ڕه‌وشا سیاسی یا هەدەپێ ژ ئالیێ ڕه‌وشه‌نبیر، ئاقلمه‌ند و سیاسه‌تمه‌دارێن کوردان ڤه ب ئاوایێ جودا تێ نرخاندن. پرس ئه‌ڤه؛ گه‌لۆ هدپ پارتیه‌ک کورد و کوردستانیه یان نا؟ گه‌لۆ مرۆڤ ل گۆرا داخوازیا خوه و بیر و باوه‌ریا خوه جهه‌کێ سیاسی دده هەدەپێ ، یان ژی ل گۆرا کو هەدەپە خوە بخوه دده ناساندن، هەدەپێ دنرخینه.
د ڤێ ده‌ربارێ ده هەدەپە دبێژه کو، ئه‌و نه پارتیه‌ک کورد یان ژی کوردستانیه. ئه‌و پارتیه‌ک یا ترکیه و هه‌ولا ترکیه‌بوونێ دده و بنگه‌هێ سیاسه‌تا وان ژی ل سه‌ر ترکیه‌بوونێ هاتیه ئاڤاکرن. یانی هەدەپە دخوازه کوردا ب هه‌موو ئاوایی ئه‌نته‌گره‌یێ ترکیە و ترکیه‌بوونێ بکه. ژ ده‌رڤەیی ڤێ ئه‌و که‌سێن کو هەدەپێ وه‌ک پارتیه‌ک کوردی دنرخینن ته‌نێ خوه ته‌تمین دکن و هه‌ولددن ڕێیه‌ک مه‌شروع ژ سیاسه‌تا خوه یا چه‌وت را ببینن.
خه‌له‌تیا هه‌ری مه‌زن و ب زانه‌بوون سیاسه‌تمه‌دارێن کورد دکن، ڕاستیا هەدەپێ ناخوازن ببینن و ب زانه‌بوون کوردا و ته‌ڤگه‌را کورد ل باکورێ کوردستانێ د که‌سایه‌تا هەدەپێ دا ددن ناساندن. یانی ده‌ما به‌حسا سیاسه‌ت و هه‌لوەستا هەدەپێ دکن، دبێژن “ کوردا هالێ کر“ و “کوردا ده‌نگ دان فلان ئالی “، “ کوردان ڤێ جارێ هه‌لوه‌سته‌ک جودا“ دانن. ژ ئالیه‌ک دن ژی پرانی چه‌پ و نژادپه‌ره‌ستێن ترک ژی هه‌مان تشتێ دکن.
لێ ئه‌ڤ یه‌ک حه‌قاره‌تا هه‌ری مه‌زنه ل کوردا تێ کرن. گه‌له‌ک که‌سایه‌تێن کورد ، ڤه‌کری سیاسه‌تا هەدەپێ ناپارێزن لێ ب ڤێ ڕێیێ خوه ڤه‌دشێرن و ب شه‌رمی هه‌ڤالبه‌ندیا پکک/هەدەپێ دکن. ئه‌ڤ خرابیا هه‌ری مه‌زنه ب ناڤێ کورده‌یاتیێ ل کوردا تێ کرن.جوداهیا بنگه‌هین یا هەدەپێ ژ پارتیێن دن یێن ترکیێ ئه‌وه کو ده‌نگێن خوه ژ کوردا دگرن. لێ سیاسه‌تا وان یا د ده‌ربارێ کوردان دا خزمه‌تا هه‌ری مه‌زن ژ ترکیێ ڕا دکه.
ئه‌گه‌ر مرۆڤ چه‌ند پرسان ژ هەدەپێ بکه ، ئه‌و ب خوه ڕه‌وشا خوه زه‌لالی دبێژن.
مرۆڤ ژ هەدەپێ پرسه‌کی بکه:
گه‌لۆ هون خوه پارتیه‌ک چه‌وا دبنین؟
هون پارتیه‌ک کورد و کوردستانینه؟
گه‌لۆ ژ بۆ وه ده‌وله‌تا ترک، ئالا ترکیه تێ چ واته‌یێ؟
گه‌لۆ هون ژ بۆ چ ل دژی نه‌ته‌ویه‌تا کوردانن و ل دژێ سه‌رخوه‌بوونا کوردستانێ نە؟
مخابن هه‌رکه‌سه‌ک به‌رسڤا ڤان پرسان دزانە ، لێ به‌رسڤا ڤان پرسان ژ ئالیێ هەدەپێ ڤه ژ بۆ وان نه گرینگه. ژ به‌ر کو ئه‌ڤ ئالی ب زانه‌بوون بێ کو بکه‌ڤن ناڤ ڕێزێن هەدەپێ ژ ده‌رڤه، هەدەپێ ژ بۆ به‌رژه‌وه‌ندیێن خوه یێن ڕۆژانه و که‌سایه‌تی ب کار تینن.
د ده‌ما پێڤاژۆیا “ ئاشتی “ یێ دا، به‌رپرسێ “پێڤاژۆیا ئاشتیێ“ وه‌زیرێ ده‌وله‌تێ به‌شیر ئاتالای د به‌رنامه‌یه‌ک ته‌له‌ڤزیۆنی دا گه‌له‌ک ڤه‌کری گۆت کو، هەدەپە ژ ئالیێ ئۆجالان و میتێ ڤه هاتیه دامه‌زراندن. چ جارا که‌سه‌ک ژ هەدەپێ ل هەمبه‌ر ڤێ داخوویانیێ نه ئاخڤی و ڕه‌دا ڤێ نه‌کر. پکک/هدپ و ده‌وله‌تا ترک ل هه‌ڤ نه‌کرن و پێڤاژۆیا کو وان وه‌ک “پێڤاژۆیا ئاشتیێ“ ب ناڤ دکران تێک چوو.
ڤێ یه‌کێ گه‌له‌ک تشت گوهه‌رتن. جاردن چالاکیێن چه‌کداری ده‌ستپێ کرن و ڕه‌وش ته‌ڤلیهه‌ڤ بوو. هەدەپە پارتیه‌کا یاساییه و سیاسه‌تا پککێ ڕێڤه دبه و گرێدایێ پککێ یه.
ئه‌گه‌ر نه ژ پککێ بوویا هەدەپێ ل باکورێ کوردستانێ 1% ژی ده‌نگ ژ بده‌ستڤه نەدئینان. هه‌تا ئه‌ڤ ڕاستی نه‌یێ دیتن، ل باکورێ کوردستانێ کورد نکارن پێشیا خوه ببینن. یانی دڤێ پکک باش بێ شرۆڤه کرن و ل گۆرا ڤێ ئه‌نجامێ ژی سیاسه‌ت بێ کرن. وه‌ک دن زه‌حمه‌ته کو مرۆڤ ڕاستیا خوه ب خوه ببینه. دێ مه‌حکومێ سیاسه‌تا کۆرانه به.
2019.04.12
نووچه/ ئەنالیز
ن.فرات
