پروسەیێن سیاسی ل ھەمی وەلاتا پشت بەستنێ ل سەر بەرنامە و پلاننێن ئالیێن سیاسی دکەت ل وی وەلاتی ئەڤجا شێوازێ حوکمرانیێ ھەر چ بیت. پارتیێن سیاسی و دروستبوونا وان ل ھەر وەلاتەکی بۆ وەلاتەکێ دی جودایە. ل گورەی دەستوور و یاسایین ھەر وەلاتەکی بو ئارمانج و بەرنامەیەکێ تایبەت و دەستکەفتن دیارکری دروست دبن! لێ چو ژ ڤان سالوخەتان ل سەر پارتیا دەموکرات یا کوردستانێ (پارتی) جێبەجێ نابن چونکە پارتی ژ ھناڤێن مللەتەکێ ستەم دیتی دروست بوویە، پشتی چەندین شۆرەشا و ژ قوناغا شۆرەشگێریێ بەرەف قوناغەکا نوو یا سیاسی چویە، ل وەلاتەکی کو ب تنێ ئاگر و ئاسن زمانێ وی بویە بەرامبەر گەلێ کورد و د بنیات دا ئەف وەلاتە سەقت دروست بوویە کو ئەوژی وەلاتێ ب ناڤ عیراق ە!! پارتی بۆ رزگارکرنا مللەتێ کورد و ئازادکرنا کوردستانێ دروست بوویە و ل کۆنگرەیێ ٣ێ ل کەرکوکا دلێ کوردستانێ ل سالا ١٩٥٣ێ ناڤێ پارتی ھاتیە گوھارتن ژ پارتیەکا کوردی بۆ پارتیەکا کوردستانی و بێ جوداهی خەبات و بەرخوەدان بۆ ئاخ و مافێ ھەمی کوردستانیان کریە.
پارتی قوناغ بو قوناغ و ل گورەی کاودانێن نافخوە و ھەرێمی و ناڤدەولەتی خوە گوھارتیە و دروشمێن نوو بلندکرینە، ل گورەی وان کاودانان و تا ئەڤرو پارتی ١٣ کونگرە ئەنجام داینە و بۆ ھەر کونگرەیەکێ دروشمەک بلندکریە و کار ژ بۆ جێبەجێکرنا وی دروشمی کریە. ل دوماھیک کونگرەیێ، ل ھەولێرا پایتەخت، ل سالا ٢٠١٠ پارتی دروشمێ (نووبوون- دادپەروەری – پێکڤەژیان ) بلندکر بۆ عیراقەکا نوو یا فەدەرال پشتی ژناڤچوونا رێژێما بەعس ل سالا ٢٠٠٣ بەلێ ھەر زوو رەوش ب تمامی ھاتە گھورین و کاودان و مەترسین مەزن و جدی ھاتنە پێش و بەغدا ژ ڤی عەقلیەتا جاران و ب زمانێ گەف و ئاگر رەفتار دگەل ماف و داخوازیێن ھەرێمێ کر، لەورا سەرکردایەتیا کوردستانێ ب سەرپەرشتیا سەرۆک بارزانی بریارا ئەنجامدانا ریفراندومێ دا و ل (٢٠١٧/٩/٢٥) ئەف پروسەیە ب سەرکەفتیانە ھاتە ئەنجامدان و ٩٢٪ ژ خەلکێ کوردستانێ دەنگ بۆ سەربەخوەییا کوردستانێ دا، لەورا گومان تێدا نینە کو ئەنجامدانا پروسەیەکا ھند یا گرنگ د مێژوویا کوردستانێ دا دێ رەنگڤەدانا خوە ھەبیت ل سەر کۆنگرەیێ ١٤ یێ پارتیێ.
بۆچی دھۆک؟
د مێژوویا دروستبوونا پارتیا دەموکرات یا کوردستانێ دا ١٣ کۆنگرە ھاتینە ئەنجام دان، بەلێ چو ژ ڤان کۆنگرەیان لپارێزگەھا دھۆکێ نەبووینە ئەو ژی بۆ چەندین ئەگەرێن گرێدایی بابەتێن ئەمنی، سەربازی و جڤاکی دزڤرن، ل دەمەکی بەشەکێ مەزن ژ مێژویا پارتیێ و دەستپێکا شۆرەشا ل ڤێ پارێزگەھێ بویە!! سەنگێ شەرێ رێکخراوا تیرورستی یا داعش ل سنورێ پارێزگەھا دھۆکێ بوویە! رێژا ھەرا زێدە یا کۆچبەر و پەنابەران ھەر ل سنورێ ڤێ پارێزگەھێ بوویە! رێژا زێدە یا شەھیدان بەر ڤێ پارێزگەھێ کەتیە! شکاندنا مەزنترین پیلان دژی ھەرێما کوردستانێ پشتی رویدانن ١٦ ئۆکتۆبەرێ ل سنورێ پارێزگەھا دھۆکێ بوویە، لەورا کۆنگرەیێ ١٤ یێ پارتیێ کو بریارە ل ڤی باژێری برێڤە بچیت بۆ بنیاتدانانا دەستپێکا قۆناغەکا نوویە و ھێزەکا نوویە بۆ پارتیێ بۆ بەرسینگرتنا پیلانا و فشارا و دەرباسکرنا دۆزا کوردیە بو قوناغەکا دی.
بەدرخان زاویتەیی
٢٠١٧/٧/٥
