عەلی بەلۆ: بەربژێركرنا عدنان زرفی ب مری ژدایك بوو

عەلی بەلۆ: بەربژێركرنا عدنان زرفی ب مری ژدایك بوو

سەرۆككۆمارێ عیراقێ محەممەد توفیق عەللاوی راسپارد ژ بۆ پێكانیا كابینەیا نوو یا حكومەتا عیراقێ لێ د ئەركا خوە دا بسەرنەكەت، چما بسەرنەكەت و ئاسەنگی چ بوون؟ نھا عەدنان زرفی ژ بۆ ھەمان ئەك ھاتیە ئەركدار كرن. گەلو ئەو دێ د ئەركا خوە دا بسەركەڤە؟
د. عەلی بەلۆ ئەندامێ بەرێ یێ پەرلەمانی عیراق و سەرۆكێ كۆمیتەیا نەفت و گازێ بەرساڤ ڤان پرسێن ل ژۆر ددە:

رەوشا عیراقێ د ناڤبەرا دو جەمسەران دا دابەش بوویە، هەردو جەمسەران ژی کاریگەریەکا مەزن ل سەر بوویەرێن عیراقێ هەیە، ئەو ھەر دو جەمسەر ژی ئیران و ئەمریکا
نە.
ئیرانێ رولەک بێسنور ل سەر ناڤمالا شیعەیان هەیە، بەلێ وێ دەستهلاتەکا سنوردار ل سەر عەرەبێن سونە، کوردان و هندەك شیعەیان هەیە.
هەر کەسەك بھێتە کاندیدکرن ژ بۆ سەرۆکاتیا حکومەتا عیراقێ، دڤێت برەنگەکی نەئاشکەرا رەزامەندیا هەردو جەمسەران، ئیران و ئەمریكایێ، ل سەر ھەبە، ئەڤ یەك ژی دڤی سەردەمیدا كو، رەوشا عیراقێ تێ دا دەرباس دبە، نە کارەک ساناھی یە .

ئەگەرێ نەسەرکەفتنا مەحەمەد تەوفیق عەلاوی، ب دیتنا من، چونکە ئەو گەلەك نێزیكی موقتەدا سەدر بوو (کچا وی خیزانا برازایێ موقتەدا سەدری یە) ئەو بەربژێرێ مقتەدا سەدر و هادی عامری بوو، هەر وەسا وەکو کاندید ژ بۆ سەرۆکایەتیا حکومەتا نوو یا عیراقێ، رەزامەندیا ئیرانێ ژی ل سەر ھەبوو.
نێزیكبوونا مەحەمەد تەوفیق عەلاوی ژ موقتەدا و هادی عامری، ناڤمالا شیعەیان ب سەر دو باسكان دا دابەش كر، پارتیا دەعوەیا ئیسلامی ب سەرۆکاتیا مالکی و رەوتا حیکمە ب سەرۆکاتیا عەمار حەکیم ل دژ کاندیدکرنا عەلاوی دەركەتن. گرنگە ئەم بێژن کو عەلاوی خوەدی كەساتیەك گەلەك لاواز بوو و بێکاریزمایەکا بەرچاڤ ھەبوو، نە شیا رەزامەندیا کوردان و عەرەبێن سونە ب دەستڤە بینە. ژ بلی هندێ ئەمریکایێ ژی ئەو وەکو ئالیگرێ ئیرانێ ددیت.
هەر وەسا سەرهشکیا علاوی ژ بو دەستنیشانکرنا پوستێن وەزیران بۆ کابینەیا خوە بێی لبەرچاڤگرتنا دیتنا فراکسیونێن پەرلەمانێ عیراقێ بۆ ئەگەرا وێ چەندێ كو رەزامەندیا پرانیا ئەندامێن پەرلەمانێ وەرنەگرە و كابینەیا وی دەرباس نەبە..

پاش نەسەرکەفتنا کاندیدێ یەکێ ( مەحەمەد تەوفیق عەلاوی) و دەرباسبوونا دەمێ دەستووری کە ١٥ روژ بوون، پارتی و گروپێن شیعەیان نە کارین ل سەر کاندیدەکی نوو ل ھەڤ بكەن. بێی رەزامەندیا شیعەیان، روژا 15ێ ئادارێ ژ لایێ سەرۆكکومار بەرهەم سالح ڤە ( عەدنان عەبد خزەیر الزرفی) ژ بۆ پێكانینا كابینەیا نوو یا حكومەتا عیراقێ هاتە دەستنیشانکرن.

ب دیتنا من ئەڤ کاندید بمری ژدایک بوو، چونکە شیعە وی وەکو زلامێ ئەمەریکا د بینن و دژی بەرژەوەندیێن ئیرانێ یە. هەر چەندە کورد و عەرەبێن سونە وەکو دەستپێك نە دژن، بەلێ كوردان و عەرەبێن سونە ل پەرلەمانێ عیراقێ ئەو هێز نینە كابینەیا وی دەرباس بکن .
دڤیت مروڤ بێژە، عەدنان الزرفی ، پێشتر ئەندامێ پارتیا دەعوەیا ئیسلامی بوو، د سەرهلدانا ١٩٩١ ێ دا ل نەجەفێ رولەکی بەرچاڤ هەبوو، پاش نەسەرکەفتنا سەرهلدانێ، رەڤی بو سعودیێ، ل کەمپا رەفح ئاكنجی بوو، باشی بوو پەنابەر ل ئەمریکایێ.

ژ بەر هندێ شیعە بچاڤەکێ خراب وی دبینن، هەر چەندە پاش ٢٠٠٣ چەند سالا پارێزگارێ نەجەفێ بوو و بەری بھێتە کاندیدکرن ل پەرلەمانێ عیراقێ سەرۆکێ فراکسیونا ئەلنەسر بوو ئەوا كو حیدر عەبادی سەرۆکاتیێ دكە .
ب دیتنا من هەمی سەرکردە و کادرێن پارتیا دەعوە دیدەکی شوفینی، وەکو بەعسیێن بەرێ، بەرامبەر کوردان و کێشێن وان هەیە، قەد چارەسەریێن بنەرەتی بۆ مە کوردان نینن…
هەر چەندە ئەز د وێ باوەریێ دامە كو، ئەگەر كابینەیا عەدنان الزرفی ل پەرلەرمانێ عیراقێ دەرباس ببە، ئەو ل دەستپێکێ خوە باش نیشان بدە و سۆزا چارەسەریا ئاریشەیێن كوردان ب بەغدایێ را بدە، ئەڤ ژی ب تەنێ هەتا جهێ پێ خوە قاییم بکە.

نێرین / شیرۆڤە