کۆنگرە پرەنسیپێ رەخنە و رەخنەلخوەگرتنی چالاک بکە
فەرەج میرزا، پێشمەرگەیێ دێرین د هەڤپەیڤینەکێ دا دگەل مالپەرێ سبەهی ل سەر کۆنگرەیێ ١٤ێ یێ پارتییا دەمۆکراتا کوردستانێ د ناڤا بەرسڤێن خوە دا گەلەک مژارێن گرنگ دئازرینە و چەند پێشنیاران ژ بۆ کۆنگرەیێ بەرچاڤ دکە.
مالپەرێ سبەهی: وە چ هیڤی ژ کۆنگرەیێ ١٤ێ یێ پەدەکێ هەنە؟
فەرەج میرزا: د ناڤبه‌را كۆنگرەیێ 13 و 14ێ دا دوازده سال ده‌ربازبوون كو ل گۆر په‌یره‌وێ نافخوە یێ پارتییا دەمۆکراتا کوردستانێ (پارتی) دڤیابوو نها كۆنگرەیێ 16ێ بهاتبا گرێدان، بەلێ شه‌رێ داعشێ و په‌تایا كۆرۆنایێ وه‌كر كو کۆنگره نه‌هێن ل دارخستن. ئه‌م هیڤی دكه‌ین کو كۆنگرەیێ ١٤ێ یێ پارتیا دەمۆکراتا کوردستانێ (پارتی) ل ئاستێ ئاریشه و كێشه‌یێن نافخوەی، هه‌رێمی و ناڤنه‌ته‌ویی بت، ب تایبه‌تی گه‌له‌ك ژ هه‌ڤالێن سه‌ركرداتیێ و كادرێن خوار سه‌ركرداتیێ، ب هه‌ر ئه‌گه‌ره‌كێ بت، بێباندۆر بوونه. ئه‌م هیڤی دكه‌ین پارتی د ڤێ کۆنگرەیێ دا گه‌له‌ك ب جدی ل سه‌ر ڤێ خالێ راوه‌ستت و ژ بۆ هاتنا گه‌نجێن ژێهاتی و دلسۆز و ده‌ست و ده‌رون پاقژ بۆ ناڤ سه‌ركرداتیێ رێكێ خوەش بكه‌ت.
بابه‌تێ گه‌نده‌لیا به‌رپرسێن پارتی و بكارینانا ده‌سهه‌لاتێن خوە ژ بۆ زه‌نگینبوونا نه‌یاسایی مژاره‌كا دی یا گه‌له‌ك گرنگه كۆنگره ل سه‌ر راوه‌ستت و رێك و رێسایێن گونجای ببینت بۆ رێگرتن و به‌رته‌نگكرنا ده‌لیڤێن گه‌نده‌لیێ.
مالپەرێ سبەهی: ل سەر ئاستا ناڤدەولەتی و جیهانی پێشنیارێن وە ژ بۆ کۆنگرەێی هەنە؟
فەرەج میرزا: ل سه‌ر ئاستێ جیهانی و ناڤده‌وله‌تی، ب باوه‌ریا من پارتی وه‌كو هه‌لگرا ئارمانجێن مه‌زنێن نه‌ته‌ویی چو كیماسیێن وه‌سا نینن ئه‌م به‌حس لێ بكه‌ین. پارتی دڤی بواری دا گه‌له‌كا نه‌رم و نیان و د هه‌مان وه‌خت دا بهێز و داكۆكیكه‌ره ل سه‌ر مافێن گه‌لێ كوردستانێ.
مالپەرێ سبەهی: ل سەر ئاستا ناڤخوەیی، ب تایبەتی ئیدارە و حکومەتێ وە چ پێشنیار هەنە؟
فەرەج میرزا:ل سه‌ر ئاستێ ئیداره و حكومه‌تێ، پارتی وه‌كو حزبا سه‌ره‌كی د حكومه‌تێ دا گه‌له‌ك جارا ته‌ڤلهه‌ڤی و ململانێ د ناڤبه‌را سازیێن حكومه‌تێ و یێن حزبی دا دروست دبن. ئه‌وژی ژ به‌ر كو هه‌یكه‌لێ پارتی هندێ مه‌زنه ئه‌و بخوەژی ل ده‌رڤه‌ی حكومه‌تێ حكومه‌ته‌كه و ئه‌ڤه ژی وه‌دكه‌ت گه‌له‌ك جاران ل جهێ حزب ببته هاریكار بۆ ئیدارێ، دبیته به‌ڤل و گه‌له‌ك جاران ژی، یان ئەم دکارین بێژین پتریا جاران ل جهێ کو به‌رپرس و ده‌زگایێن حزبی ببنه چاڤدێر و ره‌قیب ل سه‌ر حكومه‌تێ و بەر ب باشیێ، ئاراسته بكه‌ت دكه‌ڤنه د ململانێ دا دگه‌ل ئێك.
