ل دیاربه‌کرێ هەدەپە و ده‌ردۆرا خوه ب ناڤێ ۱۰ پارتی و ئالیێن کورد جڤینه‌ک ژ بۆ پێکانینا “یه‌کێتیه‌ک نه‌ته‌وی“ ل دارخست. ل باکورێ کوردستانێ ب ته‌نێ پارتیا ئازادیا کوردستانێ (پاک)، پارتیا سۆسیالستا کوردستانێ (پسک)، پارتیا ماف و ئازادیان(هاک-پار) و هودا-پار ته‌ڤلی جڤینا هەدەپێ نه‌بوون.
پاک و پەسەکێ سه‌ده‌مێن ته‌ڤلینه‌بوونا خوه یا جڤینێ ب داخوویانیه‌کێ ژ ڕایا گشتی را دان خوویاکرن.
ئالیێن ته‌ڤلی جڤینێ بوویین گه‌ره‌ک یه‌ک ب یه‌ک باش ب به‌رچاڤ را بهێنه ده‌رباس کرن. هه‌موو ئالیێن کو ته‌ڤلی جڤینێ بوویین ژ خوه ژ هلبژارتنێن هه‌رێمی دا د گه‌ل هەدەپێ یه‌کێتیه‌ک ئاڤاکریبوون و ئه‌ڤ یه‌کێتیا وان هێشتا به‌رده‌وامه. یانی جڤینا دیاربه‌کر و تشتێن کو ژ بۆ ڕایا گشتی ڕاگەهاندین نه بوویه‌ره‌ک نوویه و ژ به‌ری نها ژی ئه‌ڤ شانۆگەریە هاتیه له‌یزتن.
ل باکورێ کوردستانێ کورد پێوسته ڕاستیا خوه ببینن و دۆزا کورد ژ بۆ خوه نه‌کن مژارا هنده‌ک ده‌ستکه‌فتیێن گروبان و به‌رژه‌وه‌ندییێن که‌سایه‌تی.
ژ به‌ری هه‌ر تشته‌کی ده‌ما مرۆڤ به‌حسا یه‌کێتیه‌ک نه‌ته‌وی بکه، دڤێ ل سه‌ر ڕێباز و خه‌ته‌ک نه‌ته‌وی سیاسه‌تێ بکه و دۆزا مافێن ڕه‌وا یێن نه‌ته‌وەیی بکه. ل باکورێ کوردستانێ ب ته‌نێ ب گۆتن به‌حسا یه‌کێتیا نه‌ته‌وی تێ کرن، لێ چ جارا به‌حسا ناڤه‌رۆکا ڤێ یه‌کێتیێ ناهێتە ئه‌شکه‌را کرن.
ژ به‌ری هه‌ر تشته‌کی هەدەپ خوه وه‌ک ته‌ڤگه‌ره‌ک کوردستانی نابینه، وه‌ک ته‌ڤگه‌ره‌ک یا ترکیێ خوه ب ناڤ دکه. هنده‌ک ئالیێن کو ئیرۆ ل گه‌ل هەدەپێ ڕێدکه‌ڤن گه‌له‌ک جارا هەدەپە وان ب دژاتیا کوردا تاوانبار کرنه و هه‌تا ڕاده‌یه‌کی دانه خوویاکرن کو ئه‌و چ جارا د گه‌ل هەدەپێ هه‌ڤکاریا پێکناینن.
د ده‌ما هلبژارتنێن هه‌رێمی دا ل سه‌ر بنگه‌هێ وەرگرتنا شارەداریەکێ یا ناڤچه‌یه‌کی یان ژی ده‌ستخستنا چه‌ند ئه‌ندامێن مه‌جلسێن شاره‌داریان هنده‌ک پارتیان ب ناڤێ هه‌ڤکاریێ خوه ڕاده‌ستی هەدەپێ کرن. نها ژی ب ناڤه‌ک دن ڤێ هه‌ڤکاریێ دخوازن ده‌کله‌ره بکن.
