رۆژا ١٦ێ جۆتمه‌هێ خه‌نجه‌ره‌ک بوو ل پشتا کوردستانێ دان
سه‌رۆکێ یەنەکێ یێ نها بافل تالابانی سه‌رکێشیا گروبا خیانه‌تکری دکر. ژ ئالیێ هه‌رکه‌سی ڤه بافل تالابانی گه‌له‌ک دهات تاوانبار کرن و وه‌ک سه‌رۆکێ کۆما خیانه‌تکار دهات ناساندن. تالابانی پشتی ده‌مه‌کی ده‌رکه‌ت سه‌ر کاناله‌کی ته‌له‌ڤزیۆنێ و به‌هسا خیانه‌تا ۱٦ێ جۆتمه‌هێ کر. تالابانی گۆت: “هه‌رکه‌س من تاوانبار دکه. لێ ئه‌ڤ یه‌ک نه من ته‌نه ب سه‌ره خوه کریه. مه وه‌ک یەنەکە، ته‌ڤگه‌را گۆران و پەکەکە په‌یمان ل گه‌ل حه‌شدا شه‌ءبی ئیمزا کریه. په‌یمانا ل گه‌ل ئیراقێ هاتی کرن، ژ یەنەکێ ۳۸، ژ پەکەکێ ۸ و ژ ته‌ڤگه‌را گۆران ژی ٤ به‌رپرسان ئیمزا کریه. ژ هه‌ر پارتیێ ۳ که‌س نوونه‌راتی کر و ئه‌م ل سه‌ر ماسه‌یه‌کی روونشتن. لێ هه‌رکه‌س من ته‌نێ تاوانبار دکه.
رۆژا ٢٠١٧.٩.٢٥ێ پرۆسه‌یا ره‌فه‌راندووما سه‌رخوه‌بوونا هه‌رێما کوردستانێ و ناڤچه‌یێن کوردستانێ یێن ده‌رڤه‌یی ئیداره‌یا هه‌رێما کوردستانێ برێڤه چوو. هه‌ست و جۆش و که‌له‌جانا سه‌رخوه‌بوونخوازان و کوردستانیان گه‌هه‌شت لووتکه‌یا هه‌ری بلند.
حکوومه‌تا ئیراقێ به‌رده‌وام گه‌فخوارنا بکارانینا هێزێ ل دژی کوردستانێ دکر، ژ بۆ وێ ژی لاوازیا گرۆپه‌ک خیانه‌تکار د ناڤ یەنەکێ دا ب سه‌رۆکاتیا لاهۆر جه‌نگی و ئاراس جه‌نگی یێ برایێ وی و ده‌رز خستن ناڤ هێز و چه‌په‌رێن پێشمه‌رگه.
دو رۆژ به‌ری خیانه‌تا ۱٦ێ جۆتمه‌ها ۲۰۱۷ێ د به‌شه‌ک چه‌په‌رێن ل سینۆرێ که‌رکووکێ ئاماژه‌یێن خیانه‌تێ ئاشکه‌رابوون و ڤه‌کێشینا پێشمه‌رگه یا ب فه‌رمانا بنڤه بنڤه یا گرۆپا خیانه‌تێ و ب رێکه‌فتنا ڤه‌شارتی یا دگه‌ل به‌رپرسێن ئیراق و حه‌شدا شه‌عبی هاتن دیتن.
رۆژا ۱٦ێ جۆتمه‌ها ۲۰۱۷ێ ئێریشا ئارتێشا ئیراقێ و ملیسێن چه‌کدار ئێن ب پشته‌ڤانیا تۆپخانه‌یا وه‌لاته‌کی جیران ده‌ستپێ کر و پێشمه‌رگه‌یی به‌رسڤه‌کا بهێز دا. لێ خیانه‌تا گرۆپەکا ناڤ یەنەکێ و ڤه‌کشینا به‌رده‌وام ده‌رز خسته ناڤ خه‌تێن به‌ره‌ڤانیێ.
رۆژا ۱٦ێ جۆتمه‌هێ هێزێن ئیراقێ ب رێکه‌فتنا دگه‌ل گرۆپا خیانه‌تکار یا ناڤ یەنەکێ ڤه، ئێریشی که‌رکووک و خورماتوو کرن و ب سه‌دان هه‌ڤوه‌لاتیێن کورد شه‌هید و بریندار کرن و نێزیکی ۲۰۰ هه‌زار که‌س ژی ل وان ناڤچه‌یان کۆچبه‌ر بوون.
