رێز ل شه‌رڤانان بێ گرتن کو سوریه پاراستنه
حکومەتا سوەریێ داخازێ ژ چەکدارێن هێزێن سوریا دەمۆکراتیک دکە کو تەڤلی رێزین لەشکەرێ عەرەبیێ سوریێ و پۆلیسێن حکومەتێ ببن.
ل گۆر داخویانیا حکومەتێ دیار دبە کو رژێما سوریێ هەتا نوها هێزێن سوریا دەمۆکراتیک وەکە هێزەکە سەر ب رێڤەبەریێن خوەسەر و هێزەکا نیزامی قەبوول ناکە و ب چاڤێ میلیشا ل وان دنێرە.
فه‌رمانداریا گشتی یا هێزێن سوریا ده‌مۆکراتیک (هەسەدە) د داخویانیه‌کێ دا، به‌رسڤا بانگ و داخوازا وه‌زاره‌تا به‌ره‌ڤانیێ یا سوریێ دا، کو داخواز ژ ئه‌ندامێن هەسەدێ کربوو ژ بۆنا رووبرووبوونا ئێریشێن ترکیێ ته‌ڤلی ڕێزێن ئارتێشا سوریێ ببن.
هەسەدە د داخوویانیا خوه دا دبێژه: “ئه‌م یه‌کگرتیبوونا هه‌ولان بۆ پاراستنا سوریێ ل دژی ترکیێ بلند دنرخینن، لێ ڕێکخستنا هێزێن له‌شکه‌ری دڤێ د چارچۆڤه‌یا چاره‌سه‌ریه‌که گشتگیر دا به.”
هەسەدێ هه‌روها راگهاندیه کو دڤێ ڕێز ل وان شه‌رڤانان بێ گرتن کو سوریه پاراستن و داعش شکاندن و دیار دکه، “هێزێن سوریا ده‌مۆکراتیک هێزه‌کا له‌شکه‌ری یا ته‌مام و ڕێکخستی و ب دیسیپلینه و ل شوونا سوریێ و هه‌موو جیهانێ ل دژی داعشێ شه‌ر کر و خلافه‌ت شکاند.”
هەسەدە ره‌خنه‌یێن توند ژی ل وێ بانگا حکومه‌تا سوریێ دگره و دبێژه: “پێویست بوو حکومه‌تێ بانگ ل فه‌رمانداریا گشتی کربا نه ل شه‌رڤانان.”
فه‌رمانداریا هەسەدێ دبێژه: “بانگا وه‌زاره‌تا به‌ره‌ڤانیێ یا سوریێ وه‌که ڤێ یه‌کێ تێ کو لێبۆرین ژ بۆ تاوانباران و ته‌رۆریستان ده‌رخستبه، له‌ورا ئه‌م ڤێ شێوازا داخوازا ته‌ڤلیبوونا ئارتێشا سوریێ ره‌د دکن.”
ئه‌ڤ داخویانیا هەسەدێ پشتی ڤێ یه‌کێ تێ کو وه‌زاره‌تێن ناڤخوه و باره‌ڤانیێ یێن سوریێ، بانگ ل شه‌رڤانێن هەسەدێ و ئاساییشا ڕۆژاڤایێ کوردستانێ کربوو کو ته‌ڤلی ئارتێشا سوریێ و پۆلیسان ببن.
