نە عەردهەژە، تۆفانە
عه‌ردهه‌ژا کو ل باکور و رۆژاڤایێ کوردستانێ چێبوو برینه‌ک مه‌زن د لاشێ کوردان دا ڤه‌کر و وێ ب سالان ئه‌ڤ برین ده‌رمان نه‌به. د دیرۆکێ دا گه‌له‌ک جاران ل باکورێ کوردستانێ عه‌ردهه‌ژ چێبوونه، وه‌ک ل باژارێن بینگۆل، وان و هنده‌ک باژارێن دن. لێ که‌سێ عه‌ردهه‌ژه‌ک ب ڤێ عه‌جێبێ نه‌دیتیه. تو دبێی قه‌ی ئه‌ڤ عه‌ردهه‌ژ ب تایبه‌ت ژ بۆ کوردان چێبوویه و سه‌رانسه‌رێ کوردستانێ دایه به‌ر خوه.
ژ باژارێ مه‌رسینێ بگرە هه‌تا ب دیلۆک، سه‌مسوور، ئامه‌د، مێردین، نسێبین، ئێله (باتمان)، ئه‌زرجان، مه‌ره‌ش، پازارجک، عه‌فرین و هه‌تا گه‌له‌ک باژارێن دن عه‌ردهه‌ژێ کورد دانه به‌ر شوورێ خوه و باندۆرا خوه هه‌تا ب باشوور و رۆژهلاتێ کوردستانێ ژی کریه. ئه‌ڤ نه ئه‌ردهه‌ژه، تو دبێی قه‌ی هنده‌کان ب تایبه‌ت بۆمبه‌یێن ئەتۆمێ ئاڤێتنه کوردستانێ، عه‌ردهه‌ژه‌ک ئه‌وقاسی گران و به‌رفره‌ه کو د سه‌رێ مرۆڤی دا پرس و پرسگرێکێن جودا چێدکه.
د خرابوونا باژاران و کوژتییێن عه‌ردهه‌ژێ دا ته‌نێ خوه‌دا و خوه‌زا نه گونه‌هبارن ( ژ به‌ر ڤێ کاره‌ساتێ هه‌لبه‌ت دێ هنده‌ک خوه‌دایێ دلۆڤان ژی گونه‌هبار بکن). گه‌له‌ک جاران قه‌ده‌ر و چاره‌نووسا مرۆڤ د ده‌ستێ مرۆڤ دایه. هه‌گه‌ر مرۆڤ خانییێ خوه ل سه‌ر ئه‌ساس و بنگه‌هه‌کی ساخله‌م چێکه، دێ خانییێ مرۆڤ زوو ب زوو هلنه‌وه‌شه.
تەماعی و به‌رژه‌وه‌ندییێ سه‌رێ مرۆڤان خواریه. ده‌رخستنا په‌ترۆل و گازێ، ده‌رخستنا کۆمر و که‌ڤرێن دن، کۆلانێن بنعه‌ردین، خرابکرن و هه‌رماندنا هه‌وا و خوه‌زایێ، جه‌رباندنێن چه‌ک و بۆمبه‌یێن کیمیاوی و گه‌له‌ک تشتێن دن مێزینا دنیایێ تێک برنه. ژ بۆ دراڤ و به‌رژه‌وه‌ندییێن زێده‌تر، مرۆڤان بۆمبه خستنه بنێ دنیایێ و بێیی کو ل پێشه‌رۆژا دنیایێ و مرۆڤاتییێ بفکرن، وان بۆمبه‌یان دته‌قینن و ڤێ دنیایا خوه‌ش تار و مار دکن.
ئەگەرەک دن، کو دیسا ب تەماعیێ و به‌رژه‌وه‌ندییێ ڤه گرێدایی یه، که‌س، شریکه‌ت و متاهتێن کو خانی و ئاڤاهییێن بلند لێدکن، بێیی کو ل ساخی و سه‌لامه‌تییا مرۆڤان بفکرن، هه‌ول ددن ب ئه‌رزانی و ب حاجه‌ت و پێدڤییێن ئه‌رزان ئاڤاهییان لێکن. بێیی کو حه‌سابێ عه‌ردهه‌ژێ بکن، نه ل سه‌ر حه‌سابێ پاشه‌رۆژێ لێ ل سه‌ر هه‌سابێ رۆژانه کارێ خوه دکن و ژیانا مرۆڤان دخن خه‌ته‌رێ.
وه‌رحاسل، کورد و کوردستان ئیرۆ بریندارن. دبێژن „ هه‌رکه‌س ل سه‌ر مرییێن خوه دگرین“. ئه‌م ژی ئیرۆ ل سه‌ر مرییێن خوه دگرین. د ڤان رۆژێن ته‌نگ و دلشه‌وات دا دڤێ هه‌ر کورد ل برایێن خوه خوه‌دی ده‌رکه‌ڤن و ده‌ستێن ئالیکارییێ درێژی وان بکن.
ئه‌م ب هه‌ڤ هه‌نه، ئه‌م ب هه‌ڤ خورتن و ده‌ستێ ب ته‌نێ ده‌نگ ژێ نایێ.
رۆژەڤاکورد
