گەلۆ ھەدەپە نێزیكی دەستھلاتێ دبە
ل تركیێ و باكورێ كوردستانێ مژارەك تێ گۆتوبێژ کرن کو، دبێژن ئه‌ردۆگان ب هه‌ڤالبه‌ندیا باخچه‌لی و مەهەپێ گه‌له‌ک پشتگریا خه‌لکێ وندا کریە. نها ژی ئه‌ردۆگان هه‌ول دده کو ژ باخچه‌لی و مەھەپێ خلاس ببه.
هه‌ری داوی پارله‌مه‌نته‌رێ هەدەپێ یێ ستەنبولێ ئه‌رۆل کاترجۆگلو د داخوویانیه‌کا خوه دا دبێژه کو، ئه‌گه‌ر ئه‌ردۆگان گاڤه‌کێ بەر ب ھەدەپێ ڤە باڤێژه دێ هەدەپە ژی خوه نێزکی ده‌ستهلاتێ بکه. هه‌روه‌ها کاترجۆگلو به‌حسا پێڤاژۆیه‌ک یا نوو یا چاره‌سه‌ریێ دکه و به‌حسا ڕۆلا ئۆجەلان ژی دکه. لێ ئه‌ڤ گۆتارا پەرله‌مه‌نته‌رێ هەدەپێ ل دژی سیاسه‌تا قه‌ندیل و پەکەکێ یا ل هەمبه‌ر ئه‌ردۆگانه. ھەتا چو رادە دێ قەندیل رێ بدە كو ھەدەپە خوە نێزیكی دەستھلاتێ بكە؟
تێ زانین کو نها د ناڤا هەدەپێ دا 3 دیتنێن جودا په‌یدا بوونه. گروپا چه‌پێن ترک و که‌مالیست ، ناخوازن هەدەپە د ده‌ربارێ ده‌ستهلاتێ دا هندی سه‌رێ ده‌رزیێ ژی ب ئه‌رێنی بفکره، ئانكو ب چو ئاوایی ناخوازن ھەدەپە خوە نێزیكی دەستھلاتێ بكە. چه‌پێن ترک کو نها د ناڤا هەدەپێ دا ده‌ستهلاتن. ژ ئالیه‌ک دن د ناڤا هەدەپێ دا هنده‌ک ل گۆرا قه‌ندیل و هنده‌ک ژی ل گۆرا ئیمرالی ته‌ڤدگه‌رن . ئه‌ڤ یه‌ک گه‌له‌ک ئاشکه‌ره بوویه و گۆتوبێژ ل پشت پەردێ ب گه‌رمی تێنه کرن. هه‌روه‌ها یێن کو دبێژن ئۆجەلان جهێ بریارێ یه ب ئاوایه‌کی د ده‌ربارێ ده‌ستهلاتا ئه‌ردۆگان دا هه‌ولددن په‌یامێن نه‌رم بدن.
ئیحتمالا كو ئۆجەلان دگه‌ل ده‌ستهلاتا تركیێ ب پلانەكێ قه‌ندیل ته‌سفیه بکه، ده‌رکه‌تیه هۆلێ. ده‌ستهلات نها هه‌ولدده کو، د ده‌مه‌ک مناسب دا جاردن ڕێ بده هه‌ڤدیتنا ل گه‌ل ئۆجەلان دەست پێ بكە. دێ هینگێ ڕه‌وش زه‌لالتر ببه و ناکۆکیێن ئیمرالی و قه‌ندیل ڤه‌کری بێنه گۆتوبێژ کرن. ئه‌ڤ یه‌ک دێ ڕه‌وشا هەدەپێ ژی زه‌لال بکه.
هەدەپە دمینه یان تێ گرتن، ئه‌ڤ ژی خاله‌که کو میت و ئۆجەلان گۆتوبێژ دکن. ژ خوه چو جارا هه‌ڤدیتن د ناڤبه‌را به‌رپرسێن میتێ و ئۆجەلان دا قوت نه‌بوونه ، هه‌ر به‌رده‌وامن. سه‌رۆکا ئی پارتیێ، مه‌رال ئاکشه‌نه‌ر، ژی دا خوویاکرن کو، ئه‌و باش دزانن كو د ناڤبه‌را ده‌ستهلاتێ و عبداللە ئۆجەلان دا هه‌ڤدیتن هه‌ر به‌رده‌وامه.
ڕۆژا 9 ێ مه‌هێ ئه‌ردۆگان سه‌ردانا دیاربه‌کرێ دکه. هێڤیه‌ک نینە کو ئه‌ردۆگان په‌یامێن گرنگ د ده‌ربارێ کوردان دا بده. لێ هه‌ر دێ به‌حسا پێڤاژۆیه‌ک نوو بکه، گه‌له‌ک ڤه‌کری نه‌بێژە ژی، دێ مرۆڤ بزانبه كا ئارمانجا ئه‌ردۆگان دێ چبه. تێ زانن کو به‌شه‌ک ژ ناڤا ئاک پارتیێ دا دخوازن ئه‌ردۆگان ژ باخچه‌لی دوور بکه‌ڤه.
ل باکورێ کوردستانێ به‌رپرسێن ده‌وله‌تێ، ڕێڤه‌به‌رێن ده‌وله‌تێ ، تایبه‌تی والی و به‌رپرسێن ئه‌وله‌هیا باژاران پرانی زەلامێن مەهەپێ نه. ئاک پارتی ب خوه ژ ژ ڤێ یه‌کێ نه‌رەحه‌ته. به‌ری دو ڕۆژان ده‌ستهلاتێ هنده‌ک ژ ڤان به‌رپرسێن ئه‌وله‌هیا باژاران گوهه‌رتن. ئیحتماله کو هه‌مان تشت ژ بۆ والیان ژی بێته کرن. ئه‌ڤ گاڤ وه‌ک بالکێشه‌کیه‌که ژ بۆ مەهەپێ.
لێ د ڤێ ده‌ما کو به‌حسا هلبژارتنێن پێشوه‌خت تێ کرن، گه‌له‌ک ڕاپرسین ژی تێنه کرن. د پرانیا وان ڕاپرسیان دا مەهەپە د بن به‌ندا هلبژارتنا دا دمینه. ئه‌ردۆگان ژی ڤێ یه‌کێ دبینه و ممکنه هه‌ولبده ژ باغچه‌لی خلاس ببه.
دێ د چه‌ند ڕۆژێن ل پێشیا مه دا گه‌له‌ک تشت زه‌لالتر ببن.
نووچه/ئانالز
