ده‌ما مرۆڤ به‌حسا هه‌ستێن نه‌ته‌وی دکه ژ به‌ری هه‌ر تشته‌کی دڤێ باش بھێت زانین کا هه‌ستێن نه‌ته‌وی تێنه چ واته‌یێ. ل کوردستانێ ده‌ما مرۆڤ خوه‌دی هه‌ستێن نه‌ته‌وی به ، دڤێ مرۆڤ کوردستانی به، به‌رژه‌وه‌ندیێن نه‌ته‌وه‌یێ کورد د سه‌ر هه‌ر تشته‌کی را بگره ول گۆرا ڤێ یه‌کێ ژی ته‌ڤ بگه‌ره. ئه‌گه‌ر تو د بیر و باوه‌ریا خوه دا ل دژی ده‌وله‌تبوونا نه‌ته‌وه‌یی بی، و تو د سیاسه‌تا خوه دا نه‌ته‌وەیه‌تیێ قەبوول نەكی ، دێ تو چه‌وا خوه‌دی هه‌ستێن نه‌ته‌وی بی؟
گه‌له‌ک ژ کوردێن به‌شێن دن یێن کوردستانێ و تایبه‌تی ژ باشوورێ کوردستانێ ل گۆرا هنده‌ک بوویه‌رێن بەسیت ته‌ڤگه‌را کورد ل باکورێ کوردستانێ دنرخینن. تایبه‌تی ئه‌و کوردێن کو ل ئه‌ورۆپایێ ماین گه‌له‌ک ب هه‌ستێن حسسی ل باکورێ کوردستانێ دنێرن و ڕاستیا سیاسی کو ل باكور هه‌ییە، نابینن.
ڕاسته کوردێن باکور پشته‌ڤانیا شۆره‌شێن ل به‌شێن دن هاتین کرن كریە. تایبه‌تی شۆره‌شا ئیلۆنا پیرۆز کو د سه‌رۆکاتیا نه‌مر مسته‌فا بارزانی دا هاتی کرن، بوو سه‌ده‌مه‌ک بنگه‌هین ل هه‌موو به‌شێن کوردستانێ کورد ب کوردبوونا خوه حه‌سیان و پشتگریا ڤێ شۆره‌شێ کرن. ژ به‌رکو ئه‌ڤ یه‌که‌مین شۆره‌ش بوو کو، یه‌کتیه‌ک د ناڤا هه‌موو کوردان دا د ناڤه‌رۆکا خوه ده په‌یدا کر.
لێ ئیرۆ ته‌ڤگه‌را پارتیا كاركەرێن كوردستانێ (پەکەکە) و ڕێخستنێن ب وێڤه گرێدایی ل باکورێ كوردستانێ سه‌رده‌ستن و ته‌ڤگه‌را وان نه ته‌ڤگه‌ره‌ک کوردستانیه و ل دژی هه‌موو جوره‌یێ نه‌ته‌وەیه‌تیێ نه. هه‌روه‌ها هه‌مان ته‌ڤگه‌ر شۆره‌شا ئیلۆنا پیرۆز وه‌ک شۆره‌شه‌ک نه‌ته‌وەیی نابینه و نرخاندنێن وان ل دژی هه‌موو ناڤه‌رۆکا نه‌ته‌وی یا شۆره‌شا ئیلۆنێ یه.
پەکەکە ڤه‌کری دبێژه کو، دیرۆکا سیاسی یا ته‌ڤگه‌را کورد ب وان ده‌ستپێکریه، وه‌ک دن هه‌موو تشتێن دن ڕه‌د و ئینکار دکن.
پەکەکە پرۆژه‌یه‌کا چێكریە کو هه‌ستێن نه‌ته‌وی تێکببه و ئه‌ڤێ یه‌کێ هه‌تا وه‌ک ئیرۆ ژی دكە. کار و خه‌باتا پەکەکە ل باکور، باشوور و ڕۆژاڤایێ کوردستانێ دکه ئەگەرباش نه‌یێ خوه‌ندن، مرۆڤ دێ د شرۆڤە و نرخاندنێن خوە دا شاشیێن مەزن بكە..
پەکەکێ ل باکورێ کوردستانێ هه‌ستێن نه‌ته‌وی تێکبرنه و ل دژی نه‌ته‌ویه‌تیێ کار دكە. هه‌تا وه‌ک ئیرۆ ئالا کوردستانێ کو سه‌مبۆلا نه‌ته‌وه‌یێ کورده، ژ ئالیێ پەکەکێ ڤه نایێ قه‌بول کرن. ئالا کوردستانێ ل ڕۆژاڤایێ کوردستانێ ژ ئالیێ زهنیه‌تا پەکەکێ ڤه هاتیه قه‌ده‌غه کرن. پەکەکە ل دژێ سه‌مبۆلێن نه‌ته‌وییه. پەکەکە ئالا کوردستانێ ل باکور وه‌ک ئالا بارزانیان ب ناڤ دکر و ددا ناساندن.
