سیاسی

ھرۆری: شكایەتا نفشێ نوو نەیاسایی یە و دەستپێكەك خەرابە

رێڤنگ ھرۆری سەرۆكێ دەمكی یێ پارلامەنتۆیا كوردستانێ د داخویانیەكێ دا ژ مالپەرا مە، بەرگەھ، رە، ددە خویا كرن كو شكایەتا نفشێ نوو (نەوەی نوێ) لسەر وی قەید كری شكایەتەكە نە یاسایی یە و چ بنگھەكا یاسایی ژێ رە نینە.

ھرۆری دبێژە : مە ھەمویان خوەست ڤێ جارێ بدلەكێ سافی ل پارلامەنتۆیا كوردستانێ دەست ب كار و خەباتێن خوە بكن، لێ مخابن ھەر دەستپێكێ نفشێ نوو نیەتكا سافی نیشان نەدا ئو ئەڤ ژی دەستپێكەك نەباشە.

رۆژا 06.11.2018ێ یەكەم جڤینا پارلامەنتۆیا كوردستانێ ب سەرۆكاتیا تەمەنترین پارلامەنتەر كو ئەو ژی رێڤئگ ھرۆری یە، ژ لیستەیا پارتیا دەمۆكراتا كوردستانێ،، دەست ب جڤینا خوە كر و د وێ جڤینێ دە ھەموو پارلامەنەتەران، ژ بلی سەرۆكێ پارتیا نفشێ نوو، شاسوار عەبولواحید و سەرۆكێ لیستەیا یەكێتیێ، قوباد تالەبانی، سووندا یاسایێ خوار.
ژبەر كو ئالیێن سیایی ھلبژارتنا سەرۆكاتیا پارلامەنتۆیێ نەگەھشت بوون چ رێكەفتنان ، سەرۆكێ پارلامەنتویێ جڤین ڤەكری ھێلا.
شاسوار عەبدولواحید ل سەر ناڤێ فراكسیۆنا خوە شكایەت ل سەرۆكێ دەمكی یێ پارلامەنتۆیا كوردستانێ، رێڤنگ ھرۆری قەید كریە.
نفشێ نوو دبێژە كو سەرۆكێ پارلامەنتۆیێ كارەك نە یاسایێ كریە و پێدیڤی بوو د یەكم جڤینێ دە سەرۆكاتیا پارلامەنتۆیێ بھاتا ھلبژارتن.

ھرۆری لسەر ڤێ شكایەتا نفشێ نوو دبێژە: ئەو شكایەتا نفشێ نوو نە یاسایی یە، راستە ل گۆر پەیرەوێ ناڤخوە دڤێ د یەكەم جڤین دە سەرۆكاتیا پارلامەنتۆیێ بێ ھلبژارتن، لێ ژبەر ڤان سەبەبێن خوارێ ئەو گلینامە نە یاسایی یە:
1- ئالیێن سیاسی نەگەھشتبوون چ رێكەفتنان و پێشنیارا ھلبژارتنا سەرۆكاتیا پارلامەنتۆیێ نەگەھشت بوو دەستێ من.
2- پێشنیارەك ب ئیمزا ھەموو فراكسیۆنا ژبلی فراكسیۆنا نفشێ نوو و كۆمەلەیا ئیسلامی، ژ من رە ھات كو جڤین ڤەكری بمینە حەتا د ناڤبەرا الیێن سیاسی دە رێكەفتنەك ل سەر دەستنیشانكرنا سەرۆكاتیێ چێ ببە.
3- من ئەو پێشنیار خستە بەر دەنگدانێ و پرانیی ئەو پێشنیار قەبوول كر
4- ژبەر كو ڤالاھیا دەستووری ل كوردستانێ ھەیە و ھەموو تشت ب رێكەفتنا ناڤبەرا ئالیان دا چێ دبن و لگۆر پەیرە و یاسایێ ژی پێشنیار و یاسا ل ناڤ پارلامەنتۆیێ ب پرانیا دەنگان تێن پەسند كرن، ئەڤ پێشنیار ژی ب پرانیا گەلەك زێدە یا پارلامەنتەران ھات پەژراندن، ب ڤی ئاوایی جڤین ڤەكری دمینە.

سەرۆكێ دەمكی یێ پارلامەنتۆیا كوردستانێ دببێژە: ڤێ جارێ مە ھەموویان خوەست ب دلەكێ پاقژ و ب ھەستەكە كوردستانی بچن ھۆلا پارلامەنتۆیێ، لێ مخابن فراكسیۆنا نفشێ نوو دەستپێكەك خەراپ دەست پێ كر .

ل گۆر رێڤنگ ھرۆری شكایەتا نفشێ نوو نە ژبەر بنپێكرنا یاسایێ یە لێ ژبەر دژاتیا پارتی و یەكێتیێ یە و ب تایبەتی دژاتیكركنا وی وەكە پارتیەك و پێشمەگەیەك. بلا نفشێ نوو مفا ژ سەربوورێن ئالیێن دن یێن دژاتیا بەرژەوەندیێن خەلكێ كوردستانێ دكر وەبگرە.

Back to top button