دژمنێ سەرەکە ێی گەلێ کورد پەکەکە یە

هنده‌ک جاران وێنه‌یه‌ک یان نڤیسینه‌ک دبه‌ به‌رسڤ یان رووره‌شکرنا گه‌له‌ک پرس و به‌رسڤان. د هنده‌ک نڤیس و وێنه‌یان دا ژی مرۆڤ بێبه‌ختی، رووره‌شی و کوردێن نۆکه‌رێ دژمنێ گه‌لێ کورد دبینه‌ و دخوینه‌.
هه‌ر ده‌ما ره‌وشا باشوورێ کوردستانێ به‌ر ب ئارامیێ ڤه‌ دچه‌ و گاڤێن سه‌رخوه‌بوونێ تێنه‌ ئاڤێتن، په‌که‌که‌ ژی ب هه‌موو ئیمکانێن خوه‌ ل دژ وان، باشوورێ کوردستانێ، رادوه‌سته‌. ب هه‌موو مه‌دیایا خوە یا کو یالچین کووچووکێ مامۆستایێ سه‌رۆکێ وان عه‌ڤدلا ژ وان را ئاماده‌کرییه‌ ل هه‌مبه‌ر بارزانیان ب کارتینن.
ئارمانج و هه‌ده‌فا په‌که‌کێ ئه‌وه‌ کو دێ چاوا و ب چ روو و رێبازان بارزانیێن کو، هه‌ر چار داگیرکه‌ران نه‌کاریبوون وان تێک ببن، کار دکن. کار دکن ژ به‌ر کو ل هه‌مبه‌ر داگیرکه‌ران ته‌نها بارزانی مانه‌ و ئه‌و ل سه‌ر لنگێن خوه‌ نه‌ و ژ بۆنا گه‌لێ خوه‌ د ناڤا کار و خه‌باتێ دا نه‌.
ل گۆر رێ و رێبازا بارزانی یێ نه‌مر، ب هێز و قوه‌تا پێشمەرگه‌ یێن قه‌هره‌مان، ل گۆر نه‌رین و دتینێن سه‌رۆک مه‌سعود بارزانی کورد بوونه‌ خوه‌دی پارچه‌یه‌ک کوردستانا ئازاد. لێ ئه‌ڤ ئازادی بوویه‌ که‌له‌مێ به‌ر چاڤێن داگیرکه‌ر و کرێگرتیێن وان.
ئه‌م باش دزانین کو داگیرکه‌رێن مه‌ تم ل گه‌ل هه‌ڤ خه‌بتینه‌ و دخه‌بتن کو دێ چاوا بارزانیان ژ هۆلێ راکن. ژ به‌ر کو وان فێم کرنه‌ بارزانی بوویه‌ کوردستان، لۆما دخوازن وێ کوردستانا کو بارزانی دپارێزن نەهێلن. لێ د ده‌م و ده‌ورانا نها دا، نکارن بارزانیان راسته‌ راست ل سه‌ر ده‌ستێ خوه‌ ژ ناڤببن . ژ بۆنا وێ ژی هنده‌ک پارتی و ته‌ڤگه‌رێن ل سه‌ر ناڤێ کوردان، لێ یا وان ب خوه‌یه‌ دامه‌زراندن دا کو ل سه‌ر ده‌ستێ وان شه‌رێ کوردان و بارزانییان بکن.
داگیرکه‌ران په‌که‌که‌ دامه‌زراند و به‌ردان کوردان دا کو وان تار و مار بکه‌. ل باکورێ کوردستانێ ب سه‌ر که‌تن. رۆژاڤا خستنه‌ چ حالێ دا ژ خوە دیاره‌. نها ته‌نها د ده‌ستێ وان دا ئازادیا باشوورێ کوردستانێ مایه‌ کو وێ ژی تێک ببن. کوردان ئێدی ل گۆر خوه‌ دیزاین ئانگۆ وه‌که‌ ئه‌و دخوازن بکن. د ئه‌سلێ خوه‌ دا ئارمانجا داگیرکه‌ران و پێگرتێن وان کورد و کوردستانه‌، لێ ژ بۆنا هنده‌ک بێعاقلێن ئه‌ندامێن خوه‌ و هنده‌ک کوردان بخاپینن خوه‌ ته‌نێ وه‌که‌ ل دژ بارزانیان نیشان ددن.
کوردنۆ دڤێت هوون ژی ئێدی شیار بن و بزانبن کو ئارمانج و هه‌ده‌فا په‌که‌کێ نەهێلانا گه‌لێ کورد و بارزانییانه‌. هه‌گه‌ر د رۆژێن وه‌ها دژوار دا کورد خوه‌ نه‌دن دۆرا بارزانیان، هه‌گه‌ر هه‌می کورد ل گه‌ل پارتی و ته‌ڤگه‌رێن خوه‌ ژ بارزانیان را نه‌بن پشتگر، هوونێ بزانبن کو وێ ئه‌و پارچا ئازاد تێک هه‌ره‌ و پشتی وێ ژی دێ ئێدی کورد وه‌که‌ کورد نه‌مینه‌.
