د مالپه‌را (ئۆدا تڤ) یێ دا، نڤیسکارا مالپه‌رێ مویه‌سسه‌ر یلدز د ده‌ربارێ هه‌ڤدیتنا د گه‌ل ئۆجەلان و بریارا ڕاکرنا قه‌دەغه‌یا هه‌ڤدیتنان د گه‌ل پارێزه‌ران نڤیسه‌ک درێژ نڤیساندیه.
نڤیسکار د ده‌ستپێکا نڤیسا خوه دا دبێژه: ده‌ما کو ئه‌ردۆگان دبێژه کوردستان د جھدا بوویه‌ره‌ک چێدبه.
یلدز دبێژه :“ د ده‌ما پرۆپاگانده‌یا هلبژارتنان دا ئه‌ردۆگان گۆت: ما ل وه‌لاتێ من جهه‌ک ناڤێ وێ کوردستان به هه‌یه؟ ئه‌گه‌ر تو بخوازی ل کوردستانێ بژی بقه‌شته هه‌رە باکورێ عیراقێ ل وێ ده‌رێ کوردستان هه‌یه. ئه‌و جهێ کو ئه‌ردۆگان دبێژه کوردستان “بارزانستانه“ و ناڤبه‌را وێ ده‌رێ و ئیمرالی دا هاتوچووینا هه‌یی ژ وه را ب کورتی بێژم.“
“ 16-15 ێ شباتێ د کۆنفه‌رانسا ئه‌وله‌هیێ دا ل ئالمانیایێ ، وه‌زیرێ به‌رگریێ یێ ترکیێ دگه‌ل سه‌رۆکوه‌زیرێ ئاینده یێ “بارزانستانێ “مه‌سرور بارزانی هه‌ڤدیتنه‌ک کر. مه‌سرور بارزان د کۆنفه‌رانسێ دا گۆتبوو کو، ئه‌م چ جارا پەکەکێ وه‌ک ڕێخستنه‌ک ته‌رۆریست نابینن.“
“ 4 ێ ئادارێ جیگرێ مووسته‌شارێ وه‌زیرێ ده‌رڤه یێ ترکیێ، سه‌دات ئۆنال، سه‌ردانا ئه‌ربیلێ کر و د گه‌ل نێچیرڤان بارزانی و مه‌سرور بارزانی جڤیا.“
یلدز به‌رده‌وامیا نڤیسا خوه دا دبێژه کو داویا مه‌ها نسانێ وه‌زیرێ ده‌رڤه، مه‌ڤلوت چاڤوشۆگلو، سه‌ردانا ھەولێرێ کر و دگه‌ل نێچیرڤان بارزانی و مه‌سرور بارزانی هه‌ڤدیتن پێکانین.
نڤیسکار به‌حسا پێڤاژۆیا ل ئیمرالیێ دکه و دبێژه: “ ئۆجەلان پشتی 8 سالان هه‌ڤدیتن ب پارێزه‌رێن خوه ڕا کر. نامه‌یا وی هاته به‌لاڤ کرن و قه‌ده‌خه‌یا هه‌ڤدیتنا د گه‌ل پارێزه‌را ب ته‌مامی ل سه‌ر ڕابوو.“
یلدز دبێژه کو پشتی هه‌ڤدیتنا جیگرێ مووسته‌شارێ وه‌زه‌ره‌تا ده‌رڤه یا ترکیێ، سه‌دات ئۆنال، د گه‌ل نێچیرڤان بارازانی ڕۆژه‌کی، سه‌رۆکوه‌زیر نێچیرڤان بارزان دگه‌ل ئال مۆنتۆر هه‌ڤپه‌یڤینه‌ک چێکر. هه‌ڤپه‌یڤینه‌ک گه‌له‌کی درێژ بوو.
نڤیسکار دبێژه د ڤێ هه‌ڤپه‌یڤینێ دا به‌رسڤا بارزانی یا دو پرسا گه‌له‌ک بالکێش بوو.
