کوردستانێ سه‌لماند کو ده‌ستتێوه‌ردانا ڕزگارکه‌ر دکاره سه‌رکه‌فتی به
نڤیسینا: نێچیرڤان بارزانی
ڤه‌کشینا ب له‌زگین یا وه‌لاتێن ڕۆژاڤا ژ ئەفگانستانێ جاره‌که دن ده‌ریێ گۆتوبێژان ل سه‌ر ده‌ستتێوه‌ردانا لیبه‌رال ڤه‌کر ڤه. ڕاستیه‌ک هه‌یه کو گه‌له‌ک جاران ئه‌ڤ گۆتوبێژ وێ ڕاستیێ ل به‌ر چاڤ ناگرن، ئه‌و ژی ئه‌وه کو هه‌موو ده‌ستتێوه‌ردان نه‌شاشن.
ئه‌و پێنگاڤا کو بریتانیا، ئەمریکا، فرانسا و وه‌لاتێن دن د سالا 1991ێ دا ل کوردستانێ ئاڤێتین ب سه‌دهه‌زاران هه‌ڤوه‌لاتیێن مه ژ کوشتنا ل سه‌ر ده‌ستێ سه‌دام حسێن ڕزگار کرن.
پرۆسه‌سا هشارا ئارام کو هزرا جۆن مێجه‌ر بوو، پشت ڕا بوو هه‌رێما دژه‌فرینێ و ده‌ما 12 سالان کوردستان پاراست. ڤێ یه‌کێ ژی ژ بۆ ئه‌نجامدانا هلبژارتن و دامه‌زراندنا په‌رله‌مانتۆ و سازیێن هکوومی و هێزا له‌شکه‌ری (پێشمه‌رگه) یا شه‌ری کو به‌رده‌وامیێ ب ئه‌رکا خوه بده ئاقاره‌ک و ئاساییشه‌کا ڕێژه‌یی ڕه‌خساند. ده‌ما کو د سالا 2003ێ ژی دا ئیراق ئازاد کر، مه ژنووڤه ده‌ست ب ئاڤادانکرنا وان هه‌زاران گوندێن ب ده‌ستێ بەعسیان هاتینه وێرانکرن کر، هه‌روه‌سا کوردستانێ دامه‌زراندنا پیشسازیا نه‌فتێ و بازارێ ئابۆریا پێشکه‌فتی دامه‌زراند.
ب کورتی، ده‌ستتێوه‌ردانا به‌ری 30 سالان ئاقارێ بنیاتدانان ده‌وله‌تا مە ئافراند.
ئیرۆ گه‌لێ کوردستانێ و بریتانیایێ هه‌ڤالبه‌ندێن بهێزێن هه‌ڤدونه، د وارێ بازرگانیێ دا هه‌ڤبه‌شن و د شه‌رێ دژی ته‌رۆرێ دا هه‌ڤپه‌یمانن. سه‌ردانا من د ڤێ هه‌فتیێ دا بۆ بریتانیایێ ژ بۆنا بلندراگرتنا وێ هه‌ڤبه‌شیا بهێزه کو ژ ڤه‌به‌رهه‌مانینا بریتانیایێ ل کوردستانێ ڕه‌نگڤه‌دایه دگه‌ل خوه‌سته‌کا گێنجێن مه ژ کور و که‌چان کو ل زانینگه‌هێن بریتانیایێ بخوینن و هه‌بوونا ڕه‌ڤه‌نده‌کا کوردی یا پێگه‌هشتی ل سه‌رتاسه‌ری بریتانیایێ.
لێ به‌لێ هێشتا شه‌رێ مه یێ هه‌ڤبه‌ش ل دژی ته‌رۆرێ ب داوی نه‌هاتیه و پێویستیا مه ب به‌رخوه‌دانه‌کا ستارته‌ژیک هه‌یه.
هاتا نها ژی ڕێخستنا ده‌وله‌تا ئیسلامی (داعیش) ل ئیراقێ و سوریه‌یێ و جهێن دن چالاکه. وه‌ک چه‌وا مه دیت تالیبان ل به‌ندێ بوو هه‌تا کو هێزێن ل دژی وێ ژ ئافگانستانێ ڤه‌کشن، داعیش ژی نه یا بله‌زە خوه ته‌سلیم بکه یان ژی بره‌ڤه.
پێشمه‌رگه دگه‌ل هێزێن ئیراق و وه‌لاتێن ڕۆژاڤا ل سه‌ر به‌رهنگاربوونا ڤان گه‌فان به‌ردوامن، ژ به‌ر کو پاشەرۆژا مه و ئاساییشا هه‌ڤپه‌یمانێن مه کو د ناڤ مالا خوه دا گۆرزێن جه‌رگبر ژ ده‌ستێ ته‌رۆرێ تامکرنه، پشت ب وێ به‌رخوه‌دانێ دبه‌ستن.
کوردستان دکه‌ڤه خه‌تا پێشیێ یا ڕووبرووبوونا د ناڤبه‌را ئازادی و خوه‌فه‌رزکرنێ، و هێڤی و تاریێ دا. گرووپێن توندره‌و و ته‌رۆریست گه‌فان ل مه و ئاوایێ ژیانا مه دکن. لێ به‌لێ ته‌ڤێ ڤێ ژی ئه‌م دێ هه‌ر وه‌ک هشاره‌کا ئارام و هێلینا لێبهورینێ و هه‌ڤدوقه‌بوولکرنێ بمینن. مه پێشوازی ل نێزیکی یه‌ک ملیۆن په‌نابه‌رێن سوریه‌یێ و کۆچبه‌رێن ئیراقێ یێن ژ ده‌ستێن داعیشێ ڕه‌ڤیان کر کو ئه‌گه‌ر مه ده‌ریێن خوه ل پێشیا وان نه‌ڤه‌کربان دا چاره‌نڤیسا وان یان کوشتن بوو یان کۆچا ب کۆمه‌ل بۆ وه‌لاتێن ئه‌ورۆپایێ بوو.
ئه‌م پێشوازیێ ل هه‌موو بیرووباوه‌ران دکن و هه‌موو ئایینان د هه‌وینن؛ کریستیان، ئێزدی و مسلمان و هه‌موو ئۆلێن دن.
گۆتوبێژ ل سه‌ر ئەفگانستانێ دێ به‌رده‌وام بن، لێ به‌لێ ده‌ستتێوه‌ردانا د کوردستانێ دا ژ بۆ بریتانیایێ و ته‌ڤایا مرۆڤاتیێ سه‌رکه‌فتن بوو. کا چه‌وا پێویسته ژ شاشیێن ئالیه‌کی فێر ببین و عیبره‌تێ ژێ وه‌ربگرین، ئھا وه‌سا گرنگه سه‌رکه‌فتنا ئالیێ دن ژی بلند بنرخینین.
ڕۆژنامه‌یا، تایمز
