داخوویانیه‌ک ل سه ناڤێ کەجەکێ د مه‌دیایا پەکەکێ دا هاته ڕاگەهاندن. د ڤێ داخوویانیێ دا کەجەکێ گۆتارا سه‌رۆکێ هه‌رێما کوردستانێ نێچیرڤان بارزانی ڕه‌خنه دکه. کەجەکە د داخوویانیا خوه دا دبێژه:
ژ بۆ به‌رسڤا ل بانگا ئاشتی و جڤاکا ده‌مۆکراتیک ئا دیرۆکی یا ڕێبه‌ر ئاپۆ کو ۲۷ێ سباتێ دا، پەکەکێ کۆنگره‌یا ۱٢ه‌مین گرێدا، بریار دا و ئه‌ڤ یه‌ک ژ ڕایا گشتی یا جیهانێ را ڕاگەهاند. پەکەکێ د کۆنگره‌یا ۱۲ه‌مین دا بریارا خوه ئا‌شکه‌ره کر کو خوه هلوەشاندیە، هه‌ر وها ل سه‌ر بانگا ڕێبه‌ر ئاپۆ ستراته‌ژیا تێکۆشینا چه‌کداری گوهەرتیە بریارا چەکدانینێ دایە. ئنیەتا خوه یا ب بریارا ل پێشبه‌ری پێڤاژۆیێ ژی ب شه‌وتاندنا چه‌کان نیشان دا کو ب پێشه‌نگیا هه‌ڤسه‌رۆکا کۆنسه‌یا ڕێڤه‌به‌ر ئی کەجەکێ هه‌ڤرێ به‌سێ هۆزات کۆمه‌ک ژ ۳۰ که‌سی ۱۱ێ تیرمه‌ها ۲۰۲٥ان چه‌کێن خوه شه‌وتاند.“
ڕاسته، لێ گه‌لۆ ئه‌گه‌ر پەکەکێ خوه هلوەشاندیەه، کەجەکە چییه؟ پێویسته به‌رسڤا ڤێ پرسێ هه‌به. به‌سێ هۆزات ئه‌نداما ڕێڤه‌به‌ریا پەکەکێ یه و کەجەکێ یه. ئه‌ڤه ده‌هێ سالانا پەکەکە ب هه‌مان ته‌کتیکێ خه‌لکێ دخاپینه.
نێچیرڤان بارزانی ژ بۆ سه‌رکه‌تنا پێڤاژۆیا ده‌ستپێکری، گه‌له‌ک هه‌ولێن هێژا دده و هه‌تا ده‌ستپێکرنا ڤێ پرۆژه‌یێ ژی ڕۆلێ نێچیرڤان بارزانی سه‌ره‌که‌یه. لێ هوون ئه‌ڤێن کو ڤان داخوویانییا ده‌رتێخن و ل گۆرا ئاقلێ خوه یێ سڤک ڕه‌خنا دکن، هوون د ڤێ پێڤاژۆیێ دا نه‌درووستن. ژ به‌ر کو ئه‌ڤ پێڤاژۆ سه‌ربکه‌ڤه هوون دێ ل به‌ر لنگا هه‌رن و پاریێ دوهندایی کو هوون ل سه‌رناڤل کوردا دخون داوی دبه.
ڕۆژا کو پەکەکێ بریارا خوەهلوەشاندنێ دایی پێویست بوو ئالیێن کو پەکەکێ ڤه گرێدایێ وه‌ک ڕێخستن نه‌مینن. ئۆجەلان ب خوه گازندا ژ وه دکه. ئۆجەلان ڤه‌کری د هه‌ڤدیتنه‌کا خوه دا ژ کۆمیته‌یا ئیمرالی یا ده‌م پارتییێ را دبێژه: “قه‌ندیل هشێ خوه ونداکریه و ب ته‌مامی د بن باندۆرا ئیرانێ دا ته‌ڤدگه‌ره.“ ئه‌گه‌ر هنده‌ک ئه‌خلاق و که‌سایه‌تیه‌ک سیاسی یا وە هه‌به، که‌ره‌م بکن به‌رسڤا ئۆجەلان بدن.
