پارتیا كاركەرێن كوردستانێ (پەكەكە) ل کوردستانا باشوور خوه ژ چیا دده ئالیه‌کی و د ناڤا گوندا دا و ل ده‌ڤه‌رێن کو خه‌لکێ سڤیل لێ دژین بنگه‌هێن خوه ئاڤا دکه و خه‌لکێ سڤیل یێ ده‌ڤه‌رێ ژ خوه‌ره دکن مه‌رتال. گه‌له‌ک جارا ترکیێ ل کوردستانا باشوور ده‌ڤه‌رێن کو پەکەکە لێ ھەیە بۆمبه‌باران کریه و زه‌ره‌ره‌ک مه‌زن ل خه‌لکێ سڤیل دایه ، مال و جانێ وان هاتنه ژ ده‌ستدایین.
بوویەرا ھەری داوئیێ ل 26ێ ڤێ مه‌هێ دا، باله‌فرێن ترکیێ ده‌ڤه‌رێن جودا یێن ئامێدیێ بۆمبه‌باران کرن، د ئه‌نجاما ڤان بۆمبه‌بارانان ده 4 هه‌موه‌لاتیێن سڤیل ژیانا خوه ژ ده‌ست دان.
ل سه‌ر ڤێ بوویه‌رێ به‌رپرسێن حوکومه‌تا کوردستانێ داخویانی به‌لاڤ کر ود داخویانیا خوە دا ل ھەمبەر وان بوویەران و شەھیدبوون وو بریندارا بوونا خەلكێ سڤیل دلگرانیا خوه دیار كر.
ل شێلادزێ خوه‌پێشاندان ل دژی بۆمبه‌بارانا ده‌ڤه‌رێن وان ژ ئالیێ ترکیێ ڤە برێڤه چوو، خوه‌پێشانده‌ر چوونه ناڤ سه‌ربازگه‌هه‌کا ئارتێشا ترکیێ یا ل ڤی سینۆری و د ئه‌نجامێ ده 2 که‌سان ژیانا خوه ژ ده‌ست دانه و 16 که‌سێن دن بریندار بوون.
د ڕاستیا خوه ده پەکەکە گه‌له‌ک ب زانه‌بوون ل کوردستانا باشوور پراڤاکاسیۆنا دکه. پەکەکە ژ ئالیه‌کی ڤه ل ده‌ڤه‌رێن وه‌ک شنگالێ ل گه‌ل حه‌شدا شه‌عبی ته‌ڤدگه‌ره و ژیانێ ل خه‌لکێ ده‌ڤه‌رێ دکه ژه‌هر و ژ ئالیه‌ک دن ڤه ژی ل سه‌ر ناڤێ پاراستنا هنده‌ک ده‌ڤه‌ران ل باشوورێ کوردستانێ پرۆڤاکاسیۆنا دکه.
هه‌تا وه‌ک ئیرۆ ب سه‌دان گوند نێزکی سنۆرێ ترکیێ د بن باندۆرا پەکەکێ ده‌نه و پەکەکە خه‌لکێ ڤان ده‌ڤه‌ران ئیداره دکه. ب سه‌دان گوند ژ ترسا پەکەکێ نه‌هاتنه ئاڤا کرن.
ترکیا به‌رده‌وامی ب هێجه‌تا ھەبوونا پەکەکێ، ئێریشا دبه سه‌ر باشوورێ کوردستانێ. خه‌لکێ سڤی دبن ئارمانجا ئێریشا و ژیانا خوه ژ ده‌ست ددن.
گه‌لۆ چ ئارمانجا پەکەکێ ل باشوورێ کوردستانێ هه‌یه؟ ئه‌گه‌ر مرۆڤ شوونڤه هه‌ره و نرخاندنه‌کی ل سه‌ر ڕه‌وشا پەکەکێ ل باشوور بکه، دێ د ده‌ربارێ پەکەکێ ده خه‌له‌تیا ئالیێن سیاسی ل باشوورێ کوردستانێ زه‌لالتر ببینه و هه‌روه‌ها بوویه‌رێن ئیرۆ ڕووددن باشتر فام بکه.
پەکەکە ل گه‌له‌ک ده‌ڤه‌رێن باشوورێ کوردستانێ بجھ بوویه و ژ چیان هه‌تا باژاران که‌تیه ناڤا خه‌لکێ کوردستانێ و بێ قانوونی کار و خه‌باتێ دکه و دبه سه‌ده‌مه‌ک بنگه‌هین کو باشوورێ کوردستانێ دکه‌ڤه د بن ته‌هدیتا هنده‌ک وه‌لاتان دا. بێ گومان ئالیێن سیاسی د ڤێ ده‌ربارێ ده ڕه‌وشا هه‌یی باش دزانن لێ مخابن ده‌ستهلاتداریا کوردستانێ د ڤێ ده‌ربارێ دا ته‌دبیرێن پێوست ناگره.