مالپەرێ سبەهی: ژ بۆ گوهەرتنێن ناڤخوەیا پارتی و هەیکەلێ وێ هوون چ پێشنیار دکن؟
فەرەج میرزا: ژ بۆ هه‌یكه‌لێ پارتی، واته ئاڤاهیێ وێ، من ژ مێژ وه‌ره دیتنێن جودا هه‌بوونه . هه‌ر رێكخستنه‌ك، پارتیه‌ك و سازیه‌كێ دو ئاستێن ئاڤاهیێ هه‌نه ئه‌وژی: ئاڤاهیێ ئاسۆیی و ستونی نه. ل كۆنگرەیێن 11 و 12 مه گه‌له‌ك ئه‌ندام كۆنگره ل سه‌ر وێ هزرێ قایل كرن كو نابت پارتی ل سه‌ر ئاڤاهییێ خوەیێ ل سه‌رده‌می پارتیزانیێ بمینت، چنكو پارتی ل سه‌ر ده‌مێ ئازدیێ دایه و ئاڤاهیێ وێ یێ ئاسۆیی گه‌له‌ك به‌رفره‌هبویه‌و دڤێن هه‌ڤسه‌نگی هه‌بت د ناڤبه‌را هه‌ردو ئاڤاهیان دا و كێمترین سازیا رێكخستنێ نه‌كێمتر بت ژ 50 ئه‌ندام و پالیوراو و هه‌ره‌سا بكێمترین ژمارا كادرا دێ كارین كارێن خو راپه‌رینین. هینگی و نها ژی ئه‌ز نه دگه‌ل هندێ مه كادر بێنه هه‌لبژارتن ل سه‌ر ئاستێ رێكخراو و لژنێن ناوچا، چنكو گه‌له‌ك كه‌س دبن كادر نه ل سه‌ر بنگه‌هێ خوەپێگه‌هاندنێ و شه‌هره‌زاییێ د كارێ پارتی دا، به‌لكو ل سه‌ر بنگه‌هێ عه‌شیره‌ت و بنه‌مال و هتد د هێن هه‌لبژارتن و هوسا هه‌ر چه‌ند سالا ژمارا وان زێده دبت و بارێ حزبێ گه‌له‌ك یێ گران كری. ل كونگرەیێ 11 ل سالا 1993 مه ئه‌ڤ پێشبینیه كربوو به‌لێ، مخابن، ئه‌م سه‌رنه‌كه‌فتین د قایلكرنا سه‌ركرداتیا پارتی دا و نها پارتی یا دبن باره‌كێ گرانێ ژمارا بێ مه‌عنه یا كادران دا دنالت. دڤێ كونگرەیێ ١٤ێ هه‌یكه‌لێ پارتی بگونجینت دگه‌ل پروسەسا هه‌لبژارتنا و ئاڤاهیی خوەیێ ستونی بهێز بكه‌ت.
بابه‌ته‌كێ دی کو گه‌له‌ك گرنگە و هەتا نها هاتیە پشتگوهئێخستن ئه‌و ژی پره‌نسیپێ ره‌خنه و ره‌خنه ل خوەگرتنێ یه . هه‌ر ده‌مێ ئه‌ڤ پرەنسیپه دناڤا هه‌ر پارتیه‌كێ دا لاواز بوو ئه‌و پارتیه لاواز دبت. راسته ئه‌م پارتییا خوە مه‌زن و بهێز دبینین، به‌لێ ئه‌گه‌ر ئه‌ڤ پرەنسیپه وه‌كو جاران ب گرنگی بهێتە وەرگرتن و كار پێ بهێت كرن پارتی دناڤا خوە دا دێ چه‌ندین جاران بهێزتر كه‌ڤت. مخابن ده‌مێ کەسەک ره‌خنێ بگرت و ئەو رەخنە چه‌ندا ئاڤاكه‌ربت ژی، لێ ئه‌گه‌ر ئه‌و ره‌خنه ئاراسته‌ی به‌رپرسه‌كی بت ل جهێ قه‌بوولكرنا وێ و راستڤه‌كرنا شاشیێ دێ ئەو کەس ژ ئالیێ وی به‌رپرسی ڤه هێته شلوگه‌كرن دژاتی یان دوژمناتی وی هێتە کرن و ئەو بەرپرس دێ هه‌موو ده‌سهه‌لاتێن خوە بكار ئینت بۆ دووركرن یان سزادان و سه‌رزه‌نشت كرنا وی/وێ. ب ڤێ چه‌ندێ ب سه‌ده‌هان بریارێن شاش و نه دروست ده‌رباز دبن و كه‌سه‌ك نه‌وێرت به‌حس لێ بكه‌ت. هیڤیدارین سه‌ركرداتیا پارتی یا داهاتی ڤی پره‌نسیپێ رەخنە و رەخنە ل خوەگرتن گه‌له‌ك گرنگ كار پێ بكه‌ت. نه ب تنێ حبرا ل سه‌ر كاغه‌زێ بت.
ب هیڤیا سه‌ركه‌فتنه‌كا مه‌زن بۆ كونگرەیێ پارتییاخوەینه ئه‌و پارتییا ژ بۆ رزگاریا كوردستانێ هاتیه دامه‌زراندن ل سه‌ر ده‌ستێ بارزانی یێ نه‌مر.
