د ڤێ ده‌ما هێزێن دەستەیا تەحریرا شامێ و ئۆپۆزسیۆنا سووری جاردن چالاک بوون و ل هەمبه‌ر رژێما سووریێ ده‌ست ب ئێریشان کرن، د دەمەک کورت دا، بێ کو ئارتێشا سووری به‌رخوه‌بده، باژارێن وه‌ک ئدلب، حه‌لاب و حه‌مایێ وه‌رگرتن. هه‌روه‌ها د هه‌مان ده‌مێ دا ل ترکیێ و باکورێ کوردستانێ ژی گه‌شه‌دانێن بالکێش چێدبن بەحسا پێڤاژۆیا ئاشتیێ تێ کرن.
نها ل سووریێ هێزێن ئۆپۆزسیۆنێ ده‌ما تلڕفات وه‌رگرتن، هه‌لوه‌ستا پەکەکێ چ بوو؟ گه‌لۆ پەکەکێ ل تلڕفات شه‌ر کر یان ل گه‌ل ئۆپۆزسیۆنا سووری ل هه‌ڤ هات و باژار ڕاده‌ستی وان کر. پشترا ژی ده‌ست ده‌زئینفارماسیۆن و پرۆپاگانده‌یا کر و بەحسا مه‌خدوریه‌تا کوردان کرن. پەکەکە ل سووریێ ده‌ڤه‌رێن د ده‌ستێ خوه دا دکاره، بێ کو شه‌ر بکه، هه‌موویێ ڕاده‌ستی هێزێن دەستەیا تەحریر شام و ئۆپۆزسیۆنا سووری بکه.
د سیاسه‌تا پەکەکێ یا سووریێ و ڕۆژاڤایێ کوردستانێ دا چو گرێدانه‌ک ب ده‌ستکه‌فتیێن نه‌ته‌وی یێن کوردستانێ را نینە. پەکەکە ب تەنێ ل ڕۆژاڤایێ کوردستانێ و سووریێ کوردان وه‌ک لەیستۆکەک ژ بۆ به‌رژه‌وه‌ندیێن ئالیێن دن ددە کوشتن.
چو ئارمانجه‌کا پەکەکێ یا ده‌ستخستنا مافێ نه‌ته‌وی یێ کوردان نینە. ئه‌و ده‌ڤه‌را ناڤێ وێ نه کوردستان به و ببه باکورێ ڕۆژاڤایێ سووریێ یان ژی تشته‌ک دن چ پەیوه‌ندیه‌ک ب ستاتوویه‌کا کوردستانی را هه‌یه؟ ده‌مۆگرافیا ڕۆژاڤایێ کوردستانێ ژ ئالیێ پەکەکێ ڤه هاتیه گوهەر‌تن. وان ب گه‌له‌ک زانه‌بوون عه‌ره‌ب ئانین ل کوردستانی ئاکنجی کرن. دێ سبه‌هی ژی وه‌ک تشته‌ک نه‌بوویه خوه ژ هه‌موو گونه‌هان خالی بکن و ب پرۆپاگانده و نووچەیێن شاش سیاسه‌تا خوه بدوومینن.
نها هه‌لوه‌ستا پەکەکێ ل سوریه چیه، هه‌ڤالبه‌ندێ رژێمێ یان یێ ئۆپۆزسیۆنێ یه؟ هه‌روه‌ها ل گۆرا پەکەکێ ل سووریێ، نه ڕۆژاڤایێ کوردستانێبه، کی کو ده‌رێ داگیر دکه؟
یه‌ک ڕێ ل پێشیا پەکەکێ هه‌یه دڤێ ده‌ستێ خوه یێ قرێژ و سیخووری ژ ناڤا کوردێن ڕۆژاڤایێ کوردستانێ بکشینه و ل ڕۆژاڤا هێزێن کورد و ئالیێن سیاسی ئه‌نیه‌ک کوردستانی و نه‌ته‌وی ئاڤابکن و ژ بۆ ده‌ستخستنا ستاتوویه‌کی ل هه‌رێما کوردستانا ڕۆژاڤا ده‌ستڤه بینن. ڕه‌وشا ناڤنه‌ته‌وی ژ بۆ ڤێ یه‌کێ گونجایه.
دویه‌م د ڤێ قۆناخێ دا ترکیه ل گه‌ل ئۆجەلان ڕۆژانه هه‌ڤدیتنان دکه. دیالۆگ د ناڤبه‌را ئۆجەلان و قه‌ندیل دا د بن چاڤده‌ریا ده‌زگه‌هێن ده‌وله‌تا ترک دا به‌رده‌وامه. پارتییێن وه‌ک ده‌مێ یێن گرێدایی پەکەکێ نها دو ئالی ل به‌رخوه‌ددن، نکارن خوە د ناڤبه‌را قه‌ندیل و ئۆجەلان یەکئالی بکن.
