ھەلوەستا پەكەكێ ل ھەمبەر رێكەفتنا نەفتێ
ل سەر وێ رێكەفتنا د ناڤبەرا ھێزێن سوریا دەمۆكراتیك (ھەسەدە) و کۆمپانیا دیلتا کرێسنت ئێنه‌رگی یا ئەمریكایی دا ھاتیە ئیمزا
كرن كو ل گۆر وێ رێكەفتنێ كۆمانیا ناڤبۆری ل رۆژاڤایێ كوردستانێ ل نەفتێ بگەرە، بیرێن نەفتێ نووژەن بكە و بەرھەمئانینێ د وارێ نەفتێ دا بكە گەلەك كارڤەدان چێبوون و نرخاندنێن جودا ژ بۆ وێ رێكەفتنێ ھاتن كرن.
دەولەتا تركیێ نە ب ئاوایەكی ھشك لێ ب زمانەك دپلۆماسی ل دژی وێ رێكەفتنێ دەركەت و ب نەیاسایی ب ناڤ كر.
حكومەتا سوریێ ژی ب دژواری ل دژی رێكەفتنا ناڤبەرا ھەسەدە و ئەمریكایێ دەركەت د داخویانیا خوە دا دیار كر كو ئەو رێكەفتن “دزینا نەفتا سوریێ یە”.
هه‌ڤسه‌رۆکێ ده‌سته‌یا برێڤه‌به‌ریا کۆما جڤاکێن کوردستانێ (کەجەکە) ڕادگەهینه كو نه‌فتا سوریێ یا هه‌موو گه‌لێن وی وه‌لاتیه و دبێژە: “نابە هنده‌ک که‌س بھێن و ڤێ سه‌روه‌تێ بکن یا خوه”.
جه‌میل بایک هه‌ڤسه‌رۆکێ ده‌سته‌یا برێڤه‌به‌ریا کەجەکە د هه‌ڤپه‌یڤینه‌کا خوە دا د گه‌ل کانالا پارتیا خوه ددە خواكرن كو وان ژی ب رێیا مەدیایێ زانیە كو ھێزێن سوریا دەمۆكراتیك (ھەسەدە) دگەل كۆمپانیایەكا ئەمریكایی رێكەفتنەك د وارێ نەفتێ دا ئیمزا كریە و دبێژە: “مە ژ ڕاگەهاندنێ ئەڤ تشت بهیست. ئەم نزانین بنگەھا ڤێ یەكێ چیە و چەوایە. تێ گۆتن د گه‌ل وێستگه‌هه‌کا نه‌فتێ په‌یمان هاتیه ئیمزا کرن. حکومه‌تا سوریی ژی د داخویانیه‌کێ دا ڕاگەهاند “ئه‌و قه‌بول ناکن، ئه‌ڤه نه‌وه‌کهه‌ڤیه، نه‌فتا مه تێ دزین”. یا كو ئه‌م دزانین تەنێ سوریا د قادا ناڤده‌وله‌تی دا وەك ده‌ستهلات و ده‌وله‌ت تێ قەبوول كرن. هه‌ر سه‌روه‌ته‌کا ل سه‌ر زه‌ڤی و بن زه‌ڤی یا ئاخا سوریێ هه‌یه، یا هه‌موو گه‌لێن سوریێ یه، ب ته‌نێ یا هنده‌ک که‌سان نینه. نابە هنده‌ک که‌س بھێن و ڤێ سه‌روه‌تێ بکن یا خوه. مه به‌رێ ژی گۆتبوو، نها ژی دبێژین”.
بایک دبێژه: “خوه‌برێڤه‌به‌ریا باکور و ڕۆژهلاتێ سوریێ ژی به‌رێ گۆتبوو كو ئه‌ڤ نه‌فت و هه‌موو سه‌روه‌تێن سه‌ر زه‌ڤی و بن زه‌ڤی یێن ئاخا سوریێ، یێن هه‌موو گه‌لێن سوریێ یه. ژ هه‌موویان ڕاستر هه‌ر ئه‌ڤه‌یه. ئه‌ڤ په‌یمانێن کو د گه‌ل وێستگه‌هێن نه‌فتێ هاتنه ئیمزا کرن، هه‌تا چه‌ندێ د ڤێ چارچوڤه‌یێ دایه، ئه‌م نزانین. لێ به‌لێ دڤێ ب ڤی ئاوایی بە. واته ئیرۆ کو ل سوریێ هنده‌ک کێشه‌یێن ئابۆری هه‌نه، ل سه‌ر باکوورێ سوریێ ژی ئه‌گه‌ر ئه‌ڤ کێشه ل به‌ر چاڤ بێنه گرتن و د ڤێ چارچوڤه‌یێ دا ڕێکه‌فتن واژۆ بکن، ئه‌م تشته‌ک نابێژین، لێ به‌لێ ئه‌گه‌ر ب ڤی ئاوایی نه‌بە، دڤێ مرۆڤ هه‌لوه‌ستێ ل سه‌ر بکه”.
هه‌تا نها ترکیێ، سوریێ، ڕووسیا و پەکەکە ل دژی ڤێ په‌یمانا نه‌فتێ یا ڕۆژاڤایێ کوردستانێ ده‌رکه‌تنه.
ھەر كەس تێدگەكە كا چما تركیە و رووسیا دژی پەیمانا نەفتێ یا ئەمریكا و ھەسەدێ نە، لێ چما پەكەكە ل دژی وێ رێكەفتنێ یە؟
بایک و ده‌وله‌تا ترک د ڤێ ده‌ربارێ دا هه‌مان تشتی دبێژن و یەك ھەلوەست ھەیە. داخویانا ھەڤسەرۆكێ كەجەكە ژ یا وەزارەتا دەرڤەیا تركیێ ھشكتر!
