رۆژا ۱٦ێ ته‌باخێ سالا ۱۹٤٦ێ پارتییا ده‌مۆکراتا کوردستانێ ب سه‌رۆکاتیا بارزانی یێ نه‌مر هاته دامه‌زراندن. ژ وێ رۆژێ هه‌تا وه‌ک ئیرۆ پارتی، ژ بۆ ده‌ستخستنا مافێن نه‌ته‌وی یێن کوردان خه‌باتێ دکه.
بێ گومان گه‌له‌ک رۆژێن دژوار، نه‌خوه‌ش و ده‌راڤێن ته‌نگ د ژیانا سیاسی یا پارتیێ دا چێبوونه. لێ هه‌روه‌ها گه‌له‌ک گاڤێن دیرۆکی کو بوونه سه‌مبۆلا ده‌ستکەفتیێن نه‌ته‌وی ژ ئالیێ پارتیێ ڤه هاتنه ئاڤێتن. یەک ژ دەستکەفتیێن هەری گرنگ و مەزن رێکەفتنا ١١ێ ئادارا سالا ١٩٧٠ ێ یە کو، باشوورێ کوردستانێ مافێ ئۆتۆنۆمی وەرگرت و باندۆرەکا ئەرێنی ل سەر پارچەیێن دی یێن کوردستانێ ژی کر،
ژ هه‌میێ گرنگتر بارزانی یێ نه‌مر، ب خه‌باتا خوه، بیر و باوه‌ریا خوه، ئالیێ خوه یێ سیاسی و له‌شکه‌ری، که‌ساتیا خوه، ب دپلۆماسیا خوه یا بلند و ب که‌سایه‌ت، ژ هه‌میێ گرینگتر، ب کوردبوونا خوه بوو رێبازه‌ک ژ بۆ ته‌کۆشه‌رێن کوردستانی. ئه‌و رێبازه کو ئیرۆ دهێلە کورد ل ده‌ستکه‌فتیێن خوە یێن نه‌ته‌وی خوه‌دی ده‌ردکه‌ڤن، ئه‌و رێبازه کو دهێله پێشمه‌رگه یێن قه‌هره‌مان خاکا کوردستانا ئازاد دپارێزن.
دیرۆکا سیاسی یا پەدەکێ بویە دیرۆکا ته‌ڤگه‌را ئازادیخوازا کوردستانێ ب خوه ژی. شۆره‌شا ئیلۆنا پیرۆز ب سه‌رۆکاتیا بارزانی یێ نه‌مر یه‌که‌م شۆره‌شا نه‌ته‌وی بوو. ڤێ شۆره‌شێ ل هه‌موو ده‌ڤه‌رێن کوردستانێ کورد هه‌موو ل دۆرا خوه جڤاندن و تۆڤێ خه‌باتا نه‌ته‌وی ل هه‌موو به‌شێن کوردستانێ ره‌شاند.
بێ گومان د دیرۆکا پەدەکێ دا گه‌له‌ک شاشی ژی پەیدا بوونه. لێ ده‌ما مرۆڤ سه‌ده‌ما ڤان شاشیان باش دنێرخینه تشته‌ک ڤه‌کری ده‌ردکه‌ڤه هۆلێ کو ئەو ژی ئەوە کو، هه‌ر گاڤا ژ رێبازا بارزانی یێ نه‌مر هاتیه دوورکه‌تن خه‌له‌تی چێبوویه. هه‌ر گاڤا کادرۆ یان ژی ئه‌ندامێن پارتی ژ دەرڤەیی رێبازا پیرۆز تشته‌ک کرنه یان ژی ئه‌و رێباز پشتگوهێ خوه ڤە ئاڤێتنه راستی شاشیان بوونه. ئیرۆ جاردن پاراستنا خاکا ئازاد یا کوردستانێ ب تێگەهاندنا رێبازا بارزانی ب گیانه‌ک نه‌ته‌وی تێ کرن.
ده‌ما مرۆڤ د رۆژا مه دا ره‌وشا پارتیێ باش بنرخینه گه‌له‌ک کێماسیان د ناڤا به‌شه‌ک کادرۆ و که‌سایه‌تیێن د ناڤ پارتیێ دا دبینه. سه‌ده‌مێ بنگه‌هین یێ ڤێ یه‌کێ ژی ژدوورکه‌تنا رێبازا بارزانی یه. پێویسته پەدەکە پرەکا ساخلەم د ناڤبەرا نفشێ به‌رێ و یێ نها دا، د ناڤا پارتیێ دا، ئاڤا بکە. ئه‌ڤ ژ بۆ پاشه‌رۆژێ و هه‌روه‌ها ژ بۆ ب ئاوایه‌ک راسته‌قینی تێگهاندنا رێبازا بارزانی پێوستیه‌که.
وه‌ک هه‌ر قۆناغێ پێشمه‌رگه یێن کوردستانێ ئیرۆ ژی د پاراستنا کوردستانێ دا دیرۆکی نووژه‌ن دنڤیسینن. ب دیپلۆماسیه‌ک سه‌رکه‌فتی سیاسه‌تا جیهانێ د ده‌ربارێ کوردستانێ دا هاتیه گوهه‌رتن.
پەدەکە ب رێبازا بارزانی گەرانتیا سه‌رکه‌فتنا کورد و کوردستانێ یه.
رێبازا بارزانی گەرانتیا پاراستنا هه‌موو ده‌ستکه‌فتی و نرخێن نه‌ته‌وی یه.
بژی کوردستان
بژی پێشمه‌رگه…
نێرین/شرۆڤە
