مه‌خموور ژ بۆ پەکەکێ ژ کامپه‌ک سڤیل پتر جهه‌ک لۆژیستیكە
پارتیا کارکه‌رێن کوردستانێ (په‌که‌که) ژ بۆ کامپا مه‌خموور بانگ دکه و دده خوویاکرن کو، ڕه‌وشا مه‌خموور نه باشه و تایبه‌تی داخواز ژ نەتەوەیێن یه‌کبوویی دكە كو ئێریشێن ترکیێ بسه‌کنینه.
هه‌روه‌ها د داخوویانیێ دا هاتیه کو، پشتی ئێریشا ل هه‌ولێر هێزێن سەر ب پارتیا دەمۆكراتا كوردستانێ (پەدەکە) ڤە ڕێیێن مه‌خموور گرتنه و خه‌لک نکارە وه‌ک به‌رێ ناڤبه‌را هه‌ولێر و مه‌خموور دا چوویین وهاتنێ بکە.
به‌رپرسێن پەکەکێ ل مه‌خموور د داخوویانیا خوه دا دبێژن: ھندی حکومه‌تا عیراقێ و نه‌ته‌وه‌یێن یه‌کبوویی ل هه‌مبه‌ری ڤان ئێریشێن ده‌وله‌تا ترک بێده‌نگ بن، دێ ئێریش زێده‌تر ببن. مه ده‌ربارێ ئێریش و زه‌ختان گه‌له‌ک نامه ژ نوونه‌رێن سازیێن پێوه‌ندیدار ڕا شاندن و داخویانی دان. لێ هه‌تا نها نه حکومه‌تا عیراقێ و نه ژی نه‌ته‌وه‌یێن یه‌کبوویی ل ھەمبەری ئێریشێن ده‌وله‌تا ترکی چ نه‌رازیبوون نیشان نه‌دانه. ل گۆری حقووقا ناڤنه‌ته‌وه‌یی ئێریشێن هه‌وایی یێن ترکیێ سه‌روه‌ریا عیراقێ بن پێ دکه. ئه‌ڤ ڕه‌وش ل دژی پەیمانا کۆمیسه‌ریا بلند یا په‌نابه‌ران یا نه‌ته‌وه‌یێن یه‌کبوویی یه. ئه‌م بانگ ل نه‌ته‌وه‌یێن یه‌کبوویی دکن کو بلا ژ بۆنا ڕاکرنا ئامبارگۆیا ل سه‌ر کامپێ تێکه‌ڤه ناڤ هه‌ولدانان. ئه‌م بانگ ل ترکیێ ژی دکن کو بلا ئێریشی کامپا مه‌خموورێ نه‌که. حکومه‌تا عیراقێ ژی ل ھەمبەر وان ئێریشان دڤێ نه‌رازیبوونێ نیشان بده. جڤاکا ناڤنه‌ته‌وه‌یی و پارێزڤانێن مافێن مرۆڤان ژی دڤێ ل هه‌مبه‌ری ڤێ ئێریشا ده‌وله‌تا ترک نه‌رازیبوونێ نیشان بدن.”
هه‌روه‌ها د هه‌مان داخوویانیێ دا به‌رپرسێن پەکەکێ ڕه‌خنا ل هه‌لوه‌ستا پەدەکێ ژی دکن و دبێژن:
- د هه‌مان ڕۆژێ دا هێزێن ئاسایشێ یێن پەدەکێ هندەك که‌سێن سڤیل ل کامپێ گرتن وئەو كەس بێ سەرووشوێن كرنە.
- ژ 19ێ تیرمه‌هێ و ڤر ڤه که‌تن و ده‌رکه‌تنا کامپێ هاتیه قه‌ده‌غه‌کرن و ناهێلن کو چ که‌س ژ کامپێ ده‌رکه‌ڤە.
- ده‌ستوور نایێ دایین که‌سێن ل ده‌رڤه‌یی کامپێ نه، بچن سه‌ر کارێ خوه. گه‌له‌ک که‌سێن ل هه‌ولێرێ دخه‌بتین ژ کارێ خوه بوون.“
پەکەکە وه‌ک هه‌ر جاران د سیاسه‌تا خوه دا دورووتیێ دکه و نووچه‌یێن ده‌ره‌و ڕادگەهینه. بوویه‌را ته‌رۆریست یا هه‌ولێرێ یا کوشتنا کارمه‌نده‌کی یێ کۆنسولوسخانه‌یا ترکیێ و دو هه‌ڤوه‌لاتیێن کوردستانێ، ل دژی ده‌ستکه‌فتیێن کوردستانێ بوون و ئارمانجا ژ ڤێ ئێریشێ ئه‌و بو کو ئارامیا هه‌رێمێ تێکبدن و د ده‌ربارێ ئالۆزکرنا ڕه‌وشا کوردستانێ دا ژ بۆ خوه زه‌مینه‌ک یێ پرۆپاگانده‌یێن ده‌ره‌و ئاماده بکن.
هه‌رکه‌سه‌ک دزانه کو بریارا بوویه‌را هه‌ولێرێ ل قه‌ندیل و مه‌خموور هاتیه ستاندن. که‌سێن چالاکی کرین چووین وهاتنا مه‌خموورێ دکرن و مه‌خموور ژ بۆ خرابیێن پەکەکێ ژ کامپه‌ک سڤیل پتر جهه‌ک لۆژیستیکه .
ئارمانجه‌ک دن یا ئێریشێن پەکەکێ دژاتیا سیاسه‌تا خه‌تا نه‌ته‌وەیی یه كو د ڕۆژا مە دا نوونه‌رێ ڤێ خه‌تێ ژی پەدەکە یه. پەکەکە وسا باوه‌ر دكە کو ب شکه‌ستنا پەدەکێ ئەو دێ بگەھە ئارمانجێن خوه .
ژ بۆ ڤێ یه‌کێ ژی ب هه‌موو ئاوایی ئێریشێ پەدەکێ دکه. حوکومه‌تا هه‌رێما کوردستانێ دڤێ ل هەمبه‌ر کریارێن پەکەکێ هه‌موو ئاوایێن ته‌دبیرا بستینه و بریارێن ڕادیکال د ڤێ ده‌ربارێ ده بگره. نابە حوکومه‌ت ب چ ئاوایی ڕێ بده کو که‌سه‌ک هه‌ولبده ئارامیا کوردستانێ تێکبده.
پەکەکە وه‌ک هه‌ر جار ده‌ره‌وا دکه و ده‌ما دکه‌ڤه ته‌نگاسیێ دا، ده‌ست ب ده‌ڤنه‌رمیا دکه و سیاسه‌تا خوه یا ل سه‌ر ده‌ره‌وا هاتی ئاڤاکرن تێخه ڕۆژه‌ڤێ دا.
ل هەمبه‌ر ڤێ سیاسه‌تا پەکەکێ یا ل دژی ده‌ستکه‌فتیێن کوردستانێ ، پێویسته هنده‌ک کادرۆ و ئالگرێن پەدەکێ کو سه‌مپاتیا وان ژپەکەکێ ڕه هه‌یه، خوه سه‌راست بکن و د ده‌ربارێ پەکەکێ دا ڕاستیا هه‌یی ببینن. ئه‌ڤ یه‌ک نه‌بە دێ ئه‌و که‌س ژ پەکەکێ پتر ببن ته‌هدیده‌ک ل سه‌ر خه‌تا نه‌ته‌وەیی و سیاسه‌تا پەدەکێ ب خوه.
نووچه/ئانالیز
