پەیامەك ل سەر گوهەرتن و دەستکاریێن پرۆژەیاسایا بودجەیێ
پەیاما نێچیرڤان بارزانی سەرۆکێ هەرێما کوردستانێ ل سەر گوهەرتن و دەستکاریێن پرۆژەیاسایا بودجەیا عیراقێ:
ئه‌م ب دلگرانیه‌کا مه‌زن ل ده‌ستکاری و گوهه‌رتنێن وان ماده‌یێن پرۆژه‌یاسایا بودجه‌یا ئیراقێ دنێرن کو په‌یوه‌ندیا وان ب مافێن ده‌ستووری یێن هه‌رێما کوردستانێ ڤه هه‌نه و ئه‌م ب یه‌کجاری وان ده‌ستکاری و گوهه‌رتنان ره‌د دکن. ئه‌ڤ پێنگاڤ ئاسته‌نگان ل به‌ر پرۆژه‌یاسایا بودجه‌یێ چێدکه کو، هه‌موو ئیراقی ب هیڤی چاڤێن وان لێ یه کو ژ بۆ سێ سالێن بێ بهێتە په‌سه‌ندکرن.
پابه‌ندبوونا ب رێکه‌فتنا سیاسی یا هه‌ڤپه‌یمانیا رێڤه‌به‌رنا ده‌وله‌تێ، بنگه‌ها سه‌قامگیری و ئارامیا سیاسی یا ئیراقێ و پێنگاڤه‌که راسته به‌ر ب پاشه‌رۆژه‌که باشتر ژ بۆ وه‌لات و هه‌موو پێکهاته‌یێن وێ. ره‌ڤینا ژهه‌ڤتێگەهشتنێ و رێکه‌فتنان و هه‌ولدانا بنپێکرنا مافێن ده‌ستووری یێن هه‌رێما کوردستانێ، ب ته‌مامی به‌رۆڤاژی به‌رپرسیاریا نیشتمانی یه و ژ بلی بێهیڤی و ئالۆزکرنا ره‌وشا سیاسی، تشته‌کی دن ژ هه‌ڤ ده‌رناخه و زیانێ دگەهینه ته‌ڤاهیا ئیراقێ.
ده‌مێن بۆری و ئه‌زموونان سەلماندیە کو، سه‌ره‌ده‌ریکرن ب لۆژیکا هێز، پرانی و کێمانی و بنپێکرنا ماف و شاییسته‌یێن پێکهاته‌یێن ئیراقێ، چو جاری سه‌قامگیری و ئارامی نه‌دایه وه‌لات، له‌ورا بانگ ل هه‌موو ئالیان و ب تایبه‌تی ئالیێن هه‌ڤپه‌یمانیا برێڤه‌برنا ده‌وله‌تێ دکم کو، پابه‌ندی رێکه‌فتنان بن و ئه‌م هه‌موو ب به‌رپرسیاری ته‌ڤبگه‌رن و ئالیێن کوردستانی ژی دڤێ ب یه‌کرێزی مافێن خوه یێن ده‌ستووری بپارێزن.
ئه‌م دووباره دکن کو هه‌رێما کوردستانێ، وه‌ک هه‌رتم، ئاماده‌یه ل سه‌ر بنگه‌ها ده‌ستوورا ئیراقێ هه‌موو پرسگرێکان چاره‌سه‌ر بکه و ئه‌زموونا چه‌ند مه‌هێن بۆری، بهه‌ڤراکارکرن و لهه‌ڤتێگەهشتن و یه‌کرێزیا د ناڤبه‌را هێز و ئالیێن ئیراقی دا و کارکرن ب رێکه‌فتنا پێکانینا حکومه‌تا فه‌ده‌رال یا ئیراقێ، جهێ دلخوه‌شییا گه‌لێن ئیراقێ و دۆستێن وێ بوو، ژ به‌ر وێ ژی دڤێ ئه‌م ل سه‌ر وێ رێ به‌رده‌وام بن و رێ نه‌دن کو هنده‌ک که‌س ببن ئه‌گه‌رێ تێکبرنا رێکه‌فتنان و ره‌وشێ ئالۆز بکن.
نێچیرڤان بارزانی
سه‌رۆکێ هه‌رێما کوردستانێ
٢٠٢٣/٥/٢٦
