ما دێ باشاک ده‌مرتاش ببە شارەدرا ستەنبۆلێ
ده‌م پارتییێ هه‌تا وه‌ک ڤێ گاڤێ ستراته‌ژیا خوه یا هلبژارتنان و دەستنیشانکرنا به‌ربژێرێن خوه ل باژارێن مه‌زن، تایبه‌تی ل ستەنبۆلێ، ئاشکەرا نەکرنە. ده‌م پارتی و جەهەپە ژ بۆنا دیارکرنا بەربژێرێ ستەنبۆلێ د ناڤا بازاره‌کی دا نه. لێ هه‌ر دو ئالیژی ئیدیعا دکن کو دێ ئه‌نجاما بازاریا خوه ژ رایا گشتی را ئاشکه‌ره بکن. چێکرنا پرۆتۆکۆله‌کی شه‌فاف د ناڤبه‌را جەهەپێ و ده‌م پارتییێ دا، د مه‌رجێن کو نها ترکیا تێره ده‌رباس دبه، ژ بۆ هه‌ر دو پارتییان ژی ریسکەک مه‌زنه. راستیا هه‌یی نایێ ڤه‌شارتن. ژ ئالیه‌کی ڤە چه‌کدارێن پەکەکێ و ئارتێشا ترکیێ د ناڤا شه‌ره‌کی دانە، هه‌ر هه‌ڤکاریا پارتیه‌ک ترکیێ ب ده‌م پارتییێ را ریسکه.
هه‌ری داوی هات ئیدیعا کرن کو، هه‌ڤژینا سه‌لاحەدین ده‌مرتاش دێ ببه به‌ربژێرا ده‌م پارتییێ یا ستەنبۆلێ. باشاک ده‌مرتاش ژی د ڤێ ده‌ربارێ دا ل سه‌ر حه‌سابێ خوه یێ مه‌دیایا جڤاکی داخوویانیه‌ک دا و گۆت: “ئه‌گه‌ر پارتییا من ڤێ ئه‌رکێ بدە من و گه‌لێ مه بخوازه ئه‌ز ژ بۆ به‌ربژێریێ ئاماده‌مه.”
لێ د راستیا خوه دا، ده‌م پارتی ڤان گاڤان دئاڤێژە داکو، ل گۆرا خوه، چاڤێ جەهەپێ دترسینه. لێ بلا بێ زانین ئه‌گه‌ر ده‌م پارتی به‌ربژێره‌کی/ێ ل ستەنبۆلێ ده‌رێخه، ئه‌ڤ یه‌ک وه‌ک لهه‌ڤهاتنه‌کێ د ناڤبه‌را ده‌م پارتی و ئاک پارتییێ دا تێ نرخاندن. ژ خوه ئه‌گه‌ر ده‌م و جەهەپە ل هه‌ڤبکن و ده‌م ل ستەنبۆلێ به‌ربژێره‌کی ده‌ستنیشان نه‌که، ئاک پارتی دێ ڤێ یه‌کێ گه‌له‌ک ب زانه‌بوون ژ خوە را وەکە پرۆپاگانده‌یا هلبژارتنان بکاربینە و ژ رایا گشتی را بێژە ڤایە جەهەپێ ب پارتییەکا پشتەڤانیا “تەرۆریستان” دکە هەڤپەیمان چێکریە.
ژ خوه د ناڤا رێکخستنێن ده‌م پارتییێ دا نه‌رازیبوونه‌ک مه‌زن هه‌یه کو، پارتی به‌ربژێرا دخاپینه و دبێژن کو چو بهایێ هلبژارتنێن ده‌ستپێکێ ژ بۆ ده‌ستنیشانکرنا به‌ربژێرا نینە.
وه‌ک دن دخوه‌یێ ڤێ جارێ ده‌نگده‌رێن ده‌م پارتییێ، وه‌ک به‌رێ ده‌نگا نادن ئه‌کره‌م ئیمامۆگلو، بەربژێرێ جەهەپێ. نها تشتا د ناڤا ده‌نگده‌رێن ده‌م پارتییێ دار ده‌ردکه‌ڤه پێش، ئه‌وه کو ده‌م پارتی به‌ربژێره خوه ده‌ستنیشان بکه و ب خوه بکه‌ڤه هلبژارتنان.
