ئوزجەلك: هدپ هێشتا ژی دبێژه جمهوورییه‌تا ده‌مۆکراتیک
سه‌رۆکێ گشتی یێ پارتیا ئازادیا كوردستانێ (پاک) ێ، موستەفا ئوزچه‌لک، د به‌رسڤا پرسێن ڕۆژه‌ڤاکورد ده دبێژه : ژ دامه‌زراندنا ده‌وله‌تا ترکییه‌یێ هه‌تا ئیرۆ، کورد چ جاری د شه‌رتێن ده‌مۆکراتیک ده نکاریبوونه به‌شداری هلبژارتنان ببن.
ڕۆژه‌ڤاکورد: هلبژارتنێن هه‌رێمی ڕه‌وشه‌ک چاوا ده تێنه کرن؟ هون د ڤێ قۆناخێ ده ڕه‌وشا کوردستانێ چاوا دنرخینن؟
موستافا ئۆزچه‌لک: ئیرۆ ل باکورێ کوردستانێ و ترکییه‌یێ، کورد ژ هه‌موو مافێن خوه یێن نه‌ته‌وی، ده‌مۆکراتیک و نشتمانی بێپارن. شه‌ره‌کی کو هه‌ر ڕۆژ هینا زێده‌تر پاشه‌رۆژا گه‌لێ مه تێک دده به‌رده‌وامه. ده‌وله‌تا ترکییه‌یێ هه‌موو سیاسه‌تا خوه ل سه‌ر دژایه‌تییا مله‌تێ کورد دمه‌شینه. ل ترکییه‌یێ مخابن چ پارتییێن کو ب ڕاستی ژی ده‌مۆکراسی، ئازادی و عه‌داله‌تێ دپارێزن نینن. هدپ وه‌که پارتییا کو ژ ۵-۶ ملیۆن کوردان ده‌نگ دستینه، هینا ژی دبێژه: پرسا کورد دێ د چه‌رچۆڤه‌یا ده‌وله‌تا ئوونیته‌ر ده بێ چاره‌سه‌ر کرن. هدپ هینا ژی دبێژه: جمهوورییه‌تا ده‌مۆکراتیک، نه‌ته‌وا ده‌مۆکراتیک، وه‌لاتێ هه‌ڤبه‌ش.
وه‌که هه‌موو هلبژارتنان ، د ڤان هلبژارتنێن هه‌رێمی ده ژی، ل سه‌ر کوردان تێ فه‌رز کرن کو کورد “باشێ ژ ناڤ خه‌رابان هلبژێره”.
ژ دامه‌زراندنا ده‌وله‌تا ترکییه‌یێ هه‌تا ئیرۆ، کورد چ جاری د شه‌ردێن ده‌مۆکراتیک ده نکاریبوونه به‌شداری هلبژارتنان ببن. ئه‌ڤ نه‌حه‌قی د هلبژارتنێن هه‌رێمی یێن ئادارا ۲۰۱۹ ئێ ده ژی به‌رده‌وامه.
ژ بۆ ڕێ ل به‌ر به‌شدار بوونا هلبژارتنان یا پارتییێن کوردان بێ گرتن ب ده‌هان به‌ند و ئاسته‌نگییێن “قانوونی” و ده‌ستووری هه‌نه.
سیاسه‌تا نه‌ته‌وی، نشتمانی ل باکورێ کوردستانێ لاواز که‌تییه، هێزا خوه یا گرسه‌یی وه‌ندا کرییه. ژ بۆ هووناندنا پارتییه‌که خورت، ئازادیخواز، ده‌مۆکرات کوردستانی ، مخابن پارتییێن په‌یوه‌ندیدار وه‌زیفه‌یێن خوه یێن دیرۆکی بجھ ناینن. پارتی و ئالییێن نه‌ته‌وی-ده‌مۆکراتیک ل سه‌ر سییاسه‌ته‌که ب ئیستیقرار یا نشتمانی نامه‌شن.
د ڕه‌وشه‌که وه‌ها ده، هلبژارتنێن هه‌رێمی دێ ل دار بکه‌ڤن.
