به‌رێ خه‌لکێ به‌ر ب کوڤه‌ یه‌

به‌رێ خه‌لکێ به‌ر ب کوڤه‌ یه‌

ئه‌م هه‌ر گازندان ژ کوردێن باکورێ کوردستانێ دکن و دبێژن؛ ئه‌و بوونا پارێزگه‌رێن فۆتبۆلا ترکان و دینێ ئیسلاما ترکان. لێ ئه‌م نافکرن کا گەلۆ پارتی ئان ڕێخستنه‌ک کو ب باوه‌ریا خوه‌، ب هێزا خوه‌، ب ئیمکانێن خوه‌ یێن مادی بكارە بارێ وان هلگره‌، هه‌یه‌؟
ده‌ما ئه‌ڤ ھێز نه‌ به‌، وێ خه‌لک ژی ژ بۆنا به‌رژه‌وه‌ندیا خوه‌ ب دووڤ وان بکه‌ڤه‌ وان بپارێزە.
ده‌ما د سیاسه‌تێ دا ڤالایی هه‌به‌، دێ ئه‌و ڤالایی ب ڕێیه‌که‌ شاش، ل سه‌ر خه‌ته‌کا نه‌باش ب ڕێڤه‌ هه‌ره‌.
ما ناھێتە بیرا وه‌ د سالێن ۱۹۷۰ هه‌تا ۱۹۸۰ ئه‌و خه‌لکا ب مه‌ ڕا بوو. د وێ ده‌مێ دا کیژان ڕێخسنێ بخواستبایە ب قاسی ڤان فۆتبۆلپه‌ره‌ست و ئۆلپه‌ره‌ستان وێ خه‌لک ده‌رخستبا کۆلانان.

ما قه‌ی وه‌ هاتنا تورکه‌ش یا دیاربه‌کرێ ژ بیر کری یه‌. بالافرا وی ژی نکاریبوو ل سه‌ر ئه‌ردا پیرۆز خوه‌ دابنە. شه‌ر و په‌ڤچوونه‌که‌ مه‌زن، به‌رخوه‌دانه‌که‌ بێ هه‌مپا هه‌تا سبێ دۆماند. ما ئه‌و ژی نه‌ خه‌لک بوو؟
ما وه‌ مه‌ش و خوه‌ پێشاندانێن وێ ده‌مێ، کار و خه‌باتێن وان ڕۆژانا ژ بیر کرنه‌. وێ ده‌مێ ژی یێن ئه‌ڤ دکرن و یێن ڤێ ده‌مێ ژی ڤێ دکن خه‌لکه‌.
ئه‌م نکارن بفکرن و ببینن كا ئیرۆ خه‌لکێ مه‌ که‌تیه‌ چ ڕه‌وشێ. که‌سه‌ک ژ بۆنا ژ کار نایێ ئاڤێتن و زارۆکێن وی/ێ برچی نه‌مینه‌، چ مه‌ش و خوه‌ پێشاندانێن ده‌ستهلات پێک تینه‌ هه‌می ل ورن.

جوانێن بێ کار و نه‌ ئۆلدار ژی خوه‌ ب پشتگریا تیمه‌کا فۆتبۆلا ترکان تێر دکن. ژ به‌ر چ چالاکیێن گرسه‌یی د کوچه‌ و کۆلانێن باژاران دا ژ ئالییێ پارتیێن کوردستانێ ڤە پێک نایێن، لۆما ئه‌و خوه‌ ل ور دبینن.

هه‌لبه‌ت ئه‌ڤ ڕه‌وشه‌کا گه‌له‌ک خه‌راب و مه‌ترسیه‌کا مه‌زنه‌. لێ دڤێ ئه‌م جاره‌کێ ل خوه‌ ژی بنێرن. ئه‌م بنێرن كا مه‌ چاوا قادا سیاسه‌تێ ڤالا هشتیه‌. ئه‌م ببینن کو ئه‌م نکارن جوانێن خوه‌ ب ڕێخستنی بکن و ب چالاكیێن جودا وان مژوول بكن. ئه‌ڤ ژی دده‌ زانین کو ده‌ما ته‌ د سیاسه‌تێ دا ڤالایی هشت دێ ئه‌و ڤالایی ب تشتێن دن ژ ئالیێ ھندەك دن بێ داگرتن.

ئه‌گه‌ر ئیرۆ ل باکورێ کوردستانێ پارتی ئان ڕێخستنه‌کا کو ل گۆر به‌رژه‌وه‌ندیا گه‌ل خوه‌دی هێزه‌ک گرسه‌یی هه‌با، وێ ئیرۆ ڤان تشتێن کو ئه‌م ڕه‌خنه‌ دکن نه‌بانا. هه‌تا سه‌رۆک و ڕێبه‌رێن مه‌، ته‌نێ خوه‌دیێ خوه‌ و چه‌ند ئه‌ندامان بن و کێفا خوه‌ ب وان بینه‌، ب سایا وان ب پاچان سه‌رێ خوه‌ مه‌زن بکن دێ حالێ مه‌ ژی ئه‌ڤ به‌.

گۆتنا من ئه‌ڤه‌. یا خوه‌ بکن یه‌ک، د ته‌ڤگەر ئان ئه‌نیه‌کێ ده‌ خوه‌ بکن خوه‌دی هێز دا کو خه‌لکێ ته‌ بێ با ته‌. یان ژی دەست ژ ڕه‌خنان به‌ردن و نه‌بێژن؛ خه‌لکێ مه‌ بوونا ئۆلپه‌ره‌ست ئان فۆتبۆلپه‌ره‌ست.

یێن خه‌لکێ ب ڕێڤه‌ دبه‌، پارتی و ڕێبه‌رن. هه‌بوونا وان یا ل سه‌ر خه‌تا نه‌ته‌وه‌یی قوه‌ت و جاهدا خه‌باتێ دده‌ خه‌لکێ. ده‌ما ئه‌ڤ ژی نه‌ به‌ هه‌لبه‌ت وێ خه‌لک بێ هێڤی ببه‌ و به‌رێ خوه‌ بدن سه‌ر ڕێیێن شاش.
ژ به‌ر کو ئه‌ڤ کێمانی و شاشی نه‌ یا وانه‌. دڤێ پارتی و ڕێخستنێن مه‌ ل خوه‌ و ل خه‌لکێ خوه‌ ڤه‌گه‌رن. خوه‌ ب هێز و قوه‌ت بکن دا کو بکاربن ب ڤێ، به‌رێ خه‌لکێ بدن خوه‌.

بووبێ ئه‌سه‌ر
2020.02.25

نێرین / شیرۆڤە