ژ ئيفلاسا دراڤى بەرەڤ ئيفلاسا سياسى

ژ ئيفلاسا دراڤى بەرەڤ ئيفلاسا سياسى

نڤيێسينا: ئاشتى فەتحى بيێسفكى

خۆپيشاندان دەربرينەكە ژ رايەكا ب كوم ب شيێوازێ گڤاشتنێ ژ پيێخەمەت ب دەستڤەئينانا هندەك داخوازيان، لدووڤ ريێكەفتنامەیا مافێ مرۆڤى خوپيشاندان مافەكێ سەرەكى يێ هەر تاكە كەسەكى يە، بەشەكە ژ مافێ دەربرينێ ژ بوچوونێ و بەشەكە ژ پشكداريا سياسي يا هاولاتيان د جيهانا ئەڤرۆكە دا.

يا خويايە پشتى هاتنا گرۆپێ تيرۆرستيێ دەولەتا ئيسلامى ل عيراق و شامێ (داعش) ل سالا 2014 ێ بو وەلاتێ عيراقێ و هەرێما كوردستانێ، باندۆرەكا خراب ل سەر رەۆشا هەريێما كوردستانێ كر و بوو ئەگەرێ پەكخستنا رەۆشا ژيارا هاولاتيان ل هەريێما كوردستانێ. هەروەسان پشتى رەفەراندۆما سەربەخوەيا هەريێما كوردستانێ ل سالا 2017 ێ و برينا بەشێ بودجەيا هەريێما كوردستانێ ژلايێ حكومەتا عيراقێ ڤە لدووڤ داخازا هندەك وەلاتفرۆشيێن خوەمالى، ئيێدى رەۆشا هەريێما كوردستانێ ژ هەموو لايان ڤە كەفتە د مەترسيەكا مەزن دا تايبەتى ژى تەخا فەرمانبەرێن ميرى كو كارتێكرنەكا راستە راست ل سەر رەۆشا ژيارا وان كر.

رۆلێ هاولاتيێن هەريێما كوردستانێ د دەربازكرنا ئەڤان قەيران و نەخوەشيان دا ژ هەژى پەسن و دەست خوەشيێن مەزنە كو د خراپترين رۆژێن خوە دا هەلگرێن ئارامى و بێهنفرەهيێ بوونە بەرامبەر ئەوان ئاستەنگ و نەخوەشيێن روو ب روویێ ژيانا وان بوون. سەراراى د نوكە دا رەۆشا هەريێما كوردستانێ بەرەڤ باشتر پيێنگاڤ هاڤيێتيە، بەلێ هەر وەك يا پيێدڤى ژ بۆ هاولاتيێن هەرێما كوردستانێ نەهاتيە كرن و د دەرحەقا هاولاتيێن خوە دا حكومەتێ كەمتەر خەمى هەيە، ژبەركو تا نوكە گرنگترين پێدڤيێن هاولاتيێن هەريێما كوردستانێ نە هاتينە دابين كرن ژ وان نەدانا پاشكەفتێ چەند مووچەيان يێن سالێن دەرباز بوویى، هەرديسان نە دابينكرنا ئاستێ پێدڤى يێ كارەبێ و پێنەدانا سوتەمەنيان كو ئەڤە هەمى ژ پێدڤيێن هەرە گرنگن د ژيانا هاوەلاتيان دا.

پشتى پەسەندكرنا پروژێ چاكسازيێ ژلايێ پەرلەمانێ كوردستانێ و ئيمزاكرنا پروژە ياساى ژلايێ سەرۆكێ هەرێما كوردستانێ ڤە ل 4-2-2020 كو ئێك ژ برگەيێن پروژە ياسايێ پێدڤيە بازرگانێن قەرزێن حكومەتێ لدەڤ وان ب زووترين دەم ئەڤان قەرزان ڤەگەرينن ژبۆ حكومەتێ. يا سەير ئەو بوويە كو كەسەك نەشێت قەرزێن خەلكى بدەتن پەنايێ دبەتە بەر هندەك ئاراستەيێن ديتر كو خو ل قەرزێن حكومەتێ ڤەشێريت و پەنايێ دبەتە بەر خوپيشاندانێن سەرتاسەرى ل هەريێما كوردستانێ ل دژى حكومەتێ.

داخازكرنا ماف و پيێدڤيێن هاولاتيان ب خوپيشاندانان مافەكێ سەرەكى يێ هاولاتيێن هەريێما كوردستانێ يە كو ب ئەڤێ چەندێ رۆلێ خو بگيێرن، بەلێ دوور ژ كاريگەرى و پالپشتيا پارتی و لايەنيێن سياسى يێن نافخوە و دەرەكى دا، دوور ژ بكارئينانا ئالاڤ و رێكاريێن نە ئاشتيانە كو ببنە ئەگەرێ تيێكدانا سەقامگيرى و ئاسايش و ئاراميا هەريێما كوردستانێ.

نێرین / شیرۆڤە