ل باکورێ کوردستانێ سیاسه‌ت

ل باکورێ کوردستانێ سیاسه‌ت

د ڤێ پێڤاژۆیا کو ئه‌م نها ل باکورێ کوردستانێ تێ ڕا ده‌رباس دبن، وه‌که‌ مرۆڤ پێ ل ئاگر دکه‌ و ب ڤی حالی دخوازی سیاسه‌تێ بکه‌. لێ ل گۆر من سیاسه‌ت وه‌ها نابه‌. ژ به‌ر کو گه‌له‌ک زه‌حمه‌تی، كەلەم و ئاسته‌نگی ل پێش سیاسه‌تا کوردان هاتیه‌ دانین.

ئه‌م هه‌می دزانن کو ئیرۆ باکورێ کوردستانێ بوویه‌ وه‌که‌ زیندانا دیاربه‌کرێ. یێن ل ورێرێ ماین دزانن ئه‌ڤ تێ چ واتایێ. لۆما من خوه‌ست ڕه‌وشا ئیرۆ یا باکور کوردستانێ ب میناکا زیندانا دیاربه‌کرێ شرۆڤه‌ بکم.

هه‌تا کو ۱۲ ئیلۆنا سالا ۱۹۸۰ێ نه‌هاتبوو، ئه‌م دیسا د زیندانا له‌شکه‌ری دا بوون. لێ مه‌ ل ور هه‌ر تشت ب یا وان نه‌ دکر. ب سایا گه‌له‌ک به‌رخوه‌دانێن مه‌، جارنا مه‌ هندەك ماف ب ده‌ست دخست.
لێ ده‌ما ئه‌م گرتی برن وێ زیندانا ب ناڤێ ٥ نۆلیێ و ب هاتنا كۆدەتایا ۱۲ ئیلۆنێ، ئه‌م ژی وه‌كی گه‌لێ خوه‌ که‌تن ناڤا ئاگرێ کو هه‌می وه‌لات و وه‌لاتپارێز دشه‌وتاند.

د ده‌ستپێکێ دا هێدی هێدی، ب نه‌رمی و گه‌رمی ب مه‌ مه‌شا له‌شکه‌ری دانه‌ کرن و سروودا ترکان یا نه‌ته‌وه‌یی ژی ژ به‌ر کر و پشتی خوارنێ ب مه‌ دانه‌ خوه‌ندن. لێ ده‌ستپێک بوو و ب یه‌ک جار تۆفان ل سه‌ر سه‌رێ مه‌ ڕانه‌کرن.
دووڤ را چ چێ بوو، چ ئانینا سه‌رێ مه‌ گرتیان ئێدی دیار بوو، یان ژی هاته‌ فێمکرن كا ئه‌م که‌تن چ ڕه‌وشێ. ب ده‌هان وه‌لاتپارێز هاتن کوشتن و ب سه‌دان ژ به‌ر وان ئێشکه‌نجه‌یێن کو ل مه‌ دکرن، ئاقل ئاڤێتن. ئانگۆ دین و شێت بوون.

نها ڕه‌وشا سیاسی ل باکورێ کوردستان ژی وه‌ها یه‌. ب هاتنا ئه‌ردۆگان یا ده‌ستهلاتیا خوه‌ ئه‌ول هندەك گاڤێن باش ئاڤێتن تشتێن کو گه‌ل پێ کێفخوه‌ش ببه‌ کرن.
لێ مخابن هه‌ر کو جهێ پێ خوه‌ ساخله‌م کر، ئێدی زلم و زلمداریا وی ژی هێدی هێدی ده‌ست پێ کر. وی ژی پۆلیتیکایا خوه‌ عه‌ینه‌ن وه‌که‌ یا وێ زیندانێ مه‌شاند.
هه‌ر کو چوو ب زلم و زۆرداریا خوه‌، لێ هێدی هێدی چاڤێن خه‌لکێ ترسان. پشتی کو خه‌لک هه‌می هێسیر گرت و فێم کر کو ئێدی ژ بۆنا وی خه‌ته‌ر نه‌ما. ئێدی ده‌ست ب گرتنا ڕۆژنه‌مه‌ڤان، سیاسه‌تمه‌دار و ڕه‌وشه‌نبیرێن کورد و ترکان کر.

