کی تەعداییێ ل کوردان بکه کورد دبن حه‌زکریێن وان
کی تەعداییێ و ئەشکه‌نجێ ل کوردان بکه، کورد دبن حه‌زکریێن وان!!!
بووبێ ئه‌سه‌ر
ئەڤە ٨٤ سال د سه‌ر قرکرن و ژه‌نۆسیدا ده‌رسمێ را ده‌رباس بوون. د ناڤا ڤێ ده‌مێ دا پرانیا خه‌لکێ مه یێ ده‌رسمێ زمانێ خوه ژ بیر کرنه. ژ هزرا نه‌ته‌وه‌یی دوور که‌تنه و پرانیا وان ژی ژ موسته‌فا که‌مالێ کو باڤ و باپیرێن وان قرکرنە، حه‌ز دکن. ب گۆتنه‌ک دن ئەو بوونه که‌مالیست.
٤۲ سال د سه‌ر ۱۲ ئیلۆنا ۱۹۸۰ ێ ده‌رباس دبن. د ڤێ رۆژێ دا ب کۆدەتایەک لەشکەری، لەشکەرێ ترکیێ هاتە سەر حوکمی و هەر تشت کەتە د بن کۆنترۆلا ئەرتەشێ دا، ئێدی لەشکەری دەست ب گرتنا وەلاتبارێزێن کورد ل باکورێ کوردستانێ کر و هەموو د زیندانەکێ ب ناڤێ زیندانا ٥ نۆلی دا کو ژگرتن، ژ خوە ئەو گرتیگەه ژ بۆ وەلاتپارێزێن کورد ڤەکربوون، (ئەز ژی یەکژ وان زیندانیان بووم) زمانێ کوردی ل گرتیێن د وێ زیندانێ دا قه‌ده‌خه کربوون. لێ د بن وان شه‌رتێن دژوار دا ژی مه هه‌ول ددان کو ئه‌م ب هه‌ڤرا ب زمانێ خوه قسه بکن. لێ پشتی وی حوکمێ له‌شکه‌ری کو ئاگر به‌را کوردستانێ دابوو، ل کوردان وه‌ها کر کو پترین کوردێن باکورێ کوردستانێ زمانێ خوه ژ بیر کرن و بوونه حه‌یرانێ زمانێ ترکی و ترکان.
ئەو که‌سێن د وێ زیندانێ دا بوون کو کاربده‌ستێن زیندانێ زمانێ وان ل وان قه‌ده‌خه کربوون، ده‌ما کو ئه‌و ژ وێ زیندانێ ده‌رکه‌تن، شه‌رم و فه‌دی نه‌کرن، ڤێ جارێ وان بخوە ژی زمانێ دایکا خوه ل خوه قه‌ده‌خه کرن. پترینیا وان ترکیا خوه ب پێشڤه برن و به‌رهه‌مێن خوه ب زمانێ ترکی ئافراندن. پرانیا وان قه‌هره‌مانێن وێ زیندانێ، پشتی ژ زیندانێ ده‌رکه‌تن، بوونه ئێخسیر و هه‌زکرن زمانێ ترکی.
وان نکاریبوون ئان نه‌خوه‌ستن د ڤی واری دا به‌رخوه بدن دا کو زمانێ وان نه‌مره. یا ژی فێم نه‌کرن کو زمانێ مله‌ته‌کی نه‌مینه ئه‌و مله‌ت ژی ئێدی وه‌که مله‌ت نامینه.
پارتیا کارکەرێن کوردستانێ (پەکەکە) ژ سالا ۱۹۸٤ێ و هێرڤە ب هه‌موو هێز و قوه‌تا خوه ژ بۆنا تێکبرنا کوردان و وێرانکرنا کوردستانێ کار دکه. هه‌موو هێژاییێن کوردان تێک برنه، زارۆک ب مالباتان را نه‌هشتنه. ژ بۆنا باشوورێ کوردستانێ نه‌به ده‌وله‌ته‌ک کوردی یا سه‌ربخوه، دگه‌ل داگیرکه‌رێن کوردستانێ ب هه‌می هێز و قووه‌تێن خوه تێدکۆشن. لێ تو دبینی پرانیا کوردان ژ وان حه‌ز دکن.