ل گۆرا هەدەپێ ژ خوه ل بروکسه‌لی یه‌کێتیه‌ک نه‌ته‌وەیی هه‌یه و کۆنگرەیا نەتوەیی یا کوردستانێ (کەنەکە) ده‌زگه‌هه‌که کو نمونه‌یا یه‌کێتیا نه‌ته‌وەیی یه. ژ ئالیه‌ک دن ژ خوه ل باکورێ کوردستانێ ده‌زگه‌هه‌ک ب ناڤێ کۆنگره‌یا جڤاکا ده‌مۆکراتیک هه‌یه. پرانیا ئالیێن کو د جڤینێ دا ئاماده بووین د ناڤا ڤێ ڕێخستنێ دا هەنە.
پارتیێن ته‌ڤلی جڤینا دیاربه‌کرێ بووین:
حه‌ره‌که‌تا ئازادی
پارتیا ئازادی
پارتیا ده‌مۆکراتیک یا هه‌رێمان
کۆمه‌له‌یا کورد یا شۆره‌شگه‌ر و ده‌مۆکرات – ددکد
کۆنگره‌یا جڤاکا ده‌مۆکراتیک – کجد
پارتیا ده‌مۆکراتیک یا گه‌لان – هدپ
پارتیا ئینسان و ئازادیێ – پیا
پارتیا کۆموونیست ئا کوردستانێ – ککپ
پلاتفۆرما ده‌مۆکراتێن کورد – پدک-باکور
پارتیا ده‌مۆکراتا کوردستانا ترکییه -پدک-ت
ژ خوه پرانیا ڤان ده‌زگه‌هان ب ناڤێ جودا سیاسه‌تا پەکەکێ ڕێڤه دبن و وه‌ک یه‌ک ڕێخستن کار دکن. پارتیا ئازادی و حه‌ره‌که‌تا ئازادی ل گه‌ل هەدەپێ ته‌ڤدگه‌رن و هێز و ڕه‌وشا وان ل کوردستانێ کفشه. د ڕاستیا خوه دا ب ته‌نێ وه‌ک ناڤ هه‌نه. ددکد، تشته‌ک ب ڤی ناڤی ته‌ڤبگه‌ره نینە ، ته‌نێ کۆمه‌له‌یه‌کە ل دیاربه‌کرە و هه‌موو کار و خه‌باتا وان ژ بۆ هەدەپێ یه و پارله‌مه‌نته‌رێ هەدەپێ ئیمام تاشچه‌ر میناکا هه‌ری مه‌زنه.
ژ خوه هه‌وجه ناکه کو مرۆڤ به‌حسا پارتیا ئینسان و ئازادیێ – پیا و پارتیا کۆموونیست یا کوردستانێ – ککپ بکه دو ناڤێن کو ل گۆرا سیاسه‌تا هەدەپێ ته‌ڤدگه‌رن.
ل ڤێ ده‌رێ پلاتفۆرما ده‌مۆکراتێن کورد – پدک-باکور و پارتی ده‌مۆکراتا کوردستانا ترکییه -پدک-ت بالا مرۆڤ دکشینن. ڤان هه‌ردو ته‌ڤگه‌ران ژی د هلبژارتنێن هه‌رێمی دا خوه ب ته‌مامی ژ بۆ شاره‌داریا ناڤچه‌یا پیران و ناڤچه‌یا چنارێ ڕاده‌ستی هەدەپێ کرن.
به‌رێ هنده‌ک ئیدایێن ڤان هه‌ردو ئالیان د ده‌ربارێ هەدەپێ دا هه‌بوون گه‌لۆ چ ژ ڤان ئیدائایان هات که‌سه‌ک نزانه. ژ خوه پشتی ڤان هه‌ردو ئالیان هه‌ڤکاری دگه‌ل هەدەپێ کرن، پرانیا هه‌ڤالێن وان و ڕێخستنا وان ژ ده‌ڤ وان به‌ردان و نها ژی وه‌ک دو که‌سایه‌تێن مارژنال ل گه‌ل هەدەپێ ته‌ڤدگه‌رن.
ب کورتاهی جڤینا ل ئامەدێ شانۆگەریه‌کە کۆ ل سه‌ر ناڤێ کوردا ل باکور تێ له‌یزتاندن.
