ده‌مه‌كێ گه‌له‌ک درێژه ژ بۆ دامه‌زراندنا حوکومه‌تا کوردستانێ یا نوو د ناڤبه‌را ئالیێن سیاسی دا جڤین و هه‌ڤدیتن تێنه کرن. لێ هه‌تا نھا ئالیێن سیاسی نەگەھشتنە ئه‌نجامه‌کی.
ھەر ئالیەك ئالیێ دن یێ بەرامبەر ب ڤێ رەوشا ھەیە گەنەھبار دكە و ب سەبەبێ پێكنەھاتنا حكومەتێ دزانە.
پارتی دبێژە كو یەكێتی و تەڤگەرا گوران ل سەر دەستنیشانكرنا دەستھەلاتێن جیگرێ دوویەم یێ سەرۆكێ ھەرێما كوردستانێ ل ھەڤ نەكریە.
یەكێتی دبێژە كو سەبەبێ پێكنەھاتنا حكومەتێ پارتی و تەڤگەرا گوران ل سەر زێدەكرنا پۆستا جێگرێ دویەم ژ بۆ سەرۆكێ ھەرێما كوردستانێ پێكنەھاتنە.
گوران دبێژە كو پارتی و یەكێتی ل سەر دابەشكرنا پۆستێن ئەمنی د حكومەتا نوو دا پێكنەھاتنە.
لێ ھەر كەس ل باشوورێ كوردستانێ دزانە کو هه‌لوه‌ستا یەكێتیا نشتمانیا كوردستانێ (یەكێتی) و ناکۆکیێن د ناڤا وێ دا هه‌نە سه‌ده‌مێ بنگه‌هین یێ ڤێ ڕه‌وشێ یە.
ئەگەرەك دن ژی ئەڤە كو پارتیا دەمۆكراتا كوردستانێ (پدك) ئیسرار دكە یەكێتی د ناڤا حوکومه‌تێ دا ھەبە و یەكێتی ژی ڤێ ھەلوەستا پارتیێ ژبۆ بەرژەوەندیێن خوە و زێدەكرنا شەرتێن خوە بكارتینە..
یەكێتیێ ئێدی باوه‌ریا خوه ژ ده‌ست دایه، لێ بڤێ نه‌ڤێ ھێشتا پارتیا دویه‌مه ل باشوورێ کوردستانێ.
مه‌حموود محه‌مه‌د بەردەڤكێ پارتیێ د داخویانیەكا خوە دا دبێژه: “د ئاڤاکرنا حکومه‌تێ دا مه‌رج ب سه‌ر که‌سی ده نایێن فه‌رزکرن و ته‌نێ داخوازه‌کا یەكێتیێ هه‌بوو، لێ مه به‌رێ گۆتبوو ئه‌م مه‌رجان ژ که‌سێ ل سه‌ر خوه قه‌بوول ناکن. ئه‌گه‌ر داخوازه‌کا ئالیه‌کی هه‌به ژی پێوسیته ل سه‌ر وێ داخوازێ د ناڤبه‌را هه‌موو ئالیێن د ناڤا حکومه‌تێ دا بەشدار دبن هه‌ڤتێگهه‌شتن چێببه، له‌وما ژی ئه‌م هه‌ول ددن ژ بۆ کو ئه‌و هه‌ڤتێگهه‌شتن چێببه و چ پرسگرێک د ناڤبه‌را مه و گۆران ده ده‌رنه‌که‌ڤه.”
به‌رده‌ڤکێ پارتیێ ته‌که‌ز دکه ل سه‌ر هه‌ولێن پارتیێ یێ ژ بۆ ئاڤاکرنا حکومه‌تا نوو یا کوردستانێ و دبێژه: “به‌ریا نها مه و گۆران ل سه‌ر کورسیێن کو دێ بگهێن گۆران، لهه‌ڤ کربوو. مه و یەكێتیێ ژی لهه‌ڤ کربوو، لێ تشتا کو مابوو پۆستا جیگرێ سه‌رۆکێ هه‌رێما کوردستانێ بوو، کو یه‌ک جیگر یان دوو جیگر هه‌بن. ئه‌و پرسگرێک د ناڤبه‌را یەكێتی و گۆران دا بوو، کو یەكێتی داخوازا هه‌مان کورسیێ وان دکر. یەكێتی و گۆران داخوازا هه‌مان کورسی دکن. نها ئه‌ڤ مژار د ناڤا گۆتووبێژان و چاره‌سه‌رکرنێ دا یه. 90% ژ خه‌باتێن ئاڤاکرنا حکومه‌تا نوو یا کوردستانێ بداوی هاتنه و تشتا کو مایه ژی دێ د ڤان ڕۆژان ده بداوی ببه.”
ل گور داخویانیا بەردەڤكێ پارتیێ ئاریشە د ناڤبەرا یەكێتی و تەڤگەرا گوران دا یە.
