پێخەمەت کۆنگرەیەک سەرکەفتی چەند پێشنیار
پرسێن مالپەرێ سبەهی:
ژ کۆنگرەیێ ١٣ یێ پارتییا دەمۆکراتا کوردستان هەتا نها ١٢ سال دەرباس بوون، د ناڤا ڤان ١٢ سالان دا گەلەک بوویەر قەومین و ل دەڤەرێ گەلەک گوهەرتن چێبوون. د رۆژا مە یا ئیرۆ ژی دا، دەڤەر د ناڤ کەلینێ دایە و بەر ب گوهەرتنێن مەزنتر دچە. ل باشوور ژی خەلک ب ئاوایەکی گشتی ژ رەوشا هەیە نەرازیە و گەلەک گلی و گازندە هەنە. د ناڤ ڤێ رەوشا :ئالۆز و تەژی تەڤلیهەڤی دا دێ پەدەکە کۆنگرەیێ خوە یێ ١٤ێ بکە.
١- وە چ هیڤی ژ کۆنگرەیێ ١٤ێ یێ پەدەکێ هەنە؟
٢- ل سەر ئاستا ناڤدەولەتی و جیهانی پێشنیارێن وە ژ بۆ کۆنگرەێی هەنە؟
٣- ل سەر ئاستا ناڤخوەیی، ب تایبەتی ئیدارە و حکومەتێ وە چ پێشنیار هەنە؟
٤- ژ بۆ گوهەرتنێن ناڤخوەیا پارتی و هەیکەلێ وێ هوون چ پێشنیار دکن؟
:بەرسڤێن ئیدریس تروانشی
ئیدریس تروانشی، وەکی کادرەکێ پارتی، د بەرسڤا پرسان دا پێخەمەت کۆنگرەیەک سەرکەفتی کۆمەکا پێشنیاران دکە:
ل گۆر ھەموو پێناسەیێن ئەکادەمی: پارتییا سیاسی کۆمەکا تاکەکەسێن رێکخستی نە، بیروباوەر و ئارمانجێن ھەڤپشک ھەنە، ھەول ددەن ب رێکا میکانزمێن دەموکراسی بگەھیتە دەسھەڵاتێ.
واتە پارتییا سیاسی ل پێشیا ھەر تشتی رێکخستنەکە ژ ھەژمارەکا تاکەکەسێن خودان ئێک بیروباوار پێک دھێت.
ئەگەر مرۆڤ ئێک بیروباوەر بیت، بێ گومان دێ مرۆڤ ل ژێر رۆناھێا ئێک رێباز خەباتێ ژ بۆ ئێک ئارمانجێ ژی کەت.
پارتییا دەموکراتا کوردستان (پارتی) ژی وەکو کەڤنترین و مەزنترین پارتییا سیاسی ل ھەرێما کوردستانێ، گاڤێن خۆ یبن دوماھیێ بەرەف کۆنگرەیێ خوە یێ ١٤ێ دھاڤێژیت، گرێدانا کۆنگرەیی ژبلی کو پرینسیپەکێ دەموکراسیە، پێداویستیەکا فەر و بەردەوامە بۆ ھەر پارتیەکا سیاسی، داکو ھەلسەنگاندنا ئەدائا کارێ خوە ل سەر ھەردو ئاستێن حزبی وەکو پارتییەکا سیاسی و حکومی وەکو دەسھەڵات ئەنجام بدەت.
د ھەمان دەم دا دەلیڤەیەکە ژ بۆ دەستنیشانکرنا خالێن خوە یێن بھێز کو بەردەوامیێ پێ بدەت و یێن لاواز دا چارەسەر بکەت.
