ئه‌م هه‌موو دزانن، دبینن و د حه‌سره‌تا وێ یه‌کێ دانه کو ڕۆژه‌کێ هه‌ما بهوسته‌کا عه‌ردا کوردستانێ یا هاتیه داگیرکرن، ئازاد ببه. لێ مه ئه‌ڤ ئازادی ل باشوورێ کوردستانێ دیت.
داگیرکه‌رێن مه هار و هۆڤن. کوژه‌ر و بێ ئیمانن. چ ده‌مێ چ ژ ده‌ستێ وان هاتیه، ل ڤێ جیهانێ چ تشتێن خه‌راب هه‌بوو، هه‌نه، ئانینە و تینن سه‌رێ گه‌لێ مه.
دژمنێ مه هندی هۆڤ و هارن، ئێدی نه ته‌نێ ژ کوردان، ژ که‌ڤرێن وان، ژ ئاڤا وان ژ حه‌یوانێن وان، جهێ وان یێ دیرۆکی ژی دترسن و ب ترسن.
ترسا وان ئه‌وه کو ته‌نێ ئه‌و و کورد دزانن کو چ ئانینه سه‌رێ مه، چ ژ مه کرنه ئه‌م خستنه چ حالی. دیسا ئه‌و و ئه‌م دزانن کو وێ ئه‌ڤ کرنێن وان ژ وان ڕا نه‌مینه.
ژ به‌ر ڤێ ترس و خۆفێ یه کو چرووسکه‌ک ژ بۆنا ئازادی، ڕه‌حه‌تی و سه‌ربه‌ستیا کوردان ل کودەرێ پێکه‌ڤه ئه‌و هه‌ما ئێریشی سه‌ر وێ دکن و دخوازن وێ چرووسکێ بته‌مرینن و ڤه‌مرینن. وێ ژی دکن کرنه ژ به‌ر کو ئه‌م بێ ده‌وله‌تن، هه‌گه‌ر ده‌وله‌تا مه هه‌با دێ وان نکاریبانا ئه‌ڤ بکرانا.
لێ هه‌ر کوردان و تایبه‌تی ژی بارزانیان به‌رخوه دانه و خوه‌ستنه وێ چرووسکا ژ بۆنا ئازادیا کوردان پشتی تێکچوونا کۆمه‌را کوردستانێ ل مھابادێ، وێ شه‌ڤره‌شا گرتبوو سه‌ر مله‌تێ مه، وێ بێهیڤی و بێ مۆرالیا گرتبوو سه‌ر کوردان ب گوله‌یا شۆره‌شا ئیلۆنا ڕاکرن و ب شۆره‌شا گولانێ هات خه‌ملاندن.
ئه‌و ڕۆژ و ئه‌ڤ ڕۆژه ژ بۆنا چه‌نه‌ک ئانگۆ مسته‌ک عه‌ردا ئازاد به‌رخوه‌دان و سه‌ریهلدانا کوردان و تایبه‌تی یا بارزانیان نه‌سه‌کنی یه هه‌تا کو ژ بۆنا مه کوردان پارچه‌کا کوردستانێ ئازاد کرن.
نها ئه‌و پا‌رچێ ئازاد ئانگۆ باشوورێ کوردستانێ گاڤ ب گاڤ به‌ر ب ئازادی و سه‌رخوه‌بوونێ ڤه دچە. له‌ورا ژی هه‌ر پێشکه‌تنه‌کا ل باشوورێ کوردستانێ، دبه ئه‌و ڕۆنیا خوه دده پارچێن دن ژی.
ئه‌و ڕۆنی هێز و قوه‌تێ دده پارچێن نه ئازادکری دا کو ئه‌و ژی ڕۆژه‌کێ بگەهەن ئازادیا خوه. ژ بۆنا ڤێ یه‌کێ یه کو هه‌ر پێشکه‌تنه‌ک، هه‌ر گوهه‌راندنه‌ک و هه‌ر گاڤه‌کا به‌ر ب سه‌رخوه‌بوونا کوردستانێ ڤه، ژ بۆنا هه‌می کوردان هێژا و گرنگه.
ژ به‌ر ڤێ گرنگیێ یه کو دڤێ هه‌موو کورد ب هه‌ر حال و ئاوایی پشتگریا باشوورێ کوردستانێ بکن. هه‌تا ئه‌م نه‌بن ده‌وله‌ت، ئه‌م دێ هه‌ر بێ ڕوومه‌ت بن.
بێ ده‌وله‌تی، مرنه، بێ ده‌وله‌تی سێوێتیه، بێ ده‌وله‌تی ته‌نێبوون و هوستوواری یه. ژ بۆنا ئەڤ ژ سه‌ر مه ڕابن دڤێ ئه‌م ژی وه‌که هه‌موو خه‌لکێ جیهانێ ببن خوه‌دی ده‌وله‌تا خوه.
ژ به‌ر ڤێ یه دڤێ ئه‌م ژی پشتگریا حکومه‌تا خوه یا ب سه‌رۆکتیا ڕێزدار مه‌سروور بارزانی هاتیه دامه‌زراندن بکن. ئالیکاری و پشتگریا وێ دێ مه ڕۆژ ب ڕۆژ به‌ر ب ئازادی و سه‌رخوه‌بوونێ ڤە ببه. وێ ژ پارچێن دن ڕا ژی ببه ده‌سته‌ک.
له‌ورا ئه‌ز دبێژم؛ ئه‌م گهشتن قۆناغا تالی؛
به‌لێ ئه‌م کورد ل سه‌ران سه‌رێ جیهانێ ل به‌ندا ڤێ ڕۆژا پیرۆز بوون کو حکومه‌تا هه‌رێما کوردستانێ ب سه‌رۆکاتیا ڕێزدار مه‌سروور بارزانی بێ ڕاگەهاندن.
ب ڤێ نووچه و خه‌به‌را خوه‌ش، ئێدی سه‌رخوه‌بوونا کوردستانێ ل سه‌ر چیایێ ئاگری د شه‌ڤره‌شا تاری دا وه‌که فنده‌کێ پێ که‌ت.
ئێدی کار و بارێ حکومه‌تا نوو یا کوردستانێ وێ ببه ژ بۆنا ڕۆژا ڕاگەهاندنا سه‌رخوه‌بوونا کوردستانێ و خزمه‌تا گه‌لێ خوه.
ئه‌ز سه‌رۆکوه‌زیرێ کوردستانێ و حوکومه‌تا وی پیرۆز دکم. ئه‌م دێ ل به‌ندا وێ ڕۆژا خه‌به‌را خوه‌ش بن کو ئێدی وێ ئالا کوردستانێ ژی د ناڤا ئالا جیهانێ دا وه‌که سه‌مبۆلا کوردستانا سه‌ربخوه کل ببه.
پیرۆز به ل گه‌لێ مه ئه‌ڤ ڕۆژا خوه‌ش،
پیرۆز به ل گه‌لێ مە ئه‌ڤ حکومه‌تا به‌ختخوه‌ش
پیرۆز به ئه‌ڤ ئه‌رکێ نوو ل سه‌رۆکوه‌زێری مه یێ دلخوه‌ش ڕێزدار مه‌سروور بارزانی
بووبێ ئه‌سه‌ر
2019.07.11
