ل رۆژکەلات پەژاک ئامادەیە هاریکاریا تەهرانێ بکە

 سه‌رۆکێ پژاکێ، سیامه‌ند مۆعینی، ژ مه‌دیایێن سه‌ر ب پەکەکێ را‌ داخوویاکرن کو، ئه‌گه‌ر ره‌وشا ئیرانێ خراب ببه‌ ئه‌و ئاماده‌نه‌ دگه‌ل رژێما ئیرانێ هه‌ڤکاریێ بکن. مۆعینی گۆت: “ئه‌گه‌ر ره‌وشا ئیرانێ خراب ببه‌، پەژاک/پەکەکە ئاماده‌ یه‌ ب هه‌ماهه‌نگی دگه‌ل حکومه‌تا ئیرانێ باژارێن کوردستانێ بپارێزه‌ و رێ نه‌ده‌ هێزێن تێکده‌ر بخن بن کۆنترۆلا خوه‌.”

بێ گومان ل سه‌ر ڤێ داخوویانیا سه‌رۆکێ پژاکێ گه‌له‌ک نرخاندنێن جودا تێنه‌ کرن. مۆعینی راستیا سیاسه‌تا پەکەکێ گۆتیه‌ و ئه‌ڤه‌ چه‌ندێ سالانە ل رۆژهلاتێ کوردستانێ ژ بۆ پاراستنا رژێما ئیرانێ ل دژی ته‌ڤگه‌را کورد ته‌ڤدگه‌رن. لێ مخابن که‌سه‌ک و ب تایبه‌تی پارتیێن رۆژهلاتێ کوردستانێ گه‌له‌ک ڤێ پرسگرێکێ ژ بۆ ”کوورنه‌بوونا” ئالۆز و ناکۆکیان ناینن رۆژه‌ڤێ‌.

دوهی  و ئیرۆ پەکەکێ ل رۆژاڤایێ کوردستانێ چ کریە دێ هه‌مان تشتێ ل رۆژهلاتێ کوردستانێ ژی بکە. چه‌وا وان رژێما ئه‌سەد پاراست دێ ب هه‌مان سیاسه‌تێ رژێما مه‌لایێن ئیرانێ ژی بپارێزن. ئانكو ره‌وشا ئه‌نەکەسێ ل رۆژاڤایێ کوردستانێ چبه‌، دێ ره‌وشا ته‌ڤگه‌را کوردی ل رۆژهلات ببه‌  هه‌مان تشت.

ل باشوورێ کوردستانێ پەكەكە مل ددە ملێ حه‌شدا شه‌عبی ل ده‌ڤه‌رێن وه‌ک شنگالێ ل دژی پەدەکێ و ته‌ڤگه‌را نه‌ته‌وی ته‌ڤدگه‌رن. به‌رژه‌وه‌ندیێن حوکومه‌تا به‌غدایێ دپارێزن و رێدگرن کو شنگال بكەڤە سەر هه‌رێما کوردستانێ‌.

ژ بۆ ڤێ یه‌کێ دێ ل رۆژهلاتێ کوردستانێ هه‌مان تشتێ بکه‌ و دکه‌ ژی.

نها پەكەكە و دەردوورا وێ  ل هنده‌ک ده‌ڤه‌ران وه‌سا ددن خویاکرن کو، ئەو ب خوه‌پێشاندانان کوشتنا ژینا ئه‌مینی شه‌رمه‌زار دکن، لێ ده‌ما ڤێ یه‌کێ ژی دکن  گه‌له‌ک ب حه‌ساسی دكن و د بن دا‌ رژێمێ دپارێزن.

به‌رپرسێن پەکەکێ ئارمانجا سیاسه‌تا پککێ ڤه‌کری ئاشكەرا دكن، لێ مخابن ژ بەر ناکۆکیێن د ناڤا هێزێن سیاسی دا خه‌لکه‌ک ناخوازه‌ ڤێ یه‌کێ ببینه و بێژە‌. هه‌ر ئالیه‌ک هه‌ولدده‌ ل دژی ئالیه‌کێ دن پەکەکێ وه‌ک كارته‌كێ ب کاربینه‌. لێ ئه‌و ئالیێن ڤێ یه‌کێ دکن خوه‌ دخاپینن و دکه‌ڤن که‌مینا سیاسه‌تا پەکەکێ یا د خزمه‌تا دژمن دا.

ئه‌گه‌ر ژ ئیرۆ ڤه‌ پارتی و ئالیێن سیاسی ل رۆژهلاتێ کوردستانێ ڤێ یه‌کێ نه‌بینن و ل گۆرا ڤێ ژی هنده‌ک ته‌دبیران نه‌ستینن و نه‌بن خوه‌دی هه‌لوه‌سته‌ک زه‌لال، دێ پاشه‌رۆژێ دا ئێشا ڤێ یه‌کێ بکشینن، پەكەكە دێ بەركێ ژ بن پێ وان بكێشە و جهێ وان ل رۆژهەلاتێ كوردستانێ نامیە.

پەکەکە ل دژی هه‌موو جوره‌یێن ده‌ستکه‌ڤتیێن نه‌ته‌وی ته‌ڤدگه‌ره‌، لێ مخابن ڤێ یه‌کێ ب ناڤێ نه‌ته‌وه‌تیێ، ب ناڤێ کورده‌یاتیێ دکه‌. ب ڤێ یه‌کێ ل هه‌می ده‌ڤه‌ره‌کێ دبه‌ گەفا هه‌ری مه‌زن ل سه‌ر ده‌ستخستنا مافێن نه‌ته‌وی یێ کوردان.

٢٠٢٢/١٠/٣