پشتی ئه‌نفالا سالا ۱۹۸۸ێ ل بادینان، ٦ کادرۆ و پێشمه‌رگه‌یێن پارتیا ده‌مۆکراتا کوردستانێ (پەدەک) د نه‌ورۆزا سالا ۱۹۸۹ێ دا ڤه‌گه‌ریان باشوورێ کوردستانێ و راگەهاندن کو شۆره‌شا کوردستانێ هێشتا یا به‌رده‌وامه و پێشمه‌رگه دێ ب مەفرەزە و کۆمێن جودا و بچووک ڤه‌گه‌ره کوردستانێ.
مەفرەزەیەکا پێشمه‌رگه گەهشتن گوندێ شیڤرەزانێ یێ ل سه‌ر سینۆرێ باکور و باشوور ل باکورێ کوردستانێ و ل وێرێ ژی مێڤانێ گوندیان بوون کو چه‌ند چه‌کدارێن پەکەکێ ژی نێزیکی وان بوون، چەکدارێ پەکەکێ ژ وان را گۆتن:
“پشتی چه‌ند مه‌هان ژ ئه‌نفالا بادینان ئه‌م ل سه‌ر ڤان سینۆرانن و باشه هه‌ر ته‌ڤگه‌ره‌ک کو هوون ل ڤێ ده‌ڤه‌رێ بکن ب هه‌ماهه‌نگیا هێزێن مه را بە ژ بۆنا ڤێ یەکێ ژی بەرپرسەکێ مە ل نێزیک گوندە و دخوازە ل سەر هەڤاهەنگیێ ب وەرا بئاخڤە.”
وێ ده‌مێ پەدەکێ هایا وان ژ رێکه‌فتنا ناڤبه‌را پەکەکێ و رژێما به‌عسێ نه‌بوو و نزانیبوو کو پەکەکە دگه‌ل رژێما به‌عس ل هه‌ڤ کریه کو رێ ل ته‌ڤگه‌را پێشمه‌رگه بگره. ژ به‌ر ڤێ یه‌کێ پێشمه‌رگه چوون جه‌م به‌رپرسێ پەکەکێ. چه‌کدارێن پەکەکێ ژ وان را دبێژن، ژ به‌ر کو قەرەقۆلەکا ئارتێشا ترکیێ ل نێزیکی گوند هه‌یه، نه کو مە ببینن ل مە بدن، چێتره بێ چه‌ک بن.
پێشمه‌رگه ژی ب دلێ سافی بێ چەک دگەل چەکدارێ پەکەکێ چوون با وی بەرپرسێ پەکەکێ، قەد د هزرا ێشمەرگە دا نەبوو کو دێ پەکەکە خیانەتێ ل وان بکە، ژ به‌ر کو ژ سالا ۱۹۸۳ێ ڤه پێشمەرگە گەلەک و ب هەر ئاوایی ئالیکاریا گه‌ریلایێن پەکەکێ کربوون و ژ ئالیێ دن ڤه ژی هایا وان ژ رێکه‌فتنا پەکەکێ دگه‌ل رژێما ئیراقێ ل دژی پێشمه‌رگه نه‌بوو. پەکەکێ ئەو هەر ٦ پێشمەرگە گرتن و برنە زاخۆیێ و راده‌ستی هێزێن ئیراقی کرن. پێشمەرگە ل ئەمنا دهۆکێ کەتنە بن لێپرسین و ئیشکه‌نجه‌یا بەعسیان.
رژێما بەعس ئەو پێشمه‌رگه جارەکا دن راده‌ستی پەکەکێ کر کو ب خوه وان بکوژن. ئه‌و پێشمه‌رگه‌یێن کو، که‌له‌پچه‌کری بوون، برن چیایێ، مه‌لا نزارێ تاوێ، ل هه‌مبه‌ر گوندێ شیڤرەزانێ ل ئالیێ باشوور و هه‌ر شه‌ش پێشمەرگە شه‌هید کرن.
ل گۆر گۆتنا خەلکێ گوندێ شیڤرەزانێ، چه‌کدارێن پەکەکێ ڤه‌گه‌ریانه گوند و چه‌کێن کادرۆ و پێشمه‌رگه‌یان برن.
ناڤێ شه‌هیدان:
۱- ئیدریس جه‌رجیس “ئه‌حمه‌د کاده‌ر”، د سالا ۱۹٥۳ێ ل گوندێ به‌ربیر یا دەڤەرا شێخان ژداییک بوویه.
۲- سەعدۆلا ئاڤده‌ل د سالا ۱۹٥٤ێ ل گوندێ غلبیشێ یا دەڤەرا بامه‌رنێ ژداییک بوویه.
۳- محه‌مه‌د حه‌مدی، د سالا ۱۹٤۹ێ ل گوندێ وەرمێلی یێ دەڤەرا بامه‌رنێ ژداییک بوویه.
٤- نزار محه‌مه‌د سلێمان، سالا ۱۹٦٦ێ ل گوندێ خه‌رابیێ سه‌ر ب ده‌ڤه‌را زاویتە ژداییک بوویه.
٥- خالد ئاده‌م حسێن، د سالا ۱۹٦٦ێ ل گوندێ وەرمێلی یێ دەڤەرا بامه‌رنێ ژداییک بوویه.
٦- نازمی ئه‌حمەد چوولی، سالا ۱۹٦۹ێ ل گوندێ وەرمێلی یێ دەڤەرا بامه‌رنێ ژداییک بوویه.
ژ فێسبۆکا
حامید گەوهەری
