گۆتارا سه‌رۆکێ مەهەپێ، ده‌ڤله‌ت باخچه‌لی، ڕۆژه‌ڤا ترکیێ و باکورێ کوردستانێ ب ته‌مامی گوهه‌رت، نرخاندن و شرۆڤه‌یێن ل سەر گۆتێن باخچەلی به‌رده‌وامن. باخچه‌لی بانگی ئۆجەلان کربوو و گۆتبوو: “ئۆجەلان بلا ده‌رکه‌ڤه و دیار بکه کو ته‌رۆر قه‌دیا یه و پەکەکە هاتیه هلوه‌شاندن.”
پارله‌مه‌نته‌رێ به‌رێ یێ هەدەپێ، ئالتان تان، د هەڤپەیڤینەکە خوە دا دگەل رۆژنامەڤان گۆکسه‌ل گۆکسو سه‌ر پرسا “گه‌لۆ ب بانگا ئۆجەلان دێ چه‌ک بێن بێدەنگ کرن” تان به‌رسڤا خوه ده دبێژه: “ژ سه‌دی ۱۰۰ نه مومکنه کو خوه‌دی ل بانگا ئۆجەلان ده‌رکه‌ڤه. بلا ئه‌م بنێرن که‌سێن کو ٤۰ سالن پۆسته‌رێن ئۆجەلان هلدگرن وێ گوه بدن گۆتنێن وی یان نا.”
گه‌لۆ پەکەکە دێ چه‌کێن خوه ده‌ینه؟
ئالتان تان، بال کشاند کو پرسگرێک نه هه‌رێمی یه و ده‌ستنیشان کر کو پرسگرێک نه ته‌نێ پرسگرێکا ترکیه‌یێ یه و گۆت: “ئەمریکا، ڕووسیا، ئیران، ئه‌لمانیا و ئیسرائیل ژی د ناڤا ڤێ دا نه. یێن کو ب دانینا چه‌کان تێر دبن هه‌نه، یێن کو تێر نابن ژی هه‌نه. ئه‌و دێ تێر نه‌بن، ژ بۆ کو چه‌کان نه‌دن ده‌ست، ب قه‌ندیل، پەکەکێ و پێکهاته‌یا وێ یا ل ئه‌ورۆپایێ و سازیێن وێ یێن حقووقی یێن ل ترکیه‌یێ دێ بکه‌ڤن ناڤا مانیپولاسیۆنێن گران. ژ به‌ر ڤێ یه‌کێ ئه‌و دێ ببێژن بلا چه‌ک نه‌یێن دانین. ب گۆتنه‌ک کورتتر، پەکەکە نکاره ل سه‌ر بانگا ئۆجەلان چه‌کان ده‌ینه.”
تان د به‌رده‌واما نرخاندنا خوه دا گۆت: “هنده‌ک ئالیێن دن ژی هه‌نه، لێ بلا ئه‌و، ئۆجەلان، بانگ بکه. و بلا ئۆجەلان نه‌خشه‌یا ڕێ ئه‌شکه‌ره بکه. کا ئه‌م بنێرن کی ئالیگرێ بێده‌نگکرنا چه‌کانه و کی ئالیگرێ دۆماندنا ڤێ ڕه‌وشێ یه؟ ئه‌ز ژ بۆ ئه‌نقه‌ره‌یا کوور، ژ بۆ پەکەکێ و ژ بۆ هێزێن ل پشت پەکەکێ دبێژم. “وه‌رن ئه‌م ب ڤه‌کری ل پرسێ بنێرن بلا ڕاستی ده‌رکه‌ڤه هۆلێ، ئه‌م دێ هنگێ ببینن کا کی چ دکه..”
