خەرسۆن، شکەستن و رەڤین یان تەکتیکا لەشکەری
ڕۆژنامه‌یا وول ستریت ژۆرنال یا ئەمریکی د راپۆرتەکا خوە دا راگەهاند کو هێزێن ئوکراینایێ ل باشوورێ باژارێ خه‌رسۆنێ بجهبوونە، ئەڤ ژی پشتی کو ئارتێشا رووسیایێ ب تەمامی خوە ژ وی باژێری ستراتەژیك ڤەكێشایی و ژ باژێر دەركەتی، ئەڤ ڤەكشینا رووسیایێ ژ باژارێ خەرسون یه‌ک ژ شکه‌ستنێن ستراته‌ژیک و مەزنە کو کره‌ملین ژ ده‌ستپێکا داگریکرنێ ڤه خواریه.
ڕۆژنامه‌یا ناڤبوری د راپۆرتا خوە دا وەها دنڤیسە: “ئوکراینیان ب دلەكێ خوەش و گه‌ش پێشوازی ل له‌شکه‌رێن ئوكراینی یێن کو هاتین ناڤ باژێر کرن، وان ئالا ئوکراینایێ ل ناڤه‌ندا خه‌رسۆن، یه‌کانه پایته‌ختا هه‌رێمی یا کو رووسیایێ ژ مه‌ها سباتێ ڤه داگیرکریه، بلند کرن و خەلکێ ژ نیشته‌جهێن باژێر ئالا ئوکراینایێ بلند کرن و لەشکەرێن ئوکراینی ل سه‌ر ملێن خوه راکرن. هه‌روه‌سا ئالا یه‌کیتیا ئه‌ورۆپی ژی بلند کرن، وه‌کی نیشانا هیڤیێ کو گه‌له‌ک ئوکراینی دخوازن تێکلیێن نێزیکتر ب بلۆکێ ئەورۆپایێ را ساز بکن.”
ل گۆر رۆژنامەیێ، ئوکراینیان ب درووشمان پێشوازی ل هێزێن وه‌لاتێ خوه یێن کو کەتینە ناڤ باژێر پشتی کو رووس ژ وان دەرا ڤه‌کشیان کرن، وەکی: “سەرکەفتن ژ قه‌هره‌مانان را و مرن ژ دژمنان را، ئوکراینا به‌ری هه‌ر تشتی.”
پسپۆر و شارەزایێن لەشکەری ددن خوەیا کرن کو ڤه‌کشینا رووسیایێ ژ خه‌رسۆنێ شکه‌ستنه‌کا له‌شکه‌ری یا بهێز بوو ژ بۆسه‌رۆکێ رووسیایێ ڤلادمیر پووتین، یێ کو ئیدیعا دکر کو وی هه‌رێما ده‌ردۆرا باژێر د ئیلۆنا بۆری دا خستیه ناڤ ئاخا رووسیایێ.
خه‌رسۆن باژار و به‌نده‌رگه‌هەکا ستراته‌ژیک بوو کو دکەڤە سەر ده‌ریایا ره‌ش ناڤه‌نده‌ک و دەرگەهەک گرینگ بوو ژ بۆ هه‌ولدانێن رووسیایێ یێن ژ بۆ داگیرکرنا ناڤه‌ندێن ئابۆری یێن گرینگ ل ئوکراینایێ د ده‌ستپێکا شه‌ر دا.
وول ستریت ژۆرنال د شرۆڤەکرنا خوە دا دبیژە: “پێشڤه‌چوونا ئوکراینایێ ل خه‌رسۆن دناڤا کێمترین ژ ٣ مەهان دا دویه‌مین گوهه‌رتنا ژ نشکا ڤه‌یە د شه‌ر دا، پشتی سه‌رکه‌فتنا هێزێن ئوکراینایێ د ڤه‌گه‌راندنا ده‌ڤه‌رێن به‌رفره‌ه یێن باکورێ رۆژهلاتێ وه‌لات د ئیلۆنا بۆری دا.”
ئەڤ گوهەرتنا لەشکەری هه‌ولدانێن رووسیایێ یێن ژ بۆ پێشده‌چوونا به‌ر ب ئۆده‌سسا، باژار و به‌نده‌را هه‌ری مه‌زن یێ ئوکراینایێ دخەتمینە.
ڕۆژنامه‌یێ ژ زارێ لێکۆلینه‌رێن له‌شکه‌ری ڤه گۆت: “کۆنترۆلکرنا خه‌رسۆنێ هێزێن ئوکراینایێ دخه ناڤ ره‌وشه‌کا باشتر، دا کو ده‌ڤه‌رێن کوورتر ئێن ئاخا ئوکراینایێ کو ژ ئالیێ رووسیایێ ڤه هاتنه داگیرکرن بۆمبه‌باران بکن.”
رێڤەبەرێ به‌رنامه‌یا لێکۆلینێن رووسی ل (سی ئێن ئەی) کو سازوومانه‌که رامانی یا ئەمریکی ل ڤرجینیا، مایکل کوفمان گۆت: “رزگارکرنا خه‌رسۆنێ هه‌ر هه‌ولدانێن ڕووسی ل سه‌ر په‌راڤێن باشوورێ ئوکراینایێ ب ته‌ڤاهی ژ هۆلێ رادکه.”
