یەكێتیێ 7 بەربژێر ژ بۆ پۆستا وەزیرێ پێشمەرگە ھەنە
یه‌کێتیا نشتمانیا کوردستانێ (ینک) هه‌تا نها نکاره د ناڤا خوه دا ل سه‌ر ده‌ستنیشانکرنا به‌ربژێران ژ بۆ پۆستێن د کابینه‌یا نوو یا حکومه‌تا کوردستانێ دا پشكا وێ نە دیار بکه و هه‌ر دچه و ئه‌و ناکۆکی کوورتر و به‌رفره‌هتر دبن.
ده‌ستپێکێ ناکۆکیێن ناڤا یەكێتیێ ل سه‌ر ده‌ستنیشانکرنا کاندیدێ/ا سه‌رۆکێ/ا پارلامه‌نتۆیا کوردستانێ بوو. یەكێتیێ دوو کانید ژ بۆ سه‌رۆکێ پارلامه‌نتۆیێ هه‌بوون؛ ڕێواز فاییق و بێگه‌رد تاله‌بانی و باسک و گرووپێن ناڤا یەكێتیێ کر-نه‌کر و هه‌تا نها نکارینه ل سه‌ر ده‌ستنیاشنکرنا یه‌ک کاندید ل هه‌ڤ بکن و ژ بن ڤی باری ده‌رکه‌ڤن.
نها پۆستا وه‌زیرێ پێشمه‌رگه ناکۆکیێن ناڤا باسک و گرووپێن یەكێتیێ کوورتر کرن و ل گۆر مالپه‌را په‌یسپرێسس پۆستا وه‌زیرێ پێشمه‌رگه ناکۆکیان د ناڤ باسک و گرووپێن ینکێ دروست دکه و 7 که‌س ژ بۆ بده‌ستخستنا وێ پۆستێ ڕکابه‌ریێ دکن.
ل گۆر زانیاریێن وێ مالپه‌رێ هه‌ر یه‌ک ژ؛ مه‌حموود سه‌نگاوی، مسته‌فا چاڤره‌ش، سامان گه‌رمیانی، جه‌بار یاوه‌ر، عه‌دنان حه‌مه‌ی مینا، سیروان کوێخا نه‌جم و جەعفه‌ر شێخ مسته‌فا داخوازا پۆستا وه‌زیرێ پێشمه‌رگه دکن.
ئه‌ڤ 7 کاندیدێن ژ بۆ پۆستا وه‌زیرێ پێشمه‌رگه ب سه‌ر بال و گرووپن یەكێتیێ دا دابه‌ش بوونه و هه‌ر باله‌ک دخوازه کاندیدێ خوه بده پێش و سه‌ربخه.
به‌شک ژ وان به‌ربژێران هشداریا دایه سه‌رۆکاتیا یەكێتیێ کو ئه‌گه‌ر ئه‌و بێن ئیهمال کرن دێ پرسگرێکا چێ کن.
ل گۆر لهه‌ڤهاتنا پارتیا ده‌مۆکراتا کوردستانێ (پدک) و یه‌کێتیا نشتمانیا کوردستانێ (ینک) ل سه‌ر پێکانینا کابینه‌یا نوو یا حکومه‌تا کوردستانێ پۆستا وه‌زیرێ پێشمه‌رگه دگه‌ل 5 وه‌زاره‌تێن دن ژ بۆ یەكێتیێ یه‌کئالی بوویه، لێ هێشتا یەكێتی د ناڤ خوه ده نکاریه لهه‌ڤ بکن ل سه‌ر یه‌کئالیکرنا پۆستا سه‌رۆکێ پارلامه‌نتۆیا کوردستانێ د ناڤبه‌را ڕێواز فایێق و بێگه‌رد تاله‌نبانی دا، گه‌لۆ ئه‌و دێ چه‌وا پۆستا وه‌زیرێ پێشمه‌رگه د ناڤه‌به‌را 7 کاندیدان دا وكاندیدا ژ بۆ 5 وه‌زاره‌تێن دن سافی بکن.
