ھەم زۆردار و ھەم سووجدار
جەمیل جەوھەر
کێ نەفرەت ل پارتیا دەمۆكراتا كوردستانێ (پەدەك)ێ و بارزانییان کریه ئه‌م نزانن. کێ نڤشتا ڕه‌ش ژ وان ڕا چێکریه دیسا ئه‌م نزانن. لێ ئه‌م تشته‌کی دزانن کو ئه‌و ژی ئه‌ڤه؛ هه‌رکه‌س دژمنێ پەدەكێ و بارزانییانه و سه‌ده‌ما وێ ژی سه‌رخوه‌بوونخوازی و ده‌وله‌تخوازییا وانه. ده‌وله‌تخوازی وه‌ک تۆقا ناله‌تێ که‌تیه ستویێ وان و هه‌رکه‌س ب ڤێ هێجه‌تێ ئێریش و دژمناتییا وان دکه. ترکییه، ئیران، ئیراق، سووری، پەكەكە، چه‌پێن ترک و هه‌ما کی ل دژی ده‌وله‌تبوونا کوردستانێ به بوویه نه‌یارێ بارزانییان. چار ئالییێن وێ نه‌یارن. خێرنه‌خوازێن ناڤا یەكێتیا نشتمانیا كوردستانێ (یەنەک)ێ، گۆران و ئه‌وێن دن ژی ژ خوه زێده‌بوونا سه‌ر که‌زه‌بێ نه.
پەدەكە و بارزانی بوونه وه‌ک گۆلکێن به‌ش و سپییا وان به‌لۆقه. هه‌ما چ دبه، چ کریاره‌ک خراب تێ کرن دکه‌ڤه ستویێ وان، دخن ستویێ وان و وان دخن بن زخت و تۆهمه‌تێن گران. یه‌ک ژ وان تۆهمه‌ت و ده‌ره‌وان ژی ئیخباری و ڕاده‌ستکرنا ئه‌ندام و ڕێڤه‌برێن پەكەكێ یه.
پەكەكە د هه‌ر هالووکار و کریارێ دا پەدەكێ و بارزانییان سووجدار دکه. گوره‌ک ل چۆلێ بمره دخه ستویێ پەدەكێ و بارزانییان. ئه‌ندامه‌کی وان ل ئەفریقایێ بێ گرتن، ئیخبارییا ئه‌ندامه‌کی وان ل ژاپۆنیایێ بێ کرن، دخن ستویێ پەدەكێ و بارزانییان. زکێ وان ب شۆربا نیسکێ بنه‌پخه، دیسا دخن ستویێ بارزانییان. یانی، ژ بۆ پەكەكە سووج و گونه‌هێن خوه، نه‌یارتی و کریارێن کو ل دژی کوردان کریه ڤه‌شێره، بارزانییان ژ خوه ڕا دکه قووچ و ئارمانج و ب شه‌ڤ و ڕۆژ ئێریشی وان دکه.
ئه‌ڤ ده‌مه‌که ئه‌ندام و ڕێڤه‌برێن پەكەكێ ل هه‌رێما سلێمانییێ دبن ئارمانجا ئێریشێن بالافرێن ترک و تێن کوشتن. هنده‌ک ژ وان ژی ڕاده‌ستی ترکییێ تێن کرن. وه‌ک مه ل ژۆر ژی گۆتی، ڕێڤه‌برێن پەكەكێ ڕاده‌ستکرن و کوشتنا ئه‌ندامێن خوه ژی دخست ستویێ پەدەكێ. ئیخبارکرنا وان ژی دخست ستویێ پەدەكێ. سلێمانی هه‌رێما یەنەکێ یە و د بن ده‌ستهلاتدارییا وێ و ئاساییشا وێ دا یه، پەدەكێ چەوا دکاره ئه‌ندامێن پەكەكێ ل وێرێ ئیخبار و ڕاده‌ست بکه، ئەڤ یەك دووری ئاقلا یه، ناکه‌ڤه سه‌رێ که‌سی. لێ ڕاستی زێده نه‌هات ڤه‌شارتن و ده‌رکه‌ت هۆلێ. ئا‌شکه‌ره بوو کو سیخورێن ناڤا ئاساییشا یەنەکێ ئیخبارییا ئه‌ندامێن پەكەكێ کریه و هنده‌ک ژ وان ژی ڕاده‌ستی ترکان کرنه. ئه‌ڤ یه‌ک د ناڤ ئاساییشا یەنەکێ دا بوویه سه‌ده‌ما په‌ڤچوون و شه‌ره‌کی گران، ئالیگرێن پەكەكێ و دژبه‌رێن پەكەكێ ڕابوونه هه‌ڤ و ل هه‌ڤ ته‌قاندنه.
د ڤێ ده‌ربارێ دا سه‌رۆکێ به‌رێ یێ پارتییا چاره‌سه‌رییا ده‌مۆکراتیک ئا کوردستانێ (پچدک) فایق گولپێ ژی ده‌ستنیشان دکه کو یێ ئیخبارییا ئه‌ندامێن پەكەكێ دکه یەنەکە یه و نه پەدەكە یه. فایق گولپێ هه‌روه‌ها پرسه‌ک بالکێش ژ پەكەكێ دکه و دبێژه: “پەكەكە دڤێ ژ یەنەکێ بپرسه و بێژه؛ خێره، چما هه‌موو ڕێڤه‌برێن مه ل سلێمانییێ دبن ئارمانجا ئێریشێ؟ چما پەكەكە ژ ینک ناپرسه و نائاخڤه؟“
براستی چما پەكەكە ڕاستییێ نابینه و ژ شریکێ خوه یەنەکێ حه‌ساب ناپرسه؟ ئەو ڕاستییێ دزانه و دبینه، لێ ل حه‌سابێ وێ نایێ. هه‌گه‌ر ژ یەنەکێ حه‌ساب بپرسه وێ نکاربه پەدەكێ تاوانبار بکه و ئێریشی وێ بکه. ئه‌ڤ ژی نه ل حه‌سابێ پەكەكە و ینک تێ، نه ژی ل حه‌سابێ ترکییێ تێ.
گۆتنه‌ک هه‌یه دبێژن “هه‌م زۆردار و هه‌م سووجداره”.
پەكەكە ب ئێریش و دژمناتییا پەدەكێ هه‌م زۆردارییێ دکه، هه‌م سووجدارییێ. کوشتنا پێشمه‌رگه‌یان زۆرداری و ده‌ره‌و و تۆهمه‌ت ژی سووجداری یه. لێ بلا که‌س خه‌مان نه‌خوه و متالان نه‌که. قه‌نج د قه‌نجییا خوه ڕا، خراب ژی د خرابییا خوه ڕا ده‌ردکه‌ڤن.
جەمیل جەوھەر
2021.06.24
