ڤەھاندنا خەیالان ل سەر ڤەگەرا بۆ بەغدایێ
نڤیسین: سەردار هێتوتی
بەغدا ئەو ناڤێ گران، خۆەدانا حەسرەتا مەزن، جهێ تەختێ قرالی یا بۆ هندەکان بوویە قیبلەگەهـ، یێ د خەیالا خۆە دا ل دوورا کۆرسیا قرالی تەوافێ دکەن. وان پێناسا ناڤێ بەغدایێ ژ بیر کریە، نەمایە د بیردانکا وان دا کانێ بەغدایێ د ناڤا هەمی قوناغێن خۆە یێن سیاسی دا خۆدان هەمان بیرکرنا دڕندانە یا عەرەبی یە.
وان شۆڕەش، ترس، ڕەڤ، فرۆکە، توپباران و جینوساید ژ بیر کرنە، ژ بەر ترسا ژ بەغدایێ شۆڕەش هاتن دەسپێکرن و ژ بەر ترسا ژ بەغدایێ ڕەڤ و کۆمڕەڤ چێبوون، ژ بەر فروکێن وێ بەغدایێ دەما قرالێ عەرەبی بریار ددا، گوند وێران دبوون قوتابخانە و دێر و مزگەفت و پەڕەستگەهـ دگەل عەردی تەخت دبوون، زاروک د مرن پیر ژ پێیان دکەفتن و مرن هەلدبژارت و گەنجێن پری هیڤی شەهید دبوون.
بەغدا ب توبباران و بومبەبارانێ ڕحەت نەدبوو، وێ کیمیاباراند و جینوساید و تەڤکوژیا کوردان دەست پێ کر و ب هزاران خەلک ژ ناڤچوو کو گەرمیان و بەهدینان باشترین دیدەڤانێن ڤێ دڕنداتیا بەغدایێ نە.
هەر ئەو بەغدا بوو دەما دەلیڤە دیتی و د ناڤا ڕێکەفتنا جەزائیرێ دا خەنجەر وەشاند و ئەم هێلاینە د ناڤا دوو هەڵبژارتنان دا؛ ڕەڤ یان خودانەدەست.
لەورا ئەڤڕۆ ئەگەر هوون ژ ئێک دو د تورە بن، گەنجێن ڤی وەڵاتی و ئاخا پیرۆز و قوربانیێن گەلێ مە نەکەنە قوربانی حەزێن خۆە، وەرن ل دوور مێزا کورداتیێ خرڤەببن و ب کوردی باخڤن و ب کوردی ئێکبگرن.
باشوور نەتنێ جهێ کوردێن عیراقێ یە، نوکە ھیڤیا هەمی کوردانە و وان د دلێ خۆەدا ل سەر ڤێ ئاخێ وەڵاتێ هیڤیێن خۆ ئاڤاکریە، لەورا دبێژم چارە ل بەغدایێ نینە، چارەسەری ل هەڤلێرێ یە و ل ژێر ئالا پیرۆز دا کوم ببن و هەرێما کوردستانێ بپارێزن.
2020.07.16