پرس: وەها خویا دبه کو ترکیا ل ڤر ژ ئالیێ له‌شکه‌ری ڤه گه‌ڵه‌ک چالاکتر به. ب ئێریشێن ئه‌سمانی ئێریش دکه سه‌ر پارتیا کارکه‌رێن کوردستانێ (پەکەکە)، ئه‌و ژی بوویه سه‌ده‌م کو که‌سێن سڤیل بێنه کوشتن. هه‌ر ژ به‌ر ڤێ ژی خوه‌پێشانده‌که توند ژ ئالیێ خه‌لکێ خوه‌جهی ڤه ل دژی ترکیێ هاته ئه‌نجامدان. وەها دیار دکه کو تو د ڤێ ناڤبه‌رێ دا، د ناڤبه‌را هه‌لوه‌ستا پەکەکێ و ترکیێ ده ئاسێ مابی. وه‌که سه‌رۆکێ پێشه‌رۆژێ، تو دخوازی پرۆسه‌یا ئاشتیێ د نانڤبه‌را ترکیێ و پەکەکێ دا وه‌ره زیندیکرن؟
نێچیرڤان بارزانی: ته‌نێ وه‌که ببیرانینه‌کێ، ئه‌ز د مه‌راسیما سۆندخوارنا ڕه‌جه‌پ تەیپ ئه‌ردۆگان دا کو سالا بهۆری برێڤه‌چوو، ئاماده بووم. ئه‌و ژی یه‌که‌مین سه‌ردانا من یا پشتی ڕه‌فه‌راندومێ بوو. من هه‌رتم ب زه‌لالی و ئاشکه‌ره گۆتیه، پەکەکە هێجه‌تان چێ دکه ژ بۆ ترکیا ده‌ستوه‌ردانێ بكە . ئه‌م نکارن ڤێ یەكێ قه‌بوول بکن کو هه‌رێما کوردستانێ، ژ ئالیێ کۆمه‌که ب ڤی ئاوایی ڤه، وه‌که ناڤچه‌یه‌کێ ژ بۆ پێکانینا ئۆپه‌راسیۆنان ل دژی جیرانێن مه وه‌ره بکارانین. له‌وما دڤێ ئه‌م نیگه‌رانیێن ئه‌وله‌هیێ یێن ترکیێ یێ ڕه‌وا به‌رچاڤ بگرن. هه‌ر چه‌ندە ئه‌ڤ کێشه ده‌مه‌که درێژه کو به‌رده‌وامه، لێ به‌لێ ئه‌و یه‌ک زه‌لاله کو چاره‌سه‌ریا سه‌ربازی نکاره ڤێ کێشه‌یێ ب ئاوایه‌کێ یه‌کجاری چاره‌سه‌ر بکه. له‌وره ژی د داویێ دا پێویسته گۆتووبێژ هه‌به. به‌رێ مه کاری د گه‌ل برێز ئه‌ردۆگان باخڤن، هه‌م وێ ده‌ما کو سه‌رۆکوه‌زیر بوو، هه‌م ژی نها کو سه‌رۆکه، ئه‌و ژی ژ بۆ وێ یه‌کێ کو ئه‌م ڕه‌وشه‌کێ چێ بکن کو ئالیکار به ژ بۆ پرۆسه‌یا ئاشتیێ و ژبۆ ده‌ستپێکرنا گۆتووبێژێ. هه‌روها مه ئالیێن دن ژی ئانی سه‌ر قه‌ناعه‌تێ کو ئه‌ڤ ئاشتی و گۆتووبێژ ئێكانە ڕێیا ڕاست یا پێشڤه‌چوونێ یه.
پرس: نها ژی د ڤێ باوه‌ریێ دایی کو ئه‌ڤ گۆتووبێژ، گۆتووبێژا ئاشتیێ د گه‌ل ڤێ گرووپێ، ل گه‌ل پەکەکێ چێ ببه؟ چمکو وها خویا دبه کو سه‌رۆک ئه‌ردۆگان ناخوازه گۆتووبێژێ د گه‌ل وان یان ژی د گه‌ل گرووپێن کورد ئێن “نه‌ته‌رۆریست” دا ژی بکه.
نێچیرڤان بارزانی: ئه‌گه‌ر مه‌به‌ستا ته ئه‌ڤه کو ئه‌ڤ پرس ب ته‌مامی وه‌ره چاره‌سه‌رکرن، دڤێ ئه‌ڤ گرووپ ژی تێده به‌شدار ببه.
د داویێ دا موویه‌سسه‌ر یلدز دبێژه: “ ئه‌ز نزانم چ گرێدانه‌ک هه‌یه یان نینە؟ لێ پشتی ڤێ داخویانیا نێچیرڤان بارزانی ب مه‌ھ و نیڤا ده‌ریێ ئیمرالی هاتن ڤه‌کرن.
وه‌رگه‌ر ژ تركیێ/رۆژه‌ڤاکورد
2018.05.18
