ل دھوكێ ئێدی كەس توشی كۆرۆنایێ نابە

ل دھوكێ ئێدی كەس توشی كۆرۆنایێ نابە

ل ده‌ڤه‌را سێبیران یا سه‌ر ب هه‌ولێرێ ڤە وه‌لاتیه‌ک توشی کۆرۆنایێ بوو و ۹ که‌سێن دن د گه‌ل خوه‌ توش کرن، که‌سێ ناڤێ وی نزانە!

ل سلێمانیێ ژ بلی وی مامۆستایێ ئۆلی یێ کو ژ به‌ر کۆرۆنایێ جانێ خوه‌ ژ ده‌ست دا، که‌س نزانە ئه‌وێن توش بوویێ ب پەژیكا و ڤیروسا کۆرۆنایێ کی نه‌؟

ل ده‌ربه‌ندیخانێ که‌سه‌ک توش بوویه‌ و ڕه‌نگه‌ نیڤه‌کا خه‌لکێ وی باژاری توش کربه‌ و هه‌موو ده‌ربه‌ندیخان هاتیه‌ که‌ره‌نتینه‌کرن و که‌س نه‌زانیه‌ ئه‌وێ توش بوویی کی یه‌!

توشبوون ب نه‌خوه‌شیا ڤیروسێ یان هه‌ر نه‌خوه‌شیه‌که‌ دن نه‌ عه‌یب و شه‌رمه‌، لێ به‌لێ به‌لاڤبوونا ناڤێ هه‌ر نه‌خوه‌شه‌کی/ێ، پێیویسته‌ ته‌نێ ب ڕزامه‌ندیا که‌سێ نه‌خوه‌ش بێ به‌لاڤکرن و مافێ که‌سه‌کی نینه‌ ناڤێ وی به‌لاڤ بکه‌… به‌لاڤکرنا ناڤێ نه‌خوه‌ش ژ ئه‌تیکێن پزیشکی نینه‌؟ ئێدی هه‌ر که‌سێ به‌لاڤ بکه‌…

که‌چه‌کا ۲۰ سالی ل دهۆکێ وه‌کو دوویه‌م حاله‌تێ کۆرۆنایێ توش بوو هاته‌ تۆمارکرن، یه‌کسه‌ر ناڤ و وێنه‌یێ که‌چه‌کێ هاته‌ به‌لاڤکرن کو ئه‌ڤه‌ ئه‌و که‌چه‌ توش بوویه‌… خه‌لکێ ئاخافتن و چیرۆکێن عه‌جێب ل سه‌ر گۆتن و وه‌ها نیشاندان کو په‌یوه‌ندی ب برێز نه‌خوه‌شێ یه‌کێ ڤه‌ ل پارێزگه‌ها دهۆکێ هه‌یه‌!

ئه‌و که‌چا وێنه‌یێ وێ به‌لاڤبوویه‌ ڕاگەهاند کو ئه‌و نه‌ ئه‌وه‌ و داخوازکر وێنه‌یا وێ بێ ڕه‌شکرن، به‌لکو ئه‌وا نه‌خوه‌ش ل نه‌خوه‌شخانه‌یێ یه‌ و ئه‌و ب سه‌لامه‌ت ناڤ که‌س و کارێ خوه‌ دا یه‌… نها گه‌له‌ک که‌س هه‌ول ددن وێنه‌یێ وێ که‌چا توشبوویی و ناڤێ وێ و عه‌شیرا وێ به‌لاڤ بکن و بشکێنن و خه‌لکێ دن پێ بشکێنن!

ئه‌گه‌ر وسا بچه‌ و هه‌ر که‌سێ تووش بوو، هاته‌ شکاندن، پشتراست بن خه‌لکێ توشبوویی یێ کو نه‌خوازە که‌س بزانە توش بوویه‌، خوه‌ ئاشکه‌ره‌ نه‌که‌، یان خوه‌ ڕاده‌ستی تیمێن پزیشکی نه‌که‌، وێ ده‌مێ نیڤێ جڤاکێ وێ توش ببه‌ و که‌سێ باوه‌ری ب ساخله‌میا دهۆکێ نامینه‌!

کی به‌رپرسه‌ ژ ئاشکه‌ره‌کرنا ناڤێ نه‌خوه‌شان؟

د به‌رژه‌وه‌ندیا کێ دایه‌، ئه‌ڤ خه‌لکه‌ دهێنه‌ شکاندن؟

پێدڤیه‌ ل سه‌ر ساخله‌میا دهۆکێ کو کارێن مه‌زن ئه‌نجامداینه‌ و ئه‌م پێ سه‌ربلندین و ده‌ستێن پزیشکا و تیمێن ته‌ندرووستیێ خوه‌ش بن کو کارێن گه‌له‌ک مه‌زن ئه‌نجام دانه‌. دڤێ ناڤ و که‌سایه‌تیێن نه‌خوه‌شان بپارێزن..

هێڤیدار ئه‌حمه‌د

پارله‌مه‌نته‌ر ل پارله‌مه‌نتۆیا کوردستانێ

نێرین / شیرۆڤە