ئه‌م هه‌موو دبینن و دبهیزن کا ل هه‌رێمێ چ دقه‌ومه و بوویه‌ر چقاس ب لەزگینی ل په‌ی هه‌ڤ تێن، ئه‌وقاس ب لەزگینی بوویەر دقەومن کو مرۆڤ نکاره وان ب دروستی فام بکه و پاشه‌رۆژێ پێشبینی بکه کا دێ چ بقەومە..
بێ گومان، تشتێن کو ل دۆرا مه و نێزیکی مە کوردان دقه‌ومن، ئەم بخوازن یان نەخوان، باندۆر ل سەر مه هەیە و دێ هەبە، چ ڕاسته‌راست ئان نه‌راسته‌راست. ژ به‌ر هندێ کورد ئیرۆ ژ دوهی پتر هه‌وجه‌یی ب یەکرێزی، یەکگۆتاری و یەکرەفتاریێ هەیە.
نه هه‌وجه یه کو ئه‌م “کایا که‌ڤن ل با بکن”، کی ئه‌م دفکرن ڕاسته و کی ئه‌م دفکرن خه‌له‌ته. ئه‌و ئاوایێ هزرکرنێ دێ مه نه‌گهینه چو ئه‌نجامێن باش. چێتره کو ئه‌م د ئیرۆ دا بژین و ل گۆری پێشهات و بوویه‌ر و شه‌رت و مه‌رجێن ئیرۆ بفکرن و پلان بکن.
ئه‌ز باوه‌ر دکم کو ئیرۆ، ژ هه‌ر ده‌مێ پتر، ژ هه‌ر قۆناغه‌کا دن پتر، کوردا پێدڤی ب مەرجەعەک نەتەوەیی سیاسی هەیە، مەرجەعەک کو پێرا بهێتە شێورکرن، گوهداری کرن و پێ باوه‌ر بن.
ئیرۆ، ڕه‌وش مناسبە ژ بۆ هندێ کو ڕێبه‌ره‌ک کو بەرێ کێم-زێدە پرس پێ هاتیە کرن و شیره‌تا وی هاتیه بکار ئانین، ڕێبه‌ره‌ک کو وه‌لاتێن هه‌رێمی و بیانی حسابێ بۆ دکن و گوهدارییا وی دکن، ڕێبه‌ره‌ک کو د ناڤه‌ندێن سیاسی دا گرانییا وی هه‌یه وەک مەرجەعەک بهێتە دەستنیشان کرن.
ئه‌م هه‌موو دزانن کو ڤێ داویێ و پشتی هلوه‌شینا ڕه‌ژیما به‌شار ئه‌سه‌د، گه‌نه‌رال مەزلوم عه‌بدی سه‌ردانا برێز مه‌سعود بارزانی کر و پرس ژێ کرن و ب هه‌ڤ را کارین پرسگرێکا د ناڤبه‌را پارتییێن ڕۆژاڤایێ کوردستانێ دا چاره‌سه‌ر بکن کو ێیرۆ کوردێن وێ پارچەیێ یەکرێز و هەڤگرتی نە و ل هەمبەر دەستهەلاتا سووریەیێ یەکدەنگ و یەکهەلوەستن.
پرۆژه‌یا ئاشتیێ ل باکورێ کوردستانێ به‌رده‌وام دکه و ئه‌م هه‌موو دزانن کو برێز مه‌سعود بارزانی د ڤێ پێڤاژۆیێ دا ڕۆله‌که ب باندۆر لیستیه. ئه‌م هێڤی دکن کو ئه‌ڤ پرۆژه سه‌رکه‌فتی به و پرسگرێکا کورد ل وێ پارچەیێ ب ئاوایه‌کی ئاشتیانه چاره‌سه‌ر ببه. دیسا، ئه‌م دزانن کو برێز عەبدولا ئۆجەلان خوه‌ستیه کو برێز مه‌سعود بارزانی ببینە، کو ئه‌ڤ گاڤه‌ک ئه‌رێنی یه ژ بۆ پرسیارکرن، دانووستاندنا نێرین و شیره‌تان، کو ئه‌ڤ گاڤه‌که مه‌زن تێ حه‌سباندن.
د ده‌ربارێ کوردێن ڕۆژهلات دا، ئه‌م هه‌موو دبینن کا ئیران د چ رەوش دا ده‌رباس دبە و پێشبینیکرنا پاشه‌رۆژا ڤێ ڕه‌ژیمێ نه هێسانه، لێ د هه‌ر ڕه‌وشێ دا دێ پارتییێن ل وێرێ ژی دێ هه‌وجه‌یێ شیره‌ت و ئالیکاریا بارزانی بن.
ژ به‌ر ڤێ یه‌کێ، تشتێ کو پشتی مرنا مام جه‌لال گونجاو بوو بهێتە کرن و نه‌هاتە کرن، نها پر گونجاوتر، گرینگتر و پێویستتره، ئەو ژی هه‌بوونا مه‌رجه‌عەکی یە، هه‌م ژ بۆ کوردێن باشوور و هه‌م ژی ژ بۆ کوردێن پارچەیێن دن ئێن کوردستانێ.
ژ بەر هندێ ئەز دبێژم:
به‌لێ، ژ بۆ کو برێز مه‌سعود بارزانی ببه مەرجەعەکێ کورد، نه سبێ، لێ ئیرۆ.
برێز مه‌سعود دکاره وه‌کی سه‌رۆکێ پارتییا ده‌مۆکراتا کوردستانێ (پەدەکە) بمینه، لێ چێتره کو ژ سه‌رۆکاتیتا پەدەکێ ئیستفا بکه هینگێ دکارە وەکە کەسەک بێتەرەف بە و دێ زێدەتر ببە جهێ باوەرییا حزبان و دێ باشتر گوهداریا وی بکن دێ باشتر مفا ژ شیرەتێن وی هێتە وەرگرتن.