ب ڤێ یه‌کێ ژی خوه‌ست کو ل سه‌ران سه‌رێ ترکیێ و باکورێ کوردستانێ ببه‌ ده‌ستهلاته‌کی یه‌که‌م کو هه‌می تشتێن هه‌یی ل گۆر وی ب ڕێڤه‌ هه‌رن و نها وه‌ها ژی بوو.

ل زیندانا دیاربه‌کرێ ئه‌و زلم و زۆرداریا دهات کرن، ب به‌رخوه‌دان و سه‌ریهلدانا گرتیان هنده‌کێ گه‌رم بوو. ئه‌و تەعدا و لێدانێن بێ هه‌مپا نه‌ ب ته‌مامی ژی به‌ کێم بوو.
ژ بۆنا ئه‌ڤ ڕه‌وشا نها کو ئه‌ردۆگان ژ بۆنا کوردان نەھێلە، چ ژ ده‌ستێ وی تێ وێ دکه‌. لێ گه‌لۆ ئه‌م کوردێن باکورێ کوردستانێ ژی ل هه‌مبه‌ر ڤێ هه‌لوه‌ستا وی، چ ژ ده‌ستێ مه‌ تێ ئه‌م وێ دکن؟ نا
ئاها مه‌سه‌له‌ و کێمانیا مه‌ کوردان ئه‌وه‌. ئه‌م ژ ڕابه‌ردوویێن خوه‌ ده‌رسان ده‌رناخن. ئه‌م دیرۆکا خوه‌ نزانن ژ به‌ر کو ئه‌م ناخوینن.

ژ بۆنا ئه‌م ژ ڤێ ڕه‌وشێ خلاس ببن دڤێ ئه‌م چ بکن؟

به‌ری هه‌ر تشتی کار ل سه‌ر پشتا پارتی و ڕێخستنێن مه‌ یێن ژ خوه‌ ڕا دبێژن ئه‌م کورد و کوردستانی نه‌. هه‌تا کو ئه‌و وه‌ها به‌لاوه‌لا بن، هه‌تا ئه‌و وه‌ها کێمهێز بن. چ ڕه‌وشا کو ڕاست ببه‌ ژی خویا ناکه‌. ژ بۆنا گوهه‌راندنا ڕه‌وشێ ئان ل هه‌مبه‌ر ڤێ زلم و زۆرداریی دڤێ ئه‌نیه‌ک ئان جه‌پهه‌یه‌ک ژ هه‌می پارتی، که‌س و ڕێخستنێن خوه‌ کوردستانی دبینن پێک بێ.
ب پێک ئانینا قوه‌ته‌کا وه‌ها ئه‌م دێ ب هه‌ڤره‌ چاڤێن دژمن بترسینن. که‌سێن ل ئه‌ورۆپا ژی وێ بکه‌ڤن ناڤ خه‌باتێ دا کو بکاربن کاره‌کی ژ بۆنا گه‌لێ خوه‌ بکن.
هه‌گه‌ر ئه‌م کوردێن ل سه‌رانسه‌رێ جیهانێ ب هه‌ڤره‌ ته‌ڤنه‌گه‌رن وێ ئه‌ڤ ڕه‌وش هه‌ر به‌رده‌وام به‌. به‌رده‌وامیا ڤێ ڕه‌وشێ ژی تێ وێ واته‌یا نەھێلانا گه‌لێ کورد. یا تو دێ نەمینی یا ژی ژ بۆنا خوه‌پاراستنێ، ب هه‌ڤرا ته‌ڤگه‌ره‌کێ پێک بینن ژ بلێ ڤێ چ ڕێیێن دن نینن. ئێدی ب هێزێن ب چووک و بێ قوه‌ت ته‌ڤگه‌ر نه‌ما دبه‌.

ما یێن ڤێ ڕه‌وشێ نزانبن هه‌نه‌؟ نا . لێ چما ڤێ پێک ناینن؟ دڤێ هه‌رکه‌س ژ خوه‌ ژ پارتیێن خوه‌ ڤێ پرسێ بکە…

بووبێ ئه‌سه‌ر
2020.03.13

نێرین / شیرۆڤە