تەڤی کو ئەڤە ٣٦ سالە ئەز ئەندام و کادرێ ڤێ پارتیێ مە، لێ چو جارا دەرفەتا پشکداریکرنێ د چو کۆنگرەیێن پارتی دا بۆ من چێنەبوویە، لەوما من ب فەر زانی ھندەک پێشنیاران بێخمە بەردەستێ نوینەرێن مە د ڤێ کۆنگرەیێ دا، ھیڤیدارم ئەگەر ب باش ببینن، ب خەم وەرگرن و کار ژ بۆ جیبجیکرنا وان بکەن:
١- کاراکرنا قاعیدێ حزبی، ب رێکا دابەزاندنا دەسھەڵاتێ بۆ بنکە و رێکخراوێن حزبی کو، راستەوخوە تێکەلی دگەل جەماوەری ھەیە، داکو بشێن دەربرینێ ژ رەئیا حزبێ بکەن و خزمەتا ھاولاتی بکەت و د ئەنجام دا باوەریێ د ناڤبەرا پارتی و جەماوەری دا پەیدابکەن.
٢- کاراکرنا راستەقینە یا کارێ رێکخستنا حزبی، واتە پێکڤەگرێدانا خەلەکێن رێکخستنێ ( بنکە، رێکخراو، لژنێن ناوچا، لق، مەکتەب سیاسی و سەرۆکێ حزبێ)، ب رێکا سەمینار، کۆمبوون، ئامادەبوون، ئابوونەدان، گرنگیدان ب ھزروبیر و بۆچوونێن وان، ب رەنگەکی وەسا دەنگێ بچویکترین ئەندامێ پارتی بھێت بھیستن و بگەھیت مەکتەبا سیاسی و سەرۆکێ پارتی و بەرسڤ ژی ل سەر بھێتە دان.
٣- جیبجیکرنا پرینسیپێ پاداشت و سزا، کو ھەستەکی ل دەف ئەندام و کادرێ پارتی پەیدابکەت، کو سەرکردایەتیا پارتی ئاگەھ ژ چاکی و خرابیێن وی⁄ وێ ھەیە.
٤- سەروشنی ئاڤاکرنا کادرێ پارتی ل سەر بنەمایێ خۆبەخشیێ و بیرو باوەران، نە ل سەر بنەمایێ دەستکەفتیێن مادی و پلە و پۆستان.
٥- پێگیریکرن ب پرینسپێ پلەبەرزکرنا حزبی ل سەر بنەمایێ خزمەت و بەرھەمێ حزبی، کو دەرفەتا پێشکەفتنێ بۆ ھەمی ئەندام و کادرێن چالاک مسۆگەربکەت و قەدەغەکرنا ھەر میکانزمەکێ دی.
٦- دامەزراندنا نڤێسینگەھەکا ناوەندی تایبەت ب میدیا نوو (سۆشیال مەدیا) و ئەف ئەرکە ل گۆر بەرنامەکێ ئەکادەمی زانستی ب کۆمەکا کادرێن شەھرەزا دڤی بیاڤی دا بھێت راسپاتن و د ھەمان دەم دا نڤێسینگەھێن سۆشیال مەدیایێ ل لقێن پارتی بھێن ڤەکرن و سەرپەرشتیکرن.
٧- زێدەکرنا خەرجیێن مەدیایا نوو (سۆشیال میدیا) ل سەر کیستێ مەدیایا کلاسیک (تیڤی، رادیۆ، گۆڤار و رۆژنامە)، چونکە کاریگەریا مەدیایا کلاسیک ل سەر رایا گشتی گەلەک کێم بوویە.
٨- کارکرن ژ بۆ ئاڤاکرنا کۆڵەلگەھەکا مەدەنی و سەردەمیانە و نەھێلانا خەرجیێن کۆچکێن ئاغا و کێمکرنا رۆڵێ وان د ھەلبژارتن و کێشێن جڤاکی دا.