ل گۆرا وه دڤێ ته‌ڤگه‌را کورد د ڤان هلبژارتنان ده چاوا ته‌ڤبگه‌ره؟
هلبژارتنێن پارلامه‌نتۆیێ و یێن هه‌رێمی هه‌ر یه‌ک ل گۆری خوه به‌رنامه‌یێن خوه یێن تایبه‌ت هه‌نه. لێ ته‌ڤگه‌را کورد و کوردستانی، د هه‌موو هلبژارتنان ده دڤێ ل سه‌ر پره‌نسیبێن خوه یێن نه‌ته‌وی و نشتمانی سیاسه‌تا خوه ئاڤابکن. د هلبژارتنێن ۲۴ ێ حه‌زیرانا ۲۰۱۸ ێ ده، مه وه‌که پاک و تفاقا کوردستانی، ل سه‌ر ۶ خالێن کو هه‌بوونا مله‌تێ کورد و کوردستانێ و ستاتویه‌که سیاسی ژ بۆ کوردستانێ ل گه‌ل هدپ ئێ ل هه‌ڤ کرن. لێ ڕێڤه‌برییا هدپ ئێ ئه‌ڤ متاباقات ب چ نه‌سباند و ڤان ۶ خالان نه‌خست ده‌کله‌راسیۆنا خوه یا هلبژارتنان. ب ڤێ هه‌لوه‌ستێ ژی، تفاقه‌که به‌رفره‌ھ یا ژ بۆ هلبژارتنان سابۆته کر.
گاڤا کو مژارا هلبژارتنێن هه‌رێمی هاته ڕۆژه‌ڤێ، مه وه‌که پاک گۆت، هدپ ێ هه‌تا ئیرۆ ژی تو ئیزاات ژ مه و ژ ڕایا گشتی ڕه نه‌ئانییه، کا ژ بۆ چ تفاقا هلبژارتنێن ۲۴ ئێ حه‌زیرانێ سابۆته کرییه. ژ به‌ر ڤێ یه‌کێ ژی نه ڕاسته کو ئه‌م جاره‌که دن ب هدپ ئێ ڕه هه‌ولا تفاقه‌که هلبژارتنێ بکن. هدپ تفاقه‌که ل سه‌ر پره‌نسیبێن سییاسی قه‌بوول ناکه. مه وه‌که ئالته‌رناتیف ژی پێشنیارییا نامزه‌دێن سه‌ربخوه یێن وه‌لاتپه‌روه‌ر و ده‌مۆکرات پێشکێشی پارتییێن کوردستانی کر.
ژ بۆ هلبژارتنێن هه‌رێمی یێن ۳۱ ێ ئادارا ۲۰۱۹ ێ یا ڕاست ئه‌وه کو ئه‌م وه‌که پارتییێن سیاسی، ده‌زگه‌هێن سڤیل و شه‌خسییه‌تێن نشتمانی، پلاتفۆرمێن هه‌رێمی دامه‌زرینن و ب بەربژێر و نامزه‌دێن سه‌ربخوه به‌شداری هلبژارتنێن هه‌رێمی ببن .
هنده‌ک ئالیێن کوردا ژ نهاڤه کێم زێده هه‌لوه‌ستا خوه ئه‌شکه‌ره کرنه. هون ڤێ یه‌کێ چاوا دنرخینن و هه‌لوه‌ستا ئالیێن سیاسی چاو دبینن؟
مه وه‌که پاک و پسک ژ بۆ نامزه‌دێن سه‌ربخوه خه‌باته‌ک ده‌ست پێ کرییه. ئه‌م دخوازن ب هه‌موو پارتییێن سیاسی یێن ل گه‌ل ده‌رخستنا نامزه‌دێن سه‌ربخوه نه، ڤێ هه‌ڤکارییا خوه به‌رفره‌ھ بکن. هه‌روه‌ها ئه‌م دخوازن ل هه‌ر باژارێ کو ئه‌م دکارن نامزه‌دان ده‌رخینن، پلاتفۆرمێن هه‌رێمی ئاڤا بکن و بلا هه‌ر پلاتفۆرم ب خوه نامزه‌دێن خوه ده‌رخینن.
هنده‌ک پارتییێن کوردستانی، دبێژن “د هلبژارتنان ده نه شرته ئه‌م ل سه‌ر پره‌نسیبێن سییاسی یێن نه‌ته‌وی و نشتمانی تفاقان بکن”. ژ بۆ بده‌ست خستنا کورسییێن پارلامه‌نته‌رییێ یان ژی کورسییێن به‌له‌دییه‌یێ، کی ته‌کلیفێ ژ مه ڕه بینه ئه‌م ئاماده نه ل گه‌ل وان تفاقێ بکن.
هنده‌ک پارتی ژی دبێژن ‘ئه‌مێ دیسا ل گه‌ل هدپ ێ ل ڕێیا تفاقه بگه‌رن.