به‌رپرس و سه‌رکێشێ تاخما خیانه‌تکار یا یەنەکێ لاهۆر جه‌نگی ژ بۆ ده‌ستکه‌فت و به‌رژه‌وه‌ندیێن خوه یێن تایبه‌ت و که‌سی بوو سه‌ده‌م ئه‌و مالوێرانیا کورد و ژده‌ستدانا سه‌دی ٥۱ێ ئاخا باشوورێ کوردستانێ.
هێزێن ئیراقێ خوه‌ستن ده‌ست ب سه‌ر هه‌ولێر و دوهۆکێ دا ژی بگرن و ئه‌زموون و پێکهاته‌یا هه‌رێما کوردستانێ ژناڤ ببن، ئیراده‌یا پۆلایی و بهێز یا نه‌شکه‌ستی یا پێشمه‌رگه ل ئه‌نیێن پردێ، سحێلا، مه‌حموودیه و ته‌لسقۆفێ شه‌ره‌کی بێ وێنه ل هه‌مبه‌ر وان کر و ده‌رسه‌کی گرنگ دانه داگیرکه‌ران کو جاره‌کا دن جه‌ساره‌ت نه‌کن هه‌ولدانه‌که وسا بکن.
هه‌ڤدەم دگه‌ل ئێریشا داگیرکه‌ر به‌شه‌ک ژ جه‌حشێن چاپه‌مه‌نیا کوردی ل پشت دژمن ملدان ملێ وان و پرچه‌کی و بهێزبوونا دژمن را پرۆپاگاندا دکرن و نووچه‌یێن وان ڤه‌دگوهاستن. خه‌لکێ کوردستانێ بێهێڤی کرن و ب ئێریشا داگیرکه‌ران یا ل سه‌ر هه‌ولێرا پایته‌خت ژی که‌یفخوه‌ش دبوون.
ئاراس جه‌نگی یێ برایێ لاهۆر جه‌نگی ب هه‌نه‌ک کرن ڤه په‌یڤا حه‌یاتم ژ بۆ کۆچبه‌رێن که‌رکووکێ بکارئانی و دگۆت، “حه‌یاتم ڤه‌گه‌رن مالێن خوە دۆلمه‌یان بۆ مه چێبکن و ئه‌م دۆمینێ بکن”. لێ ژ ئالیێ دن ڤه ب ده‌هان لاو و جوانێن که‌رکووکێ ب ده‌ستێ ملیسان هاتبوون شه‌هید کرن و هه‌تا ناها ژی رێیێن وی باژاری ژ خوینا وان جوانان سۆرە.
جیگرێ یه‌که‌م یێ سه‌کره‌ته‌رێ یەنەکێ یێ وێ ده‌مێ کۆسره‌ت ره‌سوول د به‌یانامه‌یه‌کی دا ئه‌و خیانه‌تکار وه‌ک “کالفام” ئانگۆ نه‌فام پێناسه دکر و گۆت: “ئوبالا کاره‌ساتا که‌رکووک و خورماتوو د ستوویێ وان نه‌فامێن ناڤ یەنەکێ دا یه.”
رۆژا ٢٠١٧/١٠/١٨ێ به‌رپرسێ ده‌سته‌یا کۆئۆردیناتۆریا پۆلیتبورۆیا یەنەکێ مه‌لا به‌ختیار د به‌یانامه‌یه‌کی دا راگه‌هاند: “فرسه‌تچی و تۆلاز و به‌ره‌داییێن بێئاقلێن ناڤ یەنەکێ و فێسبوکچیێن کو مژوولی تێکدانا زهنیه‌تا خه‌لکێنە ژ وان بوویه‌ران به‌رپرسن.”
پارێزگه‌رێ که‌رکووکێ و ئه‌ندامێ پۆلیتبورۆیا یەنەکێ یێ وێ ده‌مێ نه‌جمه‌دین که‌ریم ژی چه‌ند جاران ته‌که‌ز کر کو تاخما خیانه‌تکار یا ناڤ یەنەکێ خیانه‌ت د خوینا وان دا یه و خوه‌فرۆشی کرنه پیشه.
سه‌رۆکوه‌زیرێ وێ ده‌مێ یێ ئیراقێ حه‌یده‌ر عه‌بادی و رێڤه‌به‌رێ ئیراقی و سه‌رۆکوه‌زیرێ به‌رێ نووری مالکی ژی گه‌له‌ک جاران سپاسیا خیانه‌تکارێن ناڤ یەنەکێ دا کرن کو ب ئاسانی که‌رکووک و پرانیا ناڤچه‌یێن کوردستانێ راده‌ست کرنه.