د ڤێ ده‌ما داوی ده بوویه‌رێن د ناڤبه‌را پەکەکێ و یەكێتیا نشتمانیا كوردستانێ (یەنەکێ) دا تێنه زانین. پەکەکە ڤه‌کری یەنەکە ب ئێریشکرنا سەر سلێمانیێ تەھدید کر. ده‌مه‌ک درێژ پارتیێن وه‌ک گۆران و یەنەکێ د بن باندۆرا پەکەکێ دا ل دژێ پارتیا دەمۆكرتا كوردستانێ (پەدەک)ێ سیاسه‌ته‌ک قرێژ دمەشاندن. نها ژی خه‌لکێ کوردستانێ باجا ڤێ سیاسه‌تێ ددە.
پەکەکێ ل باکورێ کوردستانێ گونده‌ک ب ته‌نێ ژی ئازاد نه‌کریه. گه‌لۆ دێ چه‌وا باشوورێ کوردستانێ ئازاد بکه؟ ده‌ما پەکەکە به‌حسا پاراستنا ئاخا کوردستانێ دکه ئارمانجا وان ئه‌وه کو باشوورێ کوردستانێ ژ بن ده‌ستهلاتداریا کوردستانیان ده‌رێخه و پێشکێشی داگیرکه‌ران بکه.
نها تشتا کو پەکەکە ل ڕۆژاڤایێ کوردستانێ دکه ئه‌ڤه. هه‌روه‌ها ده‌ڤه‌را شنگالێ نموونه‌یه‌ک گه‌له‌ک به‌رچاڤه. هه‌تا کوردێن باشوور ڤێ ڕاستیا پەکەکێ نه‌بینن و وه‌ک ئالیه‌ک کوردستانی ل گه‌ل پەکەکێ پێوه‌ندیان ده‌ینن ، دێ خوساره‌تەک مه‌زن ببینن و هه‌روه‌ها پەکەکە دبه ئاسته‌نگا هه‌ری مه‌زن د ڕێیا ده‌ستخستنا مافێن گه‌لێن کوردستانێ و تایبه‌تی سه‌رخوه‌بوونا کوردستانێ دا.
مخابن ل باشوورێ کوردستانێ گه‌له‌ک سه‌مپاتزانێن پەکەکێ د ناڤا ئالیێن سیاسی دا هه‌نه. هه‌روه‌ها مه‌دیا باشوور د بن باندۆرا سیاسه‌تا پەکەکێ دا گه‌له‌ک دمینه و ل گۆرا ڤێ ژی گه‌له‌ک وه‌شانا دکه. ئه‌گه‌ر هون به‌رێ خوه بدن وه‌شانێن مادیا باشوور به‌شێ لاتینی ئه‌ڤ یه‌ک گه‌له‌کی ڤه‌کری خوویا دکه.
مخابن ژ بۆ پشتگریا پەکەکێ پێشبرکی د ناڤبه‌را هنده‌ک ئۆرگانێن مه‌دیایێ ده ل باشوور هه‌یه.
پەکەکە ژ بۆ ده‌ستکه‌فتیێن باشوورێ کوردستانێ ته‌هدیته‌که. ئەو قەد ژبۆ كوردستانێ كار ناكن و چ ستراتەژیا وان ژبۆ كوردستانی ژی نینە. ئه‌و هه‌ر ل دژێ ده‌ستکه‌فتیێن نه‌ته‌وی شه‌ر دکن و پراڤاکاسیۆنان دکن.
بوویه‌رێن ل شێلادزێ قەومین پراڤاکاسیۆنه‌ک یا پەکەکێ گه‌له‌ک ب زانه‌بوونه. د ڤێ ده‌ربارێ ده پێویسته حوکومه‌تا کوردستانێ چاره‌سه‌ریه‌ک ڕادیکال ببینه . ب ڤێ چاره‌سه‌ریێ هه‌م ژیانا خه‌لکێ سڤیل ژ خه‌ته‌ریێ خلاس دبه و هه‌م ژی پراڤاکاسیۆنێن پەکەکێ ڤاله ده‌ردکه‌ڤن.
ئه‌گه‌ر ل باشوور د ده‌ربارێ ڕه‌وشا پەکەکێ دا هنده‌ک گاڤ نه‌ھێن ئاڤێتن، دێ د پاشه‌رۆژێ دا زیانێن مەزنترچێببن. هه‌روه‌ها دێ سبه‌هی ژ بۆ ئاڤێتنا هنده‌ک گاڤان ده‌ره‌نگ به.
