان ژیانا خوە ژ دەست دا، 435 سڤیل و 326 پۆلس برینداربوون. ب سەدان جھ و ئاڤاھی ھاتن شەوتاندن. ژ بۆ ڤان کریاران گەلەک ئەندامێن ھەدەپێ ھاتن بنچاڤکرن .
ھەر ب ڤێ مەبەستێ ژی ھەڤسەرۆکێن ھەدەپێ ھاتن گرتن و دادگەهکرن.
دادگەھێ د دەربارێ گرتیان دا پشتی 10 سالان بریار دا و د سەری دا دەمیرتاش و یوکسەکداغ ب سزایێن گران ھاتن سزادان. دەمیرتاش 42 سالان و یوکسەکداغ 30 سالان سزا وەرگرتن. ھندەک کەسایەتیێن دن ژی ھاتن سزادان و ھندەک ژی، ژ ڤێ دۆزێ ھاتن ئازادکرن. هێشتا رێیا نەرازیبوونێ ژ بۆ دادگەھێن بلند ھەنە و دکارە ئەنجامێن دن ژی دەرکەڤن ھۆلێ.
نرخاندنا ڤێ بوویەرێ ب ئاوایەکێ ھێسانە، ئەگەر مرۆڤ راستیا روودایی و ئەنجامێن وێ بێژە. لێ مخابن پرۆپاگاندەیا مەدیایا پەکەکێ و چەپێن ترکان باندۆرا خوە د ڤێ دەربارێ دا ل ھەموو مەدیایا کوردی ژی کر.
ئەڤ بوویەر و بریارا دادگەھان سیاسی یە. ئەڤ یەک نایێ مناقەشەکرن. لێ گەلۆ کی و چەوا رێ دان ڤان بوویەران؟ ژ بۆ چ نایێ نرخاندن؟
ھەتا کو تەرۆرا فکری یا پەکەکێ بەردەوام بە نە کورد دکارن دژمنێن خوە باش ناسبکن و نە ژی گرێدانا دەزگەھێن دەولەتا کوور و پەکەکێ دبینن.
مەسەلەیەک ھەیە کو دبێژن: جارەکی ھندەک دز کەتن مالا بەھلوول و مالا وی ڤالاکرن و ھەموو تشتێن وی دزین. رۆژا دن جیرانێن وی کۆم بوون، ھندەکا گۆت چما تە دەری ئاسێ نەکربوو، ھندەکا گۆت ما تە قوفل ڤەکری ھشتیبوون؟ ئاخر ھەر یەکی تشتەک گۆت تاوانێ دزان ژی ب ئاوایەکی کرن ستوویێ بەھلوول دا. داویێ دا بەھلوول گۆت: ئەرێ باشە خەلەتیا من چبوویە، لێ گەلۆ قەت سوچا دزا تونەیە؟
