یەكێتی ژھەڤكەتیە و ھەرفیە پارتی نكارە وێ رزگار بكە
ئاڤاكرنا حوکومه‌تا نوو یا هه‌رێما کوردستانێ گیرۆ بوو، ئه‌ڤه ده‌مه‌ک درێژه هلبژارتن ل کوردستانێ ئه‌نجام دایین، لێ حوکومه‌ت نایێ دامه‌زراندن. سه‌ده‌مێ بنگه‌هین یا ڤێ یه‌کێ هه‌لوه‌ستا یەكێتیا نشتمانیا كوردستانێ (یەكێتی) یا نه زه‌لاله.
ژ بۆ ئاڤاکرنا حوکومه‌تێ، وه‌ک پارتیا یه‌که‌م، پارتیا دەمۆكراتا كوردستانێ (پدک)ێ ل گه‌ل گه‌له‌ک ئالیان هه‌ڤدیتن پێکانین، د ئه‌نجاما ڤان هه‌ڤدیتنان دا ل گه‌ل ته‌ڤگه‌را گۆران ل هه‌ڤهاتن ژ بۆ ئاڤاکرنا حوکومه‌تا نوو هه‌ردو ئالیان د ناڤا خوه دا په‌یمانه‌ک ئیمزا کرن. هه‌روه‌ها دێ پێکهاتێن کوردستانێ ژی بەشداری ئاڤاکرنا حوکومه‌تا نوو ببن.
پدک ژ بۆ ڕه‌وشا تایبه‌ت یا کوردستانێ هه‌ولدده کو یەكێتی ژی د ناڤ پرۆسه‌سا ئاڤاکرنا حوکومه‌تا نووده جھ بگره. ژ بۆ ڤێ یه‌کێ ب ده‌هان جڤین ل گه‌ل یەكێتیێ کرن. لێ یەكێتی نکاره بریاره‌کێ بده. د ناڤا یەكێتیێ دا هه‌رکه‌س ب سه‌رێ خوه خوه‌دی بریاره‌کێ یه، ئێدی یەكێتی نه وه‌ک ڕێخستنه‌ک سیاسی کار دکه و چ نرخه‌ک ڕێخستنی د ناڤا وان ده نه‌مایه.
گه‌له‌ک سه‌ده‌مێن جودا ژ ڤێ هه‌لوه‌ستا یەكێتی ڕه تێنه نیشاندان، لێ د ڕاستیا خوه دا یەكێتی وه‌ک ئالیه‌ک سیاسی نه‌مایه و تێکچوویه. ئێدی ئەو د ڕێیا ئیستقرارا کوردستانێ دا و پێشکه‌فتنا پرۆسه‌سا سیاسی دا بوویه ئاسته‌نگ. پدک ژ بۆ ڤێ ئاسته‌نگا ده‌ستچێکری ده‌رباس ببه باوه‌ر دکه کو، دڤێ ب چ ئاوایی به یەكێتی د ناڤا حوکومه‌تا کوردستانێ ده جھ بگره. پدک ل سه‌ر ڤێ باوه‌ریێ هه‌ولدانا دکه. لێ یەكێتی نه ب ئه‌تیکا سیاسی ته‌ڤدگه‌رە و ڤێ هه‌لوه‌ستا پدکێ ئیستغلال دكە. ژ بۆ وه‌زاره‌ته‌ک زێده، یان ژی پۆسته‌کی زێده یەكێتی ئامادەیە ھەموو پروسەسا سیاسی ل باشوورێ كوردستانێ تێك بدە، ئیسرارا یەكیتتیێ ژ بۆ وەرگرتنا وەزارەتەك زێدە یا پۆستەك زێدە ژ بۆچارەسەركرنا ناكۆكیێن ناڤا باسكێن جودا یە، نە ژ بۆ خزمەتا خەلكێ كوردستانێ یە.
دێ ئه‌ڤ یه‌ک هه‌تا که‌نگێ ده‌وام بکه نایێ زانین، لێ هه‌ر ڕۆژا دچه ژ کیس کوردستانێ دچه، کوردستان زه‌ره‌رێ ژ ڤێ یه‌کێ دبینه.
د بنگه‌هێ خوه ده پدک ، ته‌ڤگه‌را گۆران و پێکهاتیێن کوردستانێ خوه‌دی پرانیه‌ک زێدەنە د پارله‌مه‌نتۆیێ دا. دکارن سه‌رۆکێ هه‌رێمێ هلبژێرن دا کو حوکومه‌تا نوو ژی بێ دامه‌زراندن. لێ هه‌لوه‌ستا پدک یا کو دڤێ یەكێتی ژی د ڤێ پرۆسه‌سێ دا بەشدار بە دبه سه‌ده‌ما پاشخستنا پێڤاژۆیێ.
که‌سه‌ک وه‌ک پدکێ یەكێتیێ ناس ناکه. ئەو دزانە كا یەكێتی د چ ڕه‌وشێ دا یه و ژ هه‌ڤکه‌تیه، پدک ده‌ست دده پشت یەكێتیێ دا کوو ب ته‌مامی تێک نه‌چه، لێ یەكێتی هه‌رفیه چ که‌س نکاره یەكێتیێ خلاس بکه.
هه‌ر جڤینا د ناڤبه‌را پدکێ و یەكێتیێ دا پێکتێ وه‌ک جڤێن ب ئه‌رێنی تێن ڕاگهاندن، لێ به‌رپرسه‌ک یێ یەكێتیێ ب داخوویانیه‌کێ دکاره هه‌موو پێڤاژۆیێ تێک بده. یەكێتی د ناڤا خوه ده شه‌رێ ده‌ستهلاتێ دکه، شه‌رێ ده‌ستخستنا پۆستا دکه. ژ بۆ ڤێ یه‌کێ ژی نکاره بریاره‌کێ بده.
مخابن، ل کوردستانێ، ئه‌ڤ ڕه‌وشا یەكێتیێ ئه‌شکه‌ره به‌رچاڤێ خه‌لکێ نایێ گۆتوبێژ کرن، د ڤی واری دا مه‌دیا پێویسته یەكێتی و سیاسه‌تا کو ڕێڤه دبه گۆتوبێژ بکه و ڕۆژانه ڤێ یه‌کێ بکه بابه‌ته‌ک هه‌تا کو حوکومه‌تا نوو بێ ئاڤاکرن. مخابن ژ به‌ر هنده‌ک حه‌سابێن سیاسی ئه‌ڤ یه‌ک نایێ کرن و چ فه‌یادا گۆتنێ ژی نه‌مایه.
ژ بۆ کو پارله‌مه‌نتۆ ده‌ست ب کارێ خوه بکه، یەكێتیێ جاردن ئاسته‌نگ ده‌رێخستن، لێ هه‌لوه‌سته‌ک ڕاست هاته نیشاندان و پارله‌مه‌نتۆ بێ کو یەكێتی به‌شدار ببه، ده‌سته‌یا خوه یا سه‌رۆکاتیێ هلبژارت و ده‌ست کارێ خوه کر. گه‌ره‌ک د پێڤاژۆیا دامه‌زراندنا حوکومه‌تێ دا ژی، هه‌مان هه‌لوه‌ست بێته دانین.
2019.04.16
ئەنالیز/ ن. فرات
