ئەڤ هەر دو نووچە چ ژ مە را دبێژن
ل وانێ ٦ چیاگه‌ر/چیاڤان ژ بۆ پشتەڤانیا فلەستینێ و رێزگرتن ل وان که‌سێن کو د شه‌رێ خەزایێ دا هاتنه کوشتن هلپه‌رکین چیایێ که‌ڤه‌نلیێ یێ کو ۲ هه‌زار و ۸۰۰ پییان بلنده، ل سه‌رێ چیایی ئالایێ ترکیێ و فلەستینێ چکلاندن و گۆڤه‌ند گرتن.
چیاگه‌رێن وانی ژ بۆ پشتگریا به‌رخوه‌دانا فلەستینێ و رێزگرتن که‌سێن کو د شه‌ر دا هاتنه کوشتن، ل ناڤچه‌یا ئیپه‌کیۆلویێ هلپه‌رکین چیایێ که‌ڤه‌نلیێ. هه‌ر ٦ چیاگه‌ران ل سه‌ر چیایێن کوردستانێ ئالایێ ترکیێ و فلەستینێ بلند کرن و گۆڤه‌ندا فلەستینێ گرێدان.
ژ ئالیەک دن ڤە:
ل گۆر ئاگاهیێن ناڤخوەیی رۆژا چارشه‌مێ ٢٠٢٣/١٢/٢٧ ۳ فرۆکه
یێن بێ فرۆکه‌ڤان یێن ترکیێ ب دژواری چەند جارەکان، ژ بەر هەبوونا بارەگەهێن پەکەکێ ل وێ دەڤەرێ، گوندێن سالیاوا و کانیمیران یێن گرێدایی ناڤچه‌یا پێنجوێنێ سەر ب پارێزگه‌ها سلێمانیێ بۆمبه‌باران کرن.
هەر د ڤێ چارچۆڤەیێ دا و هەر ژ بەر هەبوونا چەکدارێن پەکەکێ، قایمه‌قامێ ناڤچه‌یا ئاخجه‌له‌رێ ژ مەدیایێ را دیار کر د هەمان رۆژ دا، بالافرێن بێ فرۆکه‌ڤان یێن ترکیێ ۲ جاران گوندێ توته‌قالی سەر ب چەمچەمالێ ڤە، بۆمبه‌باران کرن.
چما ئەڤ هەر دو نووچە ب هەڤرا هاتن وەشاندن؟ ئەڤ هەر دو نووچە چ ژ مە را دبێژین و چ نیشا مە ددن؟ ئەم دکارن چ دەرس و عیبرەت ژ ڤان هەر دو نووچەیان وەربگرن؟
ب کورتی ئەم دکارن بێژن کو چیایێ که‌ڤه‌نلیێ و چیایین دن یێن باکورێ کوردستانێ گەلەک ژ چیایێن گوندێن سالیاوا و کانیمیران و گوندێ توته‌قالی گەلەک بلندتر، ئاسێتر و ب ستارەترن. لێ پەکەکێ باکورێ کوردستانێ یێ داگیرکرێ، د دەستێ ترکێێ دا هێلایە کو ب کەیفا خوە و بترس لێ بگەرن و هەر کەس هەسپێ خوە ل وێ پارچەیا کوردستانێ بچەرینە. چەکدارێن پەکەکێ باکورێ کوردستانێ، یێ کو د بن پۆستالێن لەشکەر و جەندرمە یێن ترکێی ڤە دنالە ڤالا هێلایە، هاتیە شەر ل باشووەێ کوردستانێ، هەریما کوردستانێ یا ئازاد شەرێ ترکیێ دکە کو قەندیل گەلەک باش دزانە کو ئەو هەرێمەک ئازادە و حکومەت و پەرلەمانێ خوە و ئیدارەیا خوە هەیە، ل شوونا کو، پەکەکە ل باکورێ کوردستانێ شەرێ ترکیێ بکە و داخوازا مافێن گەلێ کورد ژ دەولەتا ترکیێ بکە، ب هەموو هێزا خوە یا چەکداری هاتیە دەستکەفتی یێن دیرۆکی یێن باشوورێ کوردستانێ پووچ بکە.
ل هەموو باکورێ کوردستانێ هێشتا پەکەکێ چەند بهوستەک ئاخێ رزگار نەکریە کو ئالایێ کوردستانێ لێ بچکلێنە و بلند بکە. ڤایە ئالایێ ترکیێ و فلەستینێ ل سەر چیایێن مە ل باکورێ کوردستانێ بلند دبن. ئەڤە ئەنجامێ سیاسەتا زێدەتر ژ ٤٠ سالان یا قەندیلێ یە.
