سه‌رۆک نێچیرڤان بارزانی ته‌که‌زی ل سه‌ر خوه‌سته‌که جدی یا هه‌رێما کوردستانێ ژ بۆ چاره‌سه‌رکرنا پرسگرێکان دکه
برێز نێچیرڤان بارزانی سه‌رۆکێ هه‌رێما کوردستانێ، د چارچۆڤه‌یا به‌رنامه‌یا سه‌ردانا خوه یا بۆ به‌غدایێ دا، شه‌ڤا شه‌میێ ٢٠٢٤/٤/٦، به‌شداری د هه‌ر دو جڤینان دا؛ جڤینا چارچۆڤه‌یا هه‌ماهه‌نگیا ئالیێن شیعه و جڤینا ده‌وری یا هه‌ڤپه‌یمانیا برێڤه‌برنا ده‌وله‌تێ کر کو هه‌تا ده‌ره‌نگیا شه‌ڤێ بەردەوم کرن.
د جڤینا چارچۆڤه‌یا هه‌ماهه‌نگیا ئالیێن شیعه دا، سه‌رۆک نێچیرڤان بارزانی ته‌ئکید ل سه‌ر گرنگیا هه‌ماهه‌نگیا د ناڤبه‌را ئالیێن سیاسی یێن ئیراقێ و کارکرنا هه‌ڤبه‌ش و پاراستنا ده‌ستوور و سیسته‌ما فه‌ده‌رالی کر و هه‌روه‌سا هه‌بوونا نێرینه‌کا هه‌ڤبه‌ش ژ بۆ برێڤه‌برنا وه‌لات و پاشەرۆژێ ب پێویست زانی.
د مژاره‌کا دن ئا جڤینێ دا ده‌ربارێ تێکه‌لیێن هه‌ولێر و به‌غدایێ و پرسگرێکێن د ناڤبه‌را وان دا، سه‌رۆک نێچیرڤان بارزانی ته‌که‌ز ل سه‌ر وێ یه‌کێ کر کو، هه‌رێما کوردستانێ جدی یه ل سه‌ر چاره‌سه‌رکرنا پرسگرێکان ب رێیا دیالۆگێ و ل سه‌ر بنگه‌هێ ده‌ستوورێ و ژ بۆنا ڤێ یه‌کێ ژی ته‌ئکید ل سه‌ر هه‌بوونا مه‌کانیزمه‌کێ ژ بۆ ئه‌نجامدنا جڤینێن ده‌وری د ناڤبه‌را ئالیێن په‌یوه‌ندیدار یێن هه‌ر دو ئالیان دا کر.
ژ ئالیێ خوه ڤه، سه‌رۆکوه‌زیر محه‌مه‌د شییاع سودانی و به‌شدارێن جڤینێ، کێفخوه‌شیا خوه ژ بۆ به‌شداربوونا سه‌رۆک نێچیرڤان بارزانی د جڤینێ دا دیار کرن و دووپات کرن کو خوه‌سته‌که هه‌ڤبه‌ش ژ بۆ لهه‌ڤتێگهشتنێ و چاره‌سه‌رکرنا پرسگرێکان هه‌یه و ژ بۆنا ڤێ یه‌کێ به‌رده‌وامیا په‌یوه‌ندیان ب پێویست و گرنگ دیتن.
د جڤینا هه‌ڤپه‌یمانیا برێڤه‌برنا ده‌وله‌تێ ژی دا، دۆسیه‌یێن هه‌ڤپار یێن دگه‌ل سه‌رۆکاتیا هه‌رێما کوردستانێ، گرنگیا جیبجیکرنا رێکه‌فتنا هه‌ڤپه‌یمانیا برێڤه‌برنا ده‌وله‌تێ یا ئاڤاکرنا حکومه‌تا فه‌ده‌رال، ره‌وشا ئیراق و هه‌رێما کوردستانێ و کارنامه‌یا حکومه‌تێ، خزمه‌تگۆزاری و به‌رنامه‌یێ سه‌ردانا سه‌رۆکوه‌زیرێ ئیراقێ بۆ واشینگتۆنێ گۆتووبێژ کرن.