ده‌وله‌تا ترک ل هەمبه‌ر ئالیگرێن قه‌ندیل ب توندی ته‌ڤدگه‌ره و هه‌ولدده کو، ده‌م پارتییێ ب ته‌مامی به‌رب ئۆجەلان ڤه بینه. ده‌ما کو ترکیه باوه‌ر کر کو، دەم پارتی بەر ئۆجەلان ڤە هاتیه، ڤێجا پرۆژه‌یا “ ته‌سفییه‌کرنا پەکەکێ“ دێ پێکوه‌رە و دێ ژ ڕایا گشتیرا هه‌رتشته‌کی ئا‌شکه‌ره بکه. دێ هه‌رکه‌سه‌ک ببینە کو، وێ ئۆجەلان ژ گرتیگه‌هێ ده‌رکه‌ڤه و د بن ده‌ستێ ده‌زگه‌هێن ده‌وله‌تێ دا کار بکه.
هه‌تا نها هه‌رتشتا ترکیێ ل هەمبه‌ر پەکەکێ دکه، ژ ئۆپه‌راسیۆنا بگرن هه‌تا تەعینکرنا قایوما ئاگاهیا ئۆجەلان ژێ هه‌یه و ل گه‌ل ده‌زگه‌هێن ده‌وله‌تێ ب هه‌ماهه‌نگ کار دکن.
ژ ئالیه‌ک دن ڤه ل سووریێ، سەر داخوازیا ترکیێ، پەیوه‌ندیه‌ک ناڤبه‌را ئۆجەلان و پەکەکێ و هێزێن ئۆپۆزسیۆنا سووری دا هه‌یه.
پەکەکە ل سووریێ و ڕۆژاڤایێ کوردستانێ ژ بۆ پاراستنا ئاخا کوردستانێ شه‌ر ناکه. ئه‌گه‌ر به‌رژه‌وه‌ندیێن ئامه‌ریکایێ بخوازه دێ ل هنده‌ک ده‌ڤه‌ران به‌رخوه بده. وه‌ک دن هه‌ر ده‌ڤه‌را کو د بن کۆنترۆلا وان دا یان ڕاده‌ستی رژێمێ یان ژی رادەستی دەستەیا تەحریرا شامێ دکن. ئه‌ڤ چاره‌نووسا سیاسه‌تا دژ کوردستانی یا پەکەکێ یه.
به‌رپرسێن پەکەکێ د داخوویانیێن خوە دا ڤه‌کری ددن خوویاکرن کو، ژ بۆ دیالۆگێ ب هه‌ر ئالیه‌کی را ئاماده نه، ل گه‌ل ترکیێ دیالۆگێ دکن، ل گه‌ل رژێما ئه‌سه‌د دکن، ل گه‌ل دەستەیا تەحریرا شامێ دکن، ل گه‌ل ئارته‌شا ئازاد دکن.. لێ ب تەنێ ل گه‌ل ئالیێن کوردستانی ناکن.. ئه‌ڤ یه‌ک ژی مسیۆنا پەکەکێ دده کفشکرن.
بالا خوه بدەنێ، ئه‌و گۆتنا د وه‌ختێ خوه دا ئۆجەلان دگۆت: ل سووریێ کوردستان نینە، کوردێن سووریێ (رۆژاڤایێ کوردستانێ) ژ باکور هاتنه بلا جاردن ڤه‌گه‌رن جهێ خوه..
نها گاڤ ب گاڤ ئه‌ڤ پرۆژه ب ده‌ستێ ترکیێ و ئۆجەلان جیبجی دبه. ئه‌ڤه‌یە سه‌رکه‌فتنا پەکەکێ ل ڕۆژاڤایێ کوردستانێ..
لێ وەکە دیار گوهەرتنێن پاشەرۆژێ ل رۆژهلاتا ناڤین چێببن دێ ب ئاوایه‌کی د خێرا به‌رژه‌وه‌ندیێن کوردان دا بن. باوه‌ری هه‌یه کو، دێ ل ڕۆژاڤایێ کوردستانێ ژی، ژ ده‌رڤه‌یێ پەکەکێ، ستاتوویه‌کا هه‌رێمی چێببه. هینگێ گه‌له‌ک تشت ژ بۆ پاشه‌رۆژا کوردستانێ تێن گوهه‌رتن…
٦\١٢\٢٠٢٤
نێرین/شرۆڤه
ن.فرات