٩- دانانا میکانزمەکێ گونجای ژ بۆ دەستنیشانکرنا بەربژێرێن پارتی بۆ ھەلبژارتنێن ھەردو ئەنجۆمەنێ نوینەرێن عێراقا فدرال و ھەرێما کوردستانێ کو ل گۆر ھەژمارەکا مەرجێن تایبەت بن، (دەستپاکی، ئاستێ زانسی و پێگیری ب سیاسەت و بەرنامێ پارتی و رابردویێ پاک) مەرجێن سەرەکی یێن دەستنیشانکرنا وی⁄وێ بین، دوور بن ژ بنەمایێن عەشیرەت و پەیوەنیێن کەسۆکی.
١٠- قەدەغەکرنا ململانێ و ھەڤرکیا نەرێنی د ناڤبەرا کاردر، ئەندامێن سەرکردایەتیێ و لقێن پارتی دا و زێدەکرنا کارێ ھەڤبەش و ھەماھەنگیێ د ناڤبەرا کادر و ئۆرگانێن پارتی دا، کو د ئەنجام دا مینا یەک تیمێ کار بکەن ژ بۆ سەرخستا پارتی.
١١- قەدەغەکرنا ھەر جۆرە لێدوان و ھێرشەکێ بۆ سەر ھەر ئۆل و باوەری و پێکھاتەکێ جڤاکی.
١٢- نەھێلانا رۆتینێ، ب رێکا ئەلکترۆنیکرنا کارێ حزبی و ڤەکرنا لاپەرەکی بۆ ھەر ئەندامەکێ/ا پارتی کو تایبەت بیت ب رێرەو و دیرۆکا خەباتا وی یا حزبی.
١٣- بەخشینا باوەرنامەکا رێزگرتنێ ب ھەمی پێشمەرگێن ھەردو شۆرشێن ئیلۆن و گولانێ، ھەموو زیندانیێن سیاسی ئەوێن ل سەر خەباتا نھێنی ھاتین گرتن.
١٤- بەخشینا ھندەک ئیمتیازاتێن تایبەت ب ھەلگرێن مەدالیایا بارزانی و کو ئاسانکاریێ بۆ برێڤەبرنا کار و بارێن وان دناڤ دەزگەھێن حزبی و حکومی دا بکەت.
١٥- کۆمبوونێن ئەنجومەنێ سەرکردایەتی و مەکتەبا سیاسی ب ئاوایەکی دەوری ل ھەر چار پارێزگا و ئیدارێن سەربەخوە یێن ھەرێمێ بھێن ئەنجامدان.
١٦- ژبەرکو پارتی خوەدانا پشکا شێرییە د حکومەتا ھەرێمێ دا، لەوما پێدڤیە پارتی ب ھەمی ئەندام و کادرێن خۆڤە پشتەڤانێن سەرخستنا کارناما حکومەتێ بن و ھەر ئەندام یان کادرەکێ پارتی ل دژی حکومەتێ یان حزبێ ژدەرڤەی چارچۆڤێ کۆمبوونێن حزبی یێن دائێخستی لێدوانەکێ بدەت یان پۆستەکی ل سۆشیال مەدیایێ دا بەلاڤ بکەت، دڤێت بھێت سزا دان.
ل سەر ئاستێ ناڤدەولەتی و جیهانێ ژی، پێدڤیە پارتی ل سەر ئاستێ ناڤدەولەتی کار ژ بۆ ناساندنا دۆزا کوردی بکەت ب رێیا گرێدانا کونفرانسێن ناڤدەولەتی و بەرفرەھکرنا تۆرا پەیوەندیێن خوە دگەل حزب و حکومەتێن جیھانێ بەرفرەھ بکەت.
ھەروەسا ھەوڵێن جددی بدەت ژ بۆ ناساندنا کیمیاباران، ئەنفالان، کۆمەڵکوژیا کوردێن فەیلی، بارزانی و ئێزدیان ب رایا گشتی یا جیھانی کو، وەکو جینوساید ل سەر ئاستی ناڤدەولەتی دانپێدان پێ بێت کرن.
ھەولێن جدی بدەت کو کوردستان وەکو ئەنداما چاڤدێر د کۆمەلا گشتی یا نەتەوەیێن یەکبوویی دا بھێت وەرگرتن.
