گرێیا ھەرێما ئارام ل سوریێ
دانووستاندنێن ترکیێ و ئه‌مریکایێ ژ بۆ پێکانینا ناڤچه‌یه‌کا ئارام ل سه‌ر سینۆرێ باکور و ڕۆژاڤایێ کوردستانێ به‌رده‌وامن. ترکیا هه‌ولێن خوه دده کو ئه‌و ناڤچه ل گۆری پلان و به‌رژه‌وه‌ندیێن وێ بھێتە ئاڤاكرن. شاندا ئه‌مریکی ژی ل ئه‌نقه‌رێ یه، و هه‌ولێن خوه دده کو ل گه‌ل ترکیێ بگەهن نه‌رینه‌کا هه‌ڤبه‌ش.
ئه‌ڤ د ده‌مه‌کی دا یه کو ڕووسیا، ئیران و ترکیێ دژاتیا خوه ژ بۆ هه‌ر جۆره ڕێڤه‌به‌ریه‌کا خوه‌جهی ل سووریێ نیشان دانه و ڕاگەهاندن، دڤێ یه‌کپارچه‌ییا ئاخا سووریێ پاراستی به.
ب ئارمانجا مسۆگه‌رکرنا دامه‌زراندن و بده‌ستخستنا ناڤچه‌یا ئارام، ل باکور و ڕۆژهلاتێ سوریێ، ڕۆژهلاتێ فرات و ڕۆژاڤایێ کوردستانێ، حکومه‌تا ترکیێ د هه‌ول و ته‌ڤگه‌را خوه دا به‌رده‌وامه.
ل گه‌را 13ێ یا جڤینێن ئاستانایێ، ترکیێ هه‌ڤبه‌شێن خوه یێن گارانتۆر، ڕووسیا و ئیرانێ، هه‌روها هه‌ردو ئالیێن حکومه‌تا سوریێ و ئۆپۆزسیۆنێ ژی، کرن هه‌ڤنه‌رین و هه‌ڤهه‌لوه‌ست، ب تایبه‌تی ده‌ربارێ ڕه‌دکرن و دژایه‌تیا هه‌ولێن جوداکار ئێن پارچه‌کرنا سوریێ، وه‌که کو د ئه‌نجامنامه‌یا ئاستانا 13ێ دا هاتیه ئاشکه‌ره‌کرن، کو وان ب هه‌ولێن ئۆتۆنۆمی یێن نه‌یاسایی، ب ناڤ دکه.
ژ بۆ یه‌کالیکرنا مژارا ناڤچه‌یا ئارام ژی، شانده‌کا له‌شکه‌ری یا ئه‌مرکی گەهشتیه ترکیێ و ل سه‌ر ڤێ مژارێ، هه‌ردو ئالی گۆتووبێژان دکن.
ترکیه دخوازه ئه‌و یه‌کالیکرن ل گۆری خوه‌سته‌کا وێ به و د به‌رژه‌وه‌ندیا وێ دا به. ئێدی کار دکه ژ کو ئه‌و ناڤچه ل گۆری مه‌رج و پیڤانێن ئه‌نقه‌رێ به و ل ژێر برێڤه‌به‌ری و سه‌رپه‌رشتیا ترکیێ به. د ناڤ دا ژی، ئاره‌زوویا وێ یه، کو ئه‌مریکا ده‌ست ژ هه‌ڤپه‌یمانی، پشتگری و ئالیکاریا هەسەدێ، یەپەگێ و ڕێڤه‌به‌ریا خوه‌سه‌ر به‌رده.
ناڤچه‌یا ئارام، کو به‌هسا وێ تێ کرن، ل گۆری ترکیێ، وێ ب کووراهیا 32 کیلۆمه‌تره‌یان به. ژ بۆ ڤێ مه‌به‌ستێ ژی، ترکیێ 5 ناڤچه‌یێن سینۆری وه‌که (ناڤچه‌یێن ئه‌وله‌هی یێن تایبه‌ت) ڕاگەهاندنه و هێزێن خوه ژی ل سه‌ر سینۆر کۆم کرنه.
لێ ڕێڤه‌به‌ریا خوه‌سه‌ر و ڕێخستنێن گرێدایی وێ، داخواز دکن کو ئه‌و ناڤچه، ب کووراهیا 5 کیلۆمه‌تره‌یان به و ل ژێر ده‌ستێن ئه‌نجوومه‌نێن خوه‌جهی به و ڕۆلا سه‌ره‌که ل وێ ناڤچه‌یێ یا هه‌ڤپه‌یمانیا ناڤده‌وله‌تی به.
شاندیێ ئه‌مریکایێ یێ ژ بۆ سوریێ، ژ ڕووداوێ ڕا ڕاگەهاندبوو کو کووراهیا گونجاو ژ بۆ وێ ناڤچه‌یێ، د ناڤبه‌را 5 هه‌تا 14 کیلۆمه‌تره‌یان دا یه.
به‌رێ ژی ئه‌نقه‌ره‌یێ ڕاگەهاندبوو کو ئه‌گه‌ر ئه‌و دگه‌ل ئه‌مریکا نه‌گەهژه ڕێکه‌فتنه‌کێ، ئێدی ئه‌و دێ نه‌چار به ناڤچه‌یا ئارام، ب ته‌نا خوه، دامه‌زرینه.
ئه‌ڤ یه‌ک د ده‌مه‌کێ دا یه، کو نه‌هاتیه پشتراستکرن کو ئه‌مریکا دخوازه برێڤه‌برنا وێ ناڤچه‌یێ د ده‌ستێن هێزێن ئه‌مریکی و ترکی دا به، وه‌که کو هنده‌ک چاڤکانی به‌حس دکن.
ده‌ربارێ چه‌ند خالێن گرێدایی دۆسیه‌یا ناڤچه‌یا ئارام، هه‌تا نها هه‌ردو ئالی نه‌گەهشتنه لهه‌ڤکرنه‌کێ، لێ دبه کو ئه‌نجامێن جڤینێن ڤان ده‌مژمێران، هنده‌ک ڕۆنی و زه‌لالیێ بدن پێشهاته‌یێن نوو، ل سه‌ر مژارا ناڤچه‌یا ئارام، کو هه‌تا نها هه‌لوه‌ستا واشنتۆنێ، نه ل گۆری داخوازێن ترکیێ یه.
