شۆرەشا گولانێ ژ بۆ من خواندنگەھەکا تیۆری و پراکتیکی بوو
مالپەرا مە، سبەهی، ب هەلکەفتا شۆرەشا گولانێ دۆسیەیەک ڤەکریە ل ژێر ناڤێ: ئەز و شۆرەشا گولانێ.
د ڤێ چارچۆڤەیێ دا چەند پێشـەرگەیێ یێن دێرین بەرسڤا پرسێن
مالپەرا مە ددن کو، یەک ژ وان ژی برێز ئیدریس تروانشی یە.
سبەهی: تو وەک پێشمەرگە یێ دێرین، شۆرەشا گولانێ ژ بۆ تە چیە؟
ئیدریس تروانشی: شۆرەشا گولانێ ژ بۆ من رەتکرنا پیلانگێریا جەزائێر یا ناڤدەولەتی بوو، ڤەژاندن و ڤەگەراندنا ھێڤی و ئۆمێدێ ژ بۆ گەلێ کورد بوو، بزیندیھێلانا ڤێ دۆزا گەلێ کوردە و رژدی و موکوریا گەلێ کوردە ب سەرکێشیا پارتییا دەموکراتا کوردستانێ ل سەر بدەستڤەئینانا مافێن رەوا یێن گەلێ کورد و تەحەدیا ھەموو ھێز و ئاستەنگیان بوو.
٢- تو چ ژ وێ شۆرەشێ فێر بووی؟
ئیدریس تروانشی: کا ئەز چ ژ ڤێ شۆرەشێ فێربووم: شۆرەشا گولانێ ژ بۆ من خواندنگەھەکا تیۆری و پراکتیکی بوو، دناڤ شۆرەشێ دا ئەز شیام فێری خوەراگریێ، ئاستەنگێن دژوار، بۆمبەباران، ژیانا د ناڤ سەنگەر و چەپەرێن پێشمەرگەی دا ببم، ئەز فێری دسپلینێ و پێگیریێ ب فەرمانێن شۆرەشێ بووم. د سەر ھندێ را کو شۆرەش د ناڤ شکەفت و چیایێن ئاسێ دا بوو، لێ چو بارەگایێن شۆرەشێ بێی پەرتووک و پەرتووکخانە نەبوون، لۆما شۆرەشێ دەلیڤێن خواندنا پەرتووکان بۆ من ڤەکرن. ئەز شیام ژ سەربۆرا ھەڤالێن خوە یێن پێشمەرگێن دن پتر فێری سەربۆرێن ژیانا شۆرەشگێریێ ببم. تشتی دی یێ گرنگ ئەو بوو کو شۆرەشێ قادا بەخشینێ یە، ئەڤ بەخشینە، خوین بیت، دەم بیت یان ژییێ مرۆڤی بیت.
٣- تە چ دا شۆرەشێ و شۆرەشێ چ دا تە؟
ئیدریس تروانشی: د بەرسفا پسیارا پێشیێ دا، من ئاماژە پێدایە کو شۆرەش جھێ بەخشینێ ئانکو دانێ بوویە، تشتێ ئەز شیام د ژیێ ١١ سالیێ دا پێشکەشی شۆرەشێ بکەم:
مانا من و دوو برایێن من بێ سەمیان و ڤەشارتی، چونکە بابێ من پەیوەندیێ ب شۆرەشێ دکەت و دایکا من ژ لایێ رژێما بەعسا فاشی ڤە دھێت گرتن و زیندانکرن، ئەڤ دەمە بۆ من گەلەکێ نەخوەش بوو. دەمێ ئەز ل سالا ١٩٨٦ دبم پێشمەرگە ژی، ھەر ئەرکەکێ ب من ھاتبیت راسپارتن، بێ دوودلی من جیبجی کریە. وژدانا من ئارەمە کو من بێخەمی د دەرحەقێ شۆرەش و مللەتێ خوە دا نەکریە. ئەو کەسێ ب بیر و باوەر رێیا خەبات و شۆرەش و تێکۆشینێ ب ھەلبژێریت، چاڤەرێی چو دەستکەفتێن کەسۆکی نابیت، لێ ب گشتی شۆرەشێ ئازادی دا مللەتێ من، کو ئەز ژی تاکەکێ وی مللەتی مە، ستەم و زۆرداریا ل سەر مللەتێ کورد راکر و ئەڤرۆ ل سەر ئاخا خوە و ل ژێر دەستھەڵاتداریا خوە ب ئازادی دژیم، ئەڤە ژی ژ بۆ من مەزنترین دەستکەفتێ شۆرەشێ یە.
ل داویێ دەستخوەشیێ ل مالپەرا سبەھی دکەم ژبۆ ڤەکرنا ڤێ دۆسەیێ، وەرگرتنا دیتن و نەرینێن پێشمەرگێن شۆرەشا گولانێ د نرخاندنا وێ شۆرەشێ دا کارەک راست و دروستە
ئیدریس تروانشی
