ھەبوونا یەكێتیێ ب ئاوایێ ھەیە ژ بۆ وه‌لاته‌کی زه‌ره‌ره یان فه‌یده‌یە
ڕه‌وشا یەكێتیا نشتمانیا كوردستانێ (ینک)ێ گه‌له‌کی خرابه و ژئالیێ ڕێخستنی ڤه ڕۆژ ب ڕۆژ به‌ر ب پێڤاژۆیه‌ک مەجھول ڤه دچه و كەس نزانە پاشەرۆژا وێ چەوابە. ئه‌ڤه چه‌ند سالن یەكێتی نکاره کۆنگره‌یا خوه ل دار بێخه. گه‌له‌ک جاران سه‌رکردایەتیا وێ بریار دا کو کۆنگره‌یا خوه پێکبینه لێ نه‌کاری بكە.
هه‌ری داوی ڕۆژا 10.10.2013ێ یەكێتیێ ل قه‌لاچۆالان پله‌نیومه‌ک ل دارخست و بریار دا کو کۆنگره‌یا خوە 31.10.2014 ێ ده پێكبینە. ئه‌ڤه 5 سال ده‌رباس بوون کو یەكێتی نه‌کاری کۆنگره‌یا خوه کۆم بکه و هه‌تا نها ژی نه ئاشكەرەیە کا یەكێتی دێ که‌نگی کۆنگره‌یا خوه بکه و پرسگرێکێن خوه چاره‌سه‌ر بکه.
ئه‌گه‌ر پارتیه‌ک سیاسی ب سالان د ناڤا ناکۆکی و خه‌له‌تیان دا بھێتە بڕێڤه برن و چ جوره‌یێ ئیستیقرارێ د ناڤا ڕێخستنێ ده نه‌مینه و هه‌رکه‌سه‌ک ب ئالیه‌کی دا سیاسه‌تێ دیار بکه، ئه‌ڤ یه‌ک باندۆرا خوه ل حوکومه‌تا کوردستانێ و پێشه‌رۆژا کوردستانێ ژی دکه.
باش دھێتە زانین کو ژ بۆنا كو یەكێتی خوه ڕاگره و تێکنه‌چه، بارزانی گه‌له‌ک جارا مل دا به‌ر یەكێتیێ و نه‌هشت ئه‌و بكەڤە و تێک هه‌رە. ئه‌ڤ سیاسه‌ت ڕاست بوو یان نا، بابه‌ته‌ک دنه.
یەكێتی بوویه سه‌مبۆلا بێ ئستیقراریێ ل باشوورێ كوردستانێ. دۆست و دژمن ژی ڤێ یه‌کێ دزانن. جارنا مرۆڤ دفکرە كا گەلۆ ھەبوونا ڕێخستنه‌ک ب ڤی ئاوایی ژ بۆ وه‌لاته‌کی زه‌ره‌ره یان فه‌یده‌یە؟ نها یەكێتی د ڤێ قۆناخێ ده دژی.
د ناڤا یەكێتیێ دا نه بته‌نێ ھزروبیرێن جودا هه‌نه، د ناڤ وێ دا ڕێڤه‌به‌ریێن جودا هه‌نه، باسكێن جودا ھەنە، ناوەندێن بریارێ یێن جودا ھەنە و شه‌ره‌ک گه‌له‌ک مه‌زن د ناڤبه‌را دو هه‌تا سێ باسكان دا، گرۆپان دا هه‌یه. نها حه‌سابێ ئانینا کورێ جەلال تالەبانی، پاڤل تالەبانی ژ بۆ سه‌رۆکاتیا یەكێتیێ تێ کرن. لێ کوسره‌ت ڕه‌سۆل و هه‌ڤالێن وی ل گۆرا دخوه‌یێ ڤێ یه‌کێ قه‌بوول ناکن. ناکۆکیێن د ناڤا یەكێتیێ دا یان ب کۆنگره‌یه‌کێ تێن چاره‌سه‌رکرن و یان ژی یەكێتی ب ئاوایه‌کی پارچه دبه. هه‌تا کۆنگره ب خوه ژی نکاره یه‌کتیا ناڤ یەكێتیێ یا سیاسی و ڕێخستنی بپارێزه.
نها هه‌موو هه‌ولدان تێنه کرن کو کی ببه ئه‌ندامێن کۆنگره‌یێ و ئالیێن ناکۆک هه‌ولددن کۆ پرانیا دەنگان ژ خوه رە د کۆنگره‌یێ دا مسوگەر بكن، ئەو ژی ئه‌گه‌ر کۆنگره‌یه‌ک بێ ل دارخستن.
هه‌ری داوی ڕۆژا 14.01.2018 ێ سه‌رکردایەتیا یەكێتیێ داخوویانیه‌ک به‌لاڤ کر و هاتبوو دیارکرن کو دێ کۆنگره‌یا خوە د ڕۆژا 5 ێ ئادارا 2018 ێ دا ل گرێدە. لێ ئه‌و بریار ژی وه‌ک هه‌موو بریارێن دن یێن ده‌ربارا کۆنگره‌یێ ب ھەوادا چوو.
ناکۆکیێن یەكێتیێ ئه‌شکه‌ره‌نه لێ وه‌ک نه‌هێنی بن سیاسه‌ت تێ کرن. ئه‌ڤ یه‌ک ب ئاوایه‌کی تێ حه‌سابێ هه‌رکه‌س و ئالیه‌کی. پرسه‌ک دن هه‌یه کو ، گه‌لۆ ئه‌ڤ ڕه‌وشا یەكێتیێ ژ بۆ چ ژ ئالیێ مه‌دیایێ ڤه وەكە پێوست بە نایێ ڕۆژه‌ڤێ. دێ هه‌تا کووده‌رێ ئه‌ڤ یه‌ک ژ ڕایا گشتی یا کوردستانێ را بێ ڤه‌شارتن.
یەكێتی نها ب سیاسه‌تا خوه و کاروبارێن دکه د پێڤاژۆیه‌ک یا مناقه‌شه‌یێ ده یه. گه‌لۆ ژ بۆ کوردستانێ، ژ بۆ یه‌کتییا کوردستانێ، ژ بۆ ئستیقرارا سیاسی ل کوردستانێ و ژ بۆ پێشکه‌تن و پاراستنا خاکا کوردستانێ ینک پێوستیه‌که یان نا؟ د هه‌موو جڤاکێن نۆرمال ده ئه‌گه‌ر هلبژارتن چێدبن ده‌نگێ خه‌لکێ به‌رسڤا ڤێ پرسێ دده.
ئه‌گه‌ر نه ژ ڕه‌وشا له‌شکه‌ربه كو ھێزەكە مەزن لبەر دەستێ وێ یە، یەكێتی نه پێوستیه‌که. ژ خوه چ گارانتی ژی نینە کو هه‌ر ده‌می یەكێتی جاردن ل هەمبه‌ر کوردستانێ بوویه‌را 16 ئۆکتۆبه‌رێ دوبارە نه‌که.
یەكێتی کۆنگره‌یا خوه د ده‌مه‌ک نێزیک دا نه‌که دێ یا مایی ژی ژ ده‌ست هه‌رە و ئەو ڕێخستن دبه جوره‌یه‌ک دن.
02.12.2018
نووچه/ئانالیز
ن.فرات