ڕاسته ب هه‌زاران کورد ب هه‌ستێن نه‌ته‌وی که‌تنه د ناڤا پەکەکێ دا. لێ پەکەکێ ئه‌و ژبونا كو ئارمانجێن پیرۆزێن نه‌ته‌وەیی تێکببه، بکارانینه. هه‌روه‌ها تێ زانین کو پەکەکێ ب هه‌زاران لاو و که‌چێن کورد کو ب هه‌ستێن نه‌ته‌وەیی ته‌ڤلی پەکەکێ بوونه د ناڤ خوه دا کوشتنه، تەسفیە كرنە.
نھا، ب تایبەتی ل باشوورێ كوردستانێ، گرووپەك چێبوویە كو ژ ھندەك كەسێن خوە ب رەوشەنبیرو سیاسەتمەدار دزانن و چەند ماموستایێن زانكۆیێ ژی د ناڤ دانە، ھەر نڤیسا ل جھەكی ل سەر پەكەكێ بێ نڤیسین و پەكەكێ رەخنە بكە، ئەو گروپ یەكسەر بەرسڤێ ددن، بەرڤانیێ ژ پەكەكێ دكن و سیاسەتا وێ دپارێزن و ل داویێ ژی دبێژن بلا كەز مە وەكە پەكەكە حساب نەكە. ئه‌م ڤان جوره‌یێن سیاسه‌تمه‌داران ناس دکن. ئه‌و کی به ئیرۆ ژی پەکەکلیه لێ ژ پەکەکلیا خوه شه‌رمێ دکن. ئه‌م دبێژن ڤان جوره‌یێن ئینسانان پەکەکلیێن شه‌رمۆک.
گه‌لۆ پەکەکلیێن شه‌رمۆک دزانن کو ،ئیرۆ ته‌هدیتا هه‌ری مه‌زن ل سه‌ر باشوورێ کوردستانێ سیاسه‌تا پەکەکێ و پەکەکە ب خوه‌یه؟ گه‌لۆ ژ ئه‌نجاما شه‌رێ پەکەکێ ل باکورێ کوردستانێ کری هه‌تا وه‌ک ئیرۆ گونده‌ک ژی ئازاد کریه؟ لێ مخابن ژ ئه‌نجاما سیاسه‌تا نه‌زانێن وه‌کو پەکەکلیێن شه‌رمۆک، پەکەکە ل گه‌له‌ک ده‌ڤه‌رێن باشوورێ کوردستانێ سه‌رده‌سته و ناهێله کو حوکومه‌تا كوردستانێ ب سه‌دان گوندان ئاڤا بکه.
پەکەکە ل دژی باشوورێ کوردستانێیه، پەکەکە ل دژی ده‌وله‌تبوونا باشوورێ کوردستانێیه. پەکەکە ژ بۆ ڤێ ناوه‌ندێ تێک ببه هه‌موو کاره‌کی دکه، لێ یا تراژه‌دی ئه‌وه کو که‌سێن وه‌ک گروپا پەکەکلیێن شه‌رمۆک ب نه‌زانین دبن خزمه‌تکارێ سیاسه‌تا کو هه‌ولدده ڤێ ناوه‌ندێ تێک ببه.
ده‌وله‌تا ترک ده‌وله‌ته‌ک دژمنه. به‌شه‌ک یێ کوردستانێ داگیر کریه و ژ بۆ هه‌ستێن نه‌ته‌وویی تێک بده هه‌موو کار و خه‌باتێ دکه. جومهوریه‌تا ترکیێ ل سه‌ر ئینکار و نەھێلانا کوردان هاتیه ئاڤاکرن. ئیدیۆلۆژیا فه‌رمی یا ده‌وله‌تا ترک کوردان و کوردستانێ قه‌بوول ناکه. سه‌مبۆل و بنگه‌هێ ڤێ ئیدیۆلۆژیا نژادپه‌ره‌ست که‌مالیزمه.
لێ مخابن ئۆجالان و گه‌له‌ک به‌رپرسێن پەکەکێ هه‌ر ده‌م وه‌سفێ ئەتاتورک ددن و ل وێ جومهوریه‌تا ئەتاتورک ئاڤا کری خوه‌دی ده‌ردکه‌ڤن. كا ھەستێن نەتەوەیی؟
بەرگەھ
