زەحمەتیا کوردبوونێ و ستەما داگیرکاران پارتی دامەزراند
سەختیا کوردبوونێ و ستەما داگیرکارێن کوردستانێ پارتی دامەزراند
نڤیسینا: ھۆگر نێروەیی
پارتییا دەموکراتا کوردستانێ (پارتی)، د قۆناغ و ھەلومەرجەکێ سەخت یێ کوردبوونێ دا دامەزری، دامەزراندنا پارتی نە ژ بۆ دژبەریا شەخس و پارتیەکێ بوو، نە ژ بۆ دوژمناتیا نەتەوەیەکا دن بوو و نە ژ بۆ بەرژەوەندیا بنەمالەکێ بوو، لێ پارتی، پارتییەکا تمام نیشتیمانییە کو دروستبوونا پارتی بتنێ ئامرازەک بوو ژ بۆ گەھشتا ئارمانجەکا مەزنتر کو تەڤ چین و توێژێن جڤاکی ب تەڤ رەنگ و ئایدیۆلۆژیان ڤە ل ژێر چەترا نیشتیمانیبوونێ کوم بکەت ژ بۆ رەتکرنا ستەما وڵاتێن داگیرکار.
ل وی دەمی پارتی دامەزری کوردبوون ژ سەختیێ سەختر بوو، کوردبوون ل گۆپیتکا سەختبوونێ بوو، ل وی دەمی نە دراڤ ھەبوو نە کۆشک و تەلار نە چەک نەکەسێ ژی دزانی ساخ دێ مینیت یان مری، لێ ب تنێ ئیرادەیەکا بھێز یا کوردبوونێ ھەبوو کو پر بوو ژ وان مێرخاسان یێن جانێ خوە ل بەریا ھەر تشتەکێ دانابوو خوە گوری ئازادکرنا کوردستانێ بکەن. ب وێ ئیرادەیا بھێزا یا کو ژ بابەلیسک و توفانان بھێزتر پارتی شۆرەش بەرپاکرد ل دژی ستەما زۆحاکێن ئێک ل دیف ئێکێن عیراقێ.
د بزاڤا رزگاریخوازا گەلێ کوردستانێ دا دامەزراندنا پارتی وەچەرخانەکا دیرۆکی و گرنگ بوو، ل وی دەمی شۆناسی نەتەوەیا کوردان بەرەڤ نەمانێ دچوو بدامەزراندنا پارتی زیندی بووڤە، پارتی ئالایێ قەدەغەکری یێ کوردستانێ ل جەم وڵاتێن نەحەز و داگیرکار ل چیایێن کوردستانێ بلندراکر تا گەھاندیە کوشکێن والی و میر و پاشایێن ولاتێن جیھانێ، زمانێ دایک یێ قەدەغەکری یێ کوردی کرە زمانێ فەرمی یێ نەتەوەیی. دەما پارتی دامەزری جارەکادن بەرخوەدانا نەتەوا کورد بروحیەتا سەردەمێ مھابادێ ب رێبەریا بارزانی یێ نەمر کو ھەڤسەنگەرێ شەھیدێ زیندی شەھید قازی بوو، زیندی بووڤە.
پارتی کورد ژ خێل، بنەمال و جیاوازیا زاراڤان ئینا دەرێ و کوردستانیبوون کرە د مەژییێ تاک ب تاکێ کوردان دا کو پاشەرۆژا تەڤ کوردان ب ھەڤرا گرێدایە ب درۆشمێ “یان کوردستان یان نەمان” دەست ب شۆرەش و خەباتا خوەکر.
پارتی شەرعیەت دا کو نەتەوا کورد ژی مینا تەڤ نەتەوێن دن خوەدیێ دۆزەکا رەوایە، کو کورد خوەدیێ زمان و کلتور و ئاخ و نیشتیمانێ خوەیە. پارتی و نەتەوا کورد تمامکەرێن ھەڤ بوون. دەما پارتی دامەزری، هینگێ نەتەوەیا کورد گەلەک پێدڤی ب پارتیەکا نیشتیمانی یا مینا پارتیێ بوو، پارتی ژی پێتڤی ب خوەراگری و بەرخوەدانا نەتەوەیا کورد بوو ژ بۆ دەستڤەئینانا تەڤ مافێن رەوایێن نەتەوەیەکا ژێردەست و ستەملێکری.
پارتی کو دچیتە د ژیێ 76 سالیا خوە دا چانتا وێ پرە ژ دەستکەفت و سەروەری و شۆرەش و داستانان، د بەھارا ژیێ خوە دا دەست ب شۆرەشا ئیلۆنا مەزن کرد کو د ئەنجام دا بۆ ئێکەم جار مافێ ئۆتۆنۆمی بۆ نەتەوەیا کورد زامن کر ب دانپێدانا ولاتەکێ داگیرکارێ کوردستانێ، پشتی رێکەفتنا جەزائیر کو تەڤ جیھان جارەکا دن نەیاریا خوە بۆ نەتەوەیا کورد خۆیاکر، دوژمن و داگیرکارێن کوردستانێ شەرابا سەرکەفتنێ ڤەدخار و دگوت ئێدی رۆژا ئاسمانێ کوردان بتمامی ئاڤابوو ئێدی ھەلناھێتەڤە، لێ پارتی جارەکا دن سەرکێشی کر و د ماوەکێ کێم دا شۆرەشا گولانێ بەرپاکر و شەرابا دوژمنان لێکرە ژەھر، کو شۆرەشا گولانێ ئەو ئومێد بوو یاکو د ناڤ بێئومێدان دا دروستبووی. ل دەما داویھاتنا شەرێ ھەشت سالی یێ ئیران و عێراقێ رژێما بەعس تەڤ فوکسا خوە ئێخستە سەر وان ناوچەیێن پێشمەرگێن پارتی لێ خەبات دکر بۆ داوی ئینانا بزاڤا کوردی، لێ پارتی کێمتر ب ھزار پێشمەرگەیان سۆپایێ مەزنێ رژێما بەعس تێکشکاند، پاشەڤە زڤراندن و رژێما بەعس بھزاران کوشتی دیف خوە ھێلان و سەدان سەربازێن وان ئێخیسربوون ددەستێن پێشمەرگان دا و داستانا مەزنا خواکورکێ تومارکر.