بارزانیان ئه‌ڤ سه‌د سالن ژ بۆنا ئازادی و سه‌رخوه‌بوونا کوردستانێ کار و خه‌باتێ دکن. د ڤێ رێیێ دا گه‌له‌ک قوربانی دانه. ب سایا قووه‌تا پێشمێرگه یێن قه‌هره‌مان، ل سه‌ر خه‌ت و رێبازا بارزانیێ نه‌مر، ب رێ و رێبازه‌که وه‌لاتپارێزی دخوازن کوردان بکن خوه‌دی ده‌وه‌له‌تا وان. لێ پرانیا کوردان ژ وان حه‌ز ناکن.
ب گۆتنه‌ک ڤه‌کری و زه‌لال کی پتر زلمێ ل کوردان بکه، کورد ژ وان حه‌ز دکه…
ده‌ما مرۆڤ دیرۆکا خوە، دیرۆکا کورد و کوردستانێ، دخوینه دبینه کو کوردان ژ بۆ خوه پتر هه‌ر ژ دژمنێ خوه را کار و خزمه‌ت کرنه. ژ خوه پتر ژ دژمنێ خوه، ژ سه‌رده‌ستێن خوه حه‌ز کرنه.
لۆما دڤێ ئه‌م ڤێ باش بزانبن و فێر ببن کو ده‌ما وه‌لاته‌ک تێ داگیرکرن، ئه‌و ده‌وله‌تا داگیرکه‌ر ب هه‌موو رێ و ئۆلاخێن د ده‌ستێ وان دا هه‌نه، ب کار تینن دا کو مه‌ژی، دیرۆک، بیر و باوه‌ریێن وی خه‌لکی ژی داگیر بکن و کرنه. ئه‌ڤ هێ ژی به‌رده‌وامه..
ژ به‌ر ڤێ یه داگیرکه‌ر تم زلمه‌که نه‌دیتی ل گه‌لێ کۆلۆنی دکن کو ب ترس و خۆفه‌ک مه‌زن بژین و ب ڤێ ژیانێ ژی ژ داگیرکه‌رێن خوه حه‌ز بکن. ئه‌ڤ حه‌زکرنا ب دارێ زۆرێ، ده‌م تێ ئێدی ئینسانێن وه‌لاتێ کۆلۆنی فێر دبن و پتر ژ زمان، هه‌بوون و مه‌زنێن داگیرکه‌رێن خوه حه‌ز دکن.
چاره‌سه‌ری؟ ته‌نها چاره‌سه‌ریا ڤێ ب دامه‌زراندنا ده‌وله‌ته‌کا کوردی دێ پێک بێ. هه‌تا ئه‌م کورد نه‌بن خوه‌دی ده‌وله‌تا خوه، ئه‌م دێ هه‌ر حه‌یرانێ داگیرکه‌رێن خوه بن. داگیرکه‌رێن مه ژی تم هه‌ول ددن کو ئه‌و سه‌رده‌ست و ئه‌م ژی بنده‌ست بن.
ژ بۆنا کو کورد بکاربن خوه ژ ڤێ مالوێرانیێ ئازاد بکن. دڤێ هه‌رکه‌س ژ نوو ڤە ده‌ست پێ بکە و دیرۆکا خوه، دیرۆکا گه‌لێ خوه فێر ببن. ب ڤێ فێربوونێ ژی دڤێ مه‌زنێن خوه یێن به‌رێ و نها کی/ێ ب راستی ژی ژ بۆنا کوردستانه‌کا سه‌ربخوه کار کرنه و دکن بناسن.
دیرۆک و ته‌کۆشینا وان سەرکردە و مه‌زنێن خوه فێر ببن. فێر ببن و ببینن کو ژ به‌ر چ کێماسیێ وان خوه ئازاد نه‌کرن؟ ژ بۆنا چ وان نکاریبوون ل هه‌مبه‌ر داگیرکه‌رێن خوه د بن سیوانه‌که نه‌ته‌وه‌یی دا ته‌کۆشینا ئازادیا گه‌لێ خوه بدن؟
