ژ بیر نه‌کن کو ژ بۆنا کوردێن باکورێ کوردستانێ قازانجکرن ئان ونداکرنێ، د شه‌رت و مه‌رجێن ئیرۆ دا، نه ب ده‌نگانه. قازانجکرن ئان ونداکرن، ب هه‌لوه‌ست، نه‌رین و ل سه‌ر خه‌تا نه‌ته‌وه‌یی ب کارکرن و خه‌باتێ یه.
ئه‌م هه‌می دزانن ل ترکیێ و ل باکورێ کوردستانێ بشافتن و ئاسیمله‌کرنا کوردان پرۆژه‌یا سه‌دسالانه. ئه‌ڤ پرۆژه ب ده‌ستێ هندەک کوردان ژی تێ برێڤه‌برن. هه‌تا کو ئه‌م وها بن، دێ چو سه‌رکه‌فتن ژی نه‌به پارا کوردان. هه‌گه‌ر ره‌وش وه‌ها هه‌ره و به‌لاڤبوون د ناڤا کوردان دا هه‌رکو هه‌ره خورتر ببه، د هلبژارتنه‌کا دن دا دێ چو پارتیێن کوردستانی دێ نکاربن، وه‌که ئیرۆ ئه‌وقاسی ده‌نگ بگرن. دڤێ ئێدی ئه‌م ڤێ راستیا خوه ببینن…
دڤێ هه‌رکه‌س بزانبە، ئه‌ڤ ونداکرنا د هلبژارتنا۲۰۲۳ئان دا نه ته‌نێ یا هاک-پارێ یه. ل باکورێ کوردستانێ یا هه‌می کوردێن دلسۆزێن گه‌لێ خوه نه.
ژ بۆنا سه‌رکه‌تنا باکورێ کوردستانێ، ژ مه را رێبازا بارزانیێ مه‌زن، هێز و قوه‌تا سه‌رۆک مه‌سعود بارزانی، پێویستیا مه ب یه‌کی وه‌که خوه‌دی دیپلۆماسیه‌ک خورت و ناڤنه‌ته‌وی کورێ ئیدریسێ نه‌مر، نێچیرڤان بارزانی و خوه‌دی ل ئاخا کوردستانێ و ل گه‌لێ کورد د وارێ پاراستنێ دا ده‌رکه‌تاندنێ دا، که‌سایه‌تیه‌کی وه‌که مه‌سروور بارزانی، لازمن. لێ هه‌زار جاران مخابن ئه‌م ئیرۆ وه‌که کوردێن باکورێ کوردستانێ ژ وێ هێز و قوەتا هێژا یا باشوورێ کوردستانێ بێ پارن.
هه‌گه‌ر ئه‌م کوردێن باکورێ کوردستانێ بخوازن، ژ دێلڤا هه‌ڤدو کێم بکن، ژ دێلڤا کو ئه‌م ل هه‌مبه‌ر هه‌ڤ شه‌رڤان و ده‌خس بن. وه‌رن ئه‌م هه‌می ب هه‌ڤرا هه‌ولا دامه‌زراندنا ئه‌نیا کوردوستانی یا وه‌که ل باشوورێ کوردستانێ کو ب سه‌رپه‌رشتیا ئیدریسێ نه‌مر هاتبوو دامه‌زراندن، دامه‌زرینن.
خه‌لاسی و ئازادیا باکورێ کوردستانێ ژ تشته‌کی وه‌ها را هه‌یه. هه‌تا کو ل باکورێ کوردستانێ ئه‌ڤ پێک نه‌یێ، دێ ونداکرن ژی ببه پارا مه.
ده فه‌رمۆ ژ دێلڤا ئه‌م تنازێ خوه، ژ به‌ر سه‌ده‌ما نه‌بسه‌رکه‌تنان ب هه‌ڤ بکن. وه‌رن ئه‌م ب هه‌ڤرا ئه‌نی ئان تفاقا نه‌ته‌وه‌یی ل گۆر رێ و رێبازا بارزانی پێک بینن، دا کو ئێدی سه‌رکه‌تن ببه پارا مه.
ئه‌م د سه‌د سالیا لۆزانێ دا دژین و هه‌تا سه‌د ساله‌کی دن ئه‌م دێ نکاربن ڤی گه‌لێ قه‌دیم ژ ژناڤچوونێ بپارێزن. ئانکو ئه‌م دێ هه‌می ب هه‌ڤرا وندا بکن.
ده که‌ره‌م بکن، ژ سه‌ریدا هاک-پار و هه‌می پارتی، ته‌ڤگه‌ر، دام و ده‌زگه‌هێن کوردی ل گه‌ل ره‌وشه‌نبیر و زانێن خوه ده‌ستێن خوه بدن هه‌ڤ دا کو ئێدی کوردێن باکورێ کوردستانێ وندا نه‌کن.
ژ به‌ر بێ تفاقی و نه یه‌کتیا کوردێن باکورێ کوردستانێ رۆژ ب رۆژ وندا دکن.
ب هێز، ئه‌نی و تفاقه‌ک نه‌ته‌وه‌یی دێ سه‌رکه‌تن ببه پارا هه‌می کوردێن ل جیهانێ.
Bûbê Eser