پارتی سەرکردایەتیا بەرەیێ کوردستانێ کر، سەرھلدان بەرپاکر و دوژمن ژ پرانیا باژارێن باشوورێ کوردستان دەرئێخست کو پەرلەمان، حکومەت و دامەزراوێن دن بەرھەمێ سەرھلدانێ بوون. ئێکەم جار کورد د دیرۆکێ دا بوونە خوەدیێ دامەزراوێن فەرمی ب رێیا دەنگدانا دەموکراسی و نیمچە ھەرێمەک دامەزراند.
پشتی ژناڤبرنا رژێما بەعس دەستورەک نوو هات نڤیسین و ھەرێما کوردستانێ تێدا چەسپاند ب شەڕعیەتدانا وڵاتێن ناڤدەولەتی. پارتی مافێ چارەنڤیسێ گەلێ کوردستانێ ژ درووشمان کرە کریار و ل ئیلۆنا سالا 2017 پراکتیزەکر، وی دەمی سەرۆک بارزانی ب تەڤ جیھانێ گوت نەخێر ب گەلێ کوردستان گوت بەڵێ و رەفەراندۆم رەخساند. ب رێیا رەفەراندۆمێ ئێکەم جار د دیرۆکێ دا گەلێ کوردستانێ ب ئازادانە بریار ل سەر مافێ چارەنڤیسێ خوە دا کو ب درێژاهیا دیرۆکێ ھەر جارێ کۆلۆنیالیزما (داگیرکاریا) وڵات و ئیمبراتوریەت و مامەلکەتان بریار ل سەر مافێ چارەنڤیسێ گەلێ کوردستانێ ددا کو تەڤ جاران کورد بێ ماف دکرن.
پارتی کورد ئینانە د ناڤ ھاوکێشەیێن سیاسی دا و ژ نەبونێ ئینانە ھەبونێ، ل شوونا بژاردا رادەستبونێ کو نەبون ھژماردکرن بژاردا رێکەفتنێ بۆ کوردان ئینا ھەبونێ کوردان ژی ئێدی بریار ل سەر مافێن خوەدان.
پارتی پارتییەکا دەموکراسی یە باوەریەکا تمام بھەڤراژیانێ ھەیە و مەتۆد و ئایدیۆلۆژیا پارتی کوردستانیبوونە، تەڤ رەنگێن جیاواز موسلمان، مەسیحی ئێزدی و کاکەیی تەڤ ئولان بێ جوداھی ل باوەشا خوە دگریت، ل سەر بنەمایێ نیشتمانیبوونێ، چو ئایدیۆلۆژیا و ئولەکێ ب سەر یێ دن نائێخیت بەلکو بتنێ باوەری ب پرەنسیپێ یەکسانیوون و دادپەروەریێ ھەیە.
پارتی ھەر ژ دەسپێکا دامەزراندنا خوە تا نھا خوەندەکار کرە سەرەرم، لاو کرە پاشەرۆژ، بەشداری ب ژنێ کر ل تەڤ جومگێن دەسھەلاتێ بێجوداھیا رەگەزی.
پارتی د بنەرەت دا مینا ھەر پارتییەکادی بتنێ پارتییەکە، لێ ئارمانج و پرەنسیپێن پارتی ھەردەم ژ پارتییان مەزنتر بوویە، ناسیۆنالیزما کوردی ب رێبەریا سەرۆک بارزانی سنورێن دەستکردێن سایکس_ پیکۆ شکاندن دەما پێشمەرگە یێن باشوورێ کوردستانێ دھەوارا کۆبانا رۆژئاڤایێ کوردستانێ چوون داکو کۆبانێ نەکەڤیتە دەستێن چەپەڵێن خەلافاتا ئیسلامێ ل عیراق و شامێ (داعش)ێ دا.
پارتی ل باشوورێ کوردستانێ هاتیە دامەزراندن لێ چوجاران ب تنێ خەباتا وێ ژ بۆ پارچەیەکێ یان تنێ ئالیگرێن خوە نەبویە، لێ وێ خوە ب خەمخورو نوونەراتیا تەڤ کوردان کریە ل ھەر چار پارچەیێن کوردستان ل ھەر جھەکێ تاکێ کورد لێ بویە دھەوارێ چوویە و ل سەرمافێن وان شەرکریە، ھندەک جاران ژی ل زێدەیی شیانێن خوە بۆ ھەمی لایەکێ مەزاختینە باج و قوربانی ژی دایە ل سەر ھەڵوەستیێن خوە، لێ پارتی دامەزریە قوربانیێ بدەت چونکە پێناسەیا جەوھەرا پارتی نیشتیمانییە، نەتەوەیی یە و کوردە پاشان پارتییە.
١٦ێ تەباخێ، رۆژا دامەزراندنا پارتی و ژدایکبونا سەرۆک بارزانی ل تەڤ پارتی و کوردستانیان پیرۆز بت