ئه‌م وه‌که پاک ڤان هه‌ردو هه‌لوه‌ستان ژی ناپه‌ژرینن. بێیی پره‌نسیبێن سیاسی نابه کو چ تفاق بێ کرن و نه ڕاسته کو ئه‌م جاره‌که دن ب وێ هدپ یا کو 6 خالێن کو قه‌بوول کربوو بچنە حه‌سباندیه، هه‌ولا تفاقه‌که دن بدن.
پێویستییا گه‌لێ مه ب ئالته‌رناتیفه‌که نه‌ته‌وی، نشتمانی و ده‌مۆکرات هه‌یه.
دڤێ ئه‌م پڕه‌نگیا سیاسه‌تا باکورێ کوردستانێ خورتر بکن. دڤێ ئه‌م ڕێیا ده‌مۆکراسی و ئازادیا ناڤخوه‌یی گه‌شتر و به‌رفره‌هتر بکن.دڤێ ئه‌م گه‌لێ خوه نه مه‌جبووری قه‌یوومان، نه ژی مه‌جبووری سییاسه‌تا خه‌نده‌کان بکن؛ دڤێ ئه‌م گه‌لێ خوه مه‌جبووری سییه‌سه‌تا ژ هشمه‌ندییا نشتمانی دووره نه‌کن.
هون پێکانینا تفاقا کوردستانی پێوست دبینن یان نا؟ ئه‌گه‌ر هون پێویست دبنێن گه‌ره‌ک ل سه‌ر چ پره‌نسیبان تفاقا کوردی /کوردستانی بێ ئاڤاکرن؟
ئه‌م وه‌که پاک ژ دامه‌زراندنا خوه ڤه هه‌تا ئیرۆ، هه‌ر ل گه‌ل ئاڤا کرنا تفاقا کوردستانی بوونه. مه ب پسک، پدک و هه‌ره‌که‌تا ئازادی ڕه، ژ ته‌مووزا سالا 2015 هه‌تا ئیرۆ هه‌ڤکاریه‌ک مه‌شاندییه. هنده‌ک پارتییێن کوردستانی مخابن خوه نه‌دانە به‌ر ڤێ هه‌ڤکاریێ. د هلبژارتنێن 24 ێ حه‌زیرانا 2018 ێ ده ژی مه ل سه‌ر پره‌نسیبێن سیاسی تفاقا کوردستانی یا ژ بۆ هلبژارتنان(پاک، پسک، پدک، پدکت، هه‌ره‌که‌تا ئازادی) ئیعلان کر.
ئه‌م ئیرۆ ژی ل گه‌ل تفاق و هه‌ڤکاریێن نه‌ته‌وی، نشتمانی نه.
پره‌نسیبه‌که پاکێ یا زه‌لال د ده‌ربارێ تفاقان ده هه‌یه. پاک دبێژه:
یێن دکارن ببن یه‌ک بلا ببن یه‌ک. یێن نکارن ببن یه‌ک بلا هه‌ڤکاری و تفاقان پێک بینن. یێن نکارن هه‌ڤکارییان ژی پێک بینن، بلا دییالۆگێ د ناڤبه‌را خوه ده کێم نه‌کن.یێن نکارن د ناڤ دییالۆگێ ده ژی بن، بلا دژمناتییا هه‌ڤ نه‌کن.
تفاقێن کوردستانی ل سه‌ر ڤان پره‌نسیبێن سییاسی یێن نه‌ته‌وی، نشتمانی دڤێ بێنه ئاڤا کرن:
–قه‌بوول کرنا هه‌بوونا مله‌تێ کورد و کوردستانێ.
–قه‌بوول کرنا مافێن نه‌ته‌وی-ده‌مۆکراتیک یێن مله‌تێ کورد.
–قه‌بوول کرنا ستاتویه‌که سییاسی ژ بۆ کوردستانێ.
–لێ خوه‌دی ده‌رکه‌تن و ڕێز لێ گرتنا نرخ و سه‌مبۆلێن نه‌ته‌وی، نشتمانی.
–لێ خوه‌دی ده‌رکه‌تن و ڕێز لێ گرتنا هه‌موو ده‌ستکه‌فتنێن نه‌ته‌وی، سییاسی و ده‌زگه‌هی یێن ل هه‌ر چار په‌رچه‌یێن کوردستانێ.
–قه‌بوول کرن و ڕێز لێ گرتنا مافێن ئازادییا ڕامانی و برێخستنبوویینێ و قه‌بوول کڕنا مافێن به‌شدارییا ڕێڤه‌برنێ یێن هه‌موو پێکهاته‌یێن ئه‌تنیکی، ئۆلی، مه‌زهه‌بی، جڤاکی و سییاسی.
موستافا ئوزچه‌لک
سه‌رۆکێ گشتی یێ پاک ێ
06.12.2018