نها په‌که‌که‌ ل گه‌ل هه‌می داموده‌زگه‌هێن خوه‌، د مه‌دیایا خوه‌ دا، د رادیۆ و ته‌له‌ڤزیۆنێن خوه‌ یێن کو ب ده‌ستێ ده‌وله‌تێ ژ وان را هاتنه‌ دامه‌زراندن، ده‌ست ب پرۆپاگاندا ل دژ بارزانیێن کو ئه‌ڤ سه‌د سالێن داگیرکه‌ران نکاریبوون زۆرا وان ببن، دکن.
هه‌لبه‌ت دژمن ئانگۆ داگیرکه‌رێن مه‌ کارێ خوه‌ دکن. ژ بۆنا کوردستان ئازاد نه‌به‌ و نه‌به‌ ده‌وله‌ت چ ژ وان تێ ل گه‌ل خولامۆکێن خوه‌، ل گه‌ل پارتیێن کو وان ل سه‌ر ناڤێ کوردان دامه‌زراندنە شه‌رێ بارزانیان کو د ئه‌سلێ خوه‌ دا شه‌رێ کوردان دکن.
هه‌تا ده‌ره‌کێ ئه‌م ڤێ فێم دکن. لێ یا نایێ فێمکرن ئه‌وه‌ کو ل هه‌مبه‌ر ڤان پرۆپاگاندێن په‌که‌کێ، وان ته‌ڤگه‌ر و پارتیێن کو دبێژن ئه‌م نه‌ته‌وه‌یی نه‌، بێ ده‌نگن. وان که‌س و شه‌خسێن سبێ هه‌تا ئێڤاری کارێ وان ره‌خنه‌کرنا ده‌ستهلاتا باشوورێ کوردستانێ و بارزانیانه‌، ل هه‌مبه‌ر ڤێ پرۆپاگاندا په‌که‌کێ بێ ده‌نگن.
یا گرنگ ژی ئه‌وه‌ کو هنده‌ک پارتیێن کو ژ خوه‌ را دبێژن ئه‌ز کوردستانی مه‌ و ل گه‌ل په‌که‌کێ پرۆتۆکۆلێن ب هه‌ڤرا کارکرنێ ئیمزا کرنه‌ و دکن و ل هه‌مبه‌ر ڤان گه‌فێن وان بێده‌نگن. هوون بزانبن کو ئێدی ب ئاشکه‌ره‌یی دیار دبه‌ کو ئه‌و ژی هه‌ڤکارێن ڤان گه‌فێن په‌که‌کێ نه‌. واته‌ کوردستانیبوونا وان هه‌تا کو به‌رژه‌وه‌ندیا وان دقه‌دیه‌…هنده‌ک پارتیێن کو ٤۰-٥۰ سالان ل دژی په‌که‌کێ بوو و نها ژ به‌ر هنده‌ک به‌رژه‌وه‌ندیێن شه‌خسی که‌تیه‌ ڤی حالی، حه‌یف و گونه‌هه‌…ژ به‌ر کو ئێدی هه‌ڤکارێ وان نها په‌که‌که‌یه‌ و په‌که‌که‌ ژی ب هه‌می هێز و قەوه‌تا خوه‌ ل دژ دۆزا کورده‌.
ژ به‌ر ڤێ ئه‌ز ڤه‌کری دبێژم: ئه‌و شه‌خس و پارتیێن ئالیکاری یان پشتگریا په‌که‌کێ دکن، ئه‌وێن ل هه‌مبه‌ر هه‌می کریار، بوویه‌ر و پرۆپاگاندێن وان یێن ل دژی کوردستانێ و بارزانیان بێ ده‌نگن، هوون بزانبن ئه‌و ژی ئاڤێ دکشینن سه‌ر ئاشێ په‌که‌کێ دا کو هه‌می کوردان باش بهێره‌.
کوردنۆ ڤێ یه‌کێ باش بزانبن هه‌گه‌ر باشوورێ کوردستانێ تێک هه‌ره‌ و بارزانی نه‌مینن ئێدی کورد ژی نامینن. هه‌بوونا کوردان یا ئیرۆ، ب پاراستنا باشوورێ کوردستانێ و خوه‌دی ل بارزانییان ده‌رکه‌تاندنێ دایه‌. ژ بلی ڤێ چو رێیێن دن نینن. ئێدی کی چاوا ڤان بوویه‌ران دخوینه‌ و دبینه‌، کی ئێدی ل هه‌مبه‌ر ڤان بێده‌نگ بن، ئه‌و ب زانین ئان نەزانین ئالیکار و پشتگرێ په‌که‌کێ نه‌.

بووبێ ئه‌سه‌ر