سیاسی

یەكێتیێ ئەو رادەستی ئیرانێ كر و حكومەت ژی نەئاگادارە

مسته‌فا سه‌لیمی وەلاتپەروەر و شۆره‌شگێره‌کێ کوردێ ڕۆژهلاتێ کوردستانێ یه‌، ئەو به‌ری دو ھەیڤەكێ ژ به‌ندیخانه‌یەكا ئیرانێ ڕه‌ڤیابوو و خوه‌ سپارتبوو باشوورێ کوردستانێ. ل باشوور ژ ئالیێ هێزێن ئاسایشا یەكێتیا نشتمانیا كوردستانێ (یەنەکە) ڤه‌ ب هێجه‌تا پشکننینا کۆرۆنایێ وی ب خوه‌ ڕه‌ دبن و پاشێ ڕاده‌ستی هێزێن ئیرانێ دکن. حكومەتا ئیران ژی مسته‌فا سه‌لیمی ل به‌ندیخانه‌یا سه‌قز ئعیدام کر.

عەلی ژاڤانماردی ل سەر ڤێ پرسێ د ملپەرا خوه‌ یا تۆرا جڤاکیا فێسبۆكێ دا دنڤیسە: مسته‌فا سه‌لیمی ده‌مژمێر چارێ سبه‌هیا رۆژا شه‌میێ (2020.04.11) ل به‌ندیخانه‌یا سه‌قز هاته‌ ئعیدام کرن. خه‌لکێ ڕۆژهلاتێ کوردستانێ ل وان كەسێن سه‌لیمی ڕاده‌ستی ڕژیێما ئیرانێ کریه‌ خوه‌ش نابن. یه‌کیتیا نشتمانیا كوردستانێ ژی هه‌تا نها ب فه‌رمی به‌سڤ نه‌دایه‌.

ژاڤانماردی دبێژه‌ كو د ڤێ رەوشێ دا هنده‌ک که‌س هه‌ولدان ڤێ بوویەرێ بێ رێدا ببن و دبێژن كو شه‌هید مسته‌فا سه‌لیمی زیندانیێ سیاسی نه‌بوو ڕاده‌ستکرنا وی ب کۆمارا ئیسلامی ئاسایی بوو.لێ ل گۆر ژاڤانماردی، مسته‌فا سه‌لیمی به‌رێ د گه‌ل سابیر ستاری و یه‌حیا ئیلوپێشمه‌رگه‌ بوو و ل مالا ئه‌تاخانێ ل باشماخ که‌تیه‌ شه‌ر د گه‌ل تاقمه‌کا ڕژێما ئیرانێ. د وی شەری دا دو پاسدار و بەرپرسەكێ هێزا ئینتزامی ل ور هاتنه‌ کوشتن. یه‌حیا ئیلو د وی شه‌ر دا جانێ خوه‌ ژ ده‌ست دا و پاسداران ته‌رمێ وی ب ئۆتۆمۆبیلەكێ ل ناڤا باژار دا ڕاکێشان “هه‌تا ببە ده‌رس و په‌نده‌ک ژ بۆ خه‌لکی”. سابیر سه‌تاری ل پێنجوێن ھات تەرۆر کرن و مسته‌فا سه‌لیمی ب خوه‌ ڤه‌گه‌ریا و ڕێژیما ئیرانێ یه‌کسه‌ر ئه‌و گرت و هه‌تا ده‌ما به‌ری مه‌هه‌کێ ژ به‌ندیخانه‌یێ ڕه‌ڤی بوو. مسته‌فا سه‌لیمی ۱۷ سالێن ڕه‌به‌ق د زیندانێ دا بو و هنده‌ک که‌سێن کو به‌رێ تۆمه‌تا ئیتلاعاتێ پێڤە نابوون، ژ بۆ وان ده‌رکه‌ت کو که‌سه‌کێ شۆره‌شگێره‌.

عەلی ژاڤانماردی ڕۆژنامه‌ڤانێ ژ ڕۆژهلاتێ کوردستانێ دبێژه‌: خیانه‌ت و یێ ژ پشت ڤە خەنجەرێ ل پشتا ڕۆژهلاتێ كوردستانێ بدە ژ ئالیێ چ هێزه‌ک ڤه‌ نایێ قه‌بول کرن! یه‌کێتیا نشتمانیا کوردستانێ و حکومه‌تا هه‌رێما کوردستانێ دڤێ به‌رسیڤا 10 ملیۆن کوردێن ڕۆژهلات بده‌. ئیسمائیل به‌رپرسێ ئاسایش و کامه‌ران کادرێ ئاسایشا پێنجوێن و شێخ ئاوات به‌رپرسێ ئاسایشا سه‌یرانبه‌ند گه‌لۆ وان ب ئاگاداریا سه‌رکردایه‌تیا یەنەکێ و ب هه‌ڤکاریا قه‌رارگه‌ها ڕه‌مه‌زان ئەڤ تاوان کرنه‌ یان ژی سه‌ربخوه‌ ب وی كاری رابوونە؟

ل سەر بێ ڤێ پرسێ، كەیسا رادەستكرنا مستەفا سەلیمێ ب ئیرانێ، پەیڤدارێ حكومەتا كوردستانێ د داخویانیەكێ دا دبێژە كو حكومەتا كوردستانێ ئاگەھ ژ ڤێ بوویەرێ نینە و ئەگەر كارەكێ وسا ھاتبە كرن ژی بێی ئاگاداریا حكومەتێ ھاتیە كەن.
ل گۆر جوتیار عادل پەیڤدارێ حكومەتێ، ل سەر فەرمانا سەرۆكوەزیرێ كوردستانێ بریار ھاتیە دان ژ بۆنا دووڤچوونا ڤێ پرسێ كۆمیتەیەك بێ ئاڤاكرن.

Back to top button