به‌شه‌ک دن یێ داخوویانیێ دا قاشۆ کەجەکە دبێژه: “شاشتی و کێماسیه‌که مه‌زنه کو نێچرڤان بارزانی ب وه‌زیفه‌یه‌ک وه‌لێ ڕادبه کو وه‌که ‘ناکۆکی د ناڤبه‌را ڕێبه‌ر ئاپۆ و ته‌ڤگه‌را مه دا هه‌یه“ نیشان دده و هه‌ول دده تێگهشتنه‌ک وه‌لێ بئافرینه کو وه‌که “پەکەکە ل ڕێبه‌ر ئاپۆ گوهداری ناکه“ بده نیشاندان.
هوون ب خوه ژی باش دزانن کو، ناکۆکیه‌ک مه‌زن د ناڤبه‌را قه‌ندیل و ڕێبه‌رێ وه دا هه‌یه. هوون نکارن ڤێ ڤه‌شێرن. پێوه‌ندیێن هه‌رێما کوردستانێ ل گه‌ل ده‌وله‌تا ترکیێ ژ بۆ چ وه ئه‌وقاس ژ به‌رێ پتر ئاجز دکه؟ وه خوه بێ شه‌رت و مه‌رج ڕاده‌ستی ترکیێ کریه، هوون ب چ ئه‌خلاقه‌کی دکارن ژ بۆ ڤێ یه‌کێ سه‌رۆکێ هه‌رێما کوردستانێ ڕه‌خنه بکن؟ ئه‌و مه‌ژییێ کو هوون ب ده‌هان سالان ته‌ڤدگه‌رن و ل هه‌ر ده‌ڤه‌را هوون لێ، سیخوورتیا ده‌وله‌تێن داگیرکه‌ر دکن، هێدی داوی دبه. ناکۆکیا د ناڤ وه و ڕێبه‌رێ وه دا ژ ئالیێ ئۆجەلان ڤه ده‌هان جاران هاتیه گۆتن.
ژ بۆ وه یا باش ئه‌وه کو، هوون ڕابن ڕوونن سپاسیا نێچیرڤان بارزانی بکن. ئه‌وه کو، ئاشتیێ پێکتینه و هه‌ولدده کو پێڤاژۆیا ده‌ستپێکری سه‌ربکه‌ڤه. ژ به‌ر کو ئه‌و ل گۆرا به‌رژه‌وه‌ندیێن کوردستانێ ته‌ڤدگه‌ره و هوون ل گۆرا به‌رژه‌وه‌ندیێن داگیرکه‌ران ته‌ڤدگه‌رن. دێ ڕۆژوک هێت کو، هێدی یان هوون دێ ڕاستیا هه‌یی ببنن و سه‌ره خوه ژێ را چەمینن، یان ژی هوون دێ د ناڤا ڕاستیا ڕووپه‌لێن دیرۆکێ دا وندا ببن.
هوون نه ئه‌و وێره‌کن ڤه‌کری ئینکارا داخوازیا ڕێبه‌رێ خوه بکن، د ڕاستیێ دا ژی هه‌تا چ ڕاده‌یێ هوون ئۆجەلان وه‌ک ڕێبه‌رێ خوه دبینن ئه‌و ژی جهێ شکه‌ک مه‌زنه. لێ وه ل سه‌ر وێ یه‌کێ سیاسه‌تا خوه ئاڤاکریه.
ده‌م پارتی کو ئه‌و هه‌ڤدیتنا ل گه‌ل ئۆجەلان دکن، گه‌له‌ک باش ڕۆلێ سه‌رۆکێ هه‌رێما کوردستانێ د ڤێ پێڤاژۆیێ دا دزانن و هنده‌ک مناسه‌به‌تان دا گه‌له‌ک ڤه‌کری وه‌سفێ ڤێ ڕۆلا بارزانی دکن. لێ دخوه‌یێ پاشمایێن پککێ یان ژی ئه‌ڤێن پاتەخوه‌ر ژ بۆ بکاربن بابه‌ته‌کی ببنن ڕه‌خنه‌یێن ژ خوه مه‌ستر دکن. ئه‌ڤ هه‌لوه‌ستا کەجەکێ ب خوه خەتماندنا ڤێ پێڤاژۆیێ یه